Արգենտինահայ երգահան Ալին Դեմիրճյանը բնակություն է հաստատել Գյումրիում

Արգենտինահայ երգչուհի Ալին Դեմիրճյանը Հայաստանում իրականացրել է «Մեկ մարզ, մեկ երգ» երաժշտական նախագիծը։ Ստեղծագործական թիմի հետ Ալինը շրջել է Հայաստանի մարզերով, Արցախով և երաժիշտների հետ ձայնագրել մեկ համատեղ երգ ու նկարահանել տեսահոլովակ, որը պատմում է տվյալ մարզի կենցաղի ու միջավայրի մասին:

Նախագիծը Հայաստանի, Արցախի և Սփյուռքի միջև մշակութային կամուրջ կարող է դառնալ: Ալին Դեմիրճյանի նախաձեռնություններն այլ ձևաչափով շարունակություն են ունենալու: Մի քանի ամիս է, ինչ Ալինը տեղափոխվել ու բնակվում է Գյումրիում:

Գյումրիի ամենահին ու ամենահայտնի վարսավիրանոցն է. այստեղ ամեն ինչ նույնն է, ինչ 80 տարի առաջ: Քաղաքի հին վարսավիրանոցում աշխատում են միայն տղամարդիկ, բայց երկու ամիս է` արդեն վարպետների գործին հետևող աղջիկ կա: Ալին Դեմիրճյանը Արգենտինայի մայրաքաղաքից եկել է Գյումրի ու վարսավիրություն է սովորում:

Բայց երաժշտությունն էր, որ Ալին Դեմիրճյանին երկու տարի առաջ կապեց հայրենիքի հետ: Հենց այստեղ էլ սկիզբ դրեց իր նախագծին, շրջեց հանրապետության ու Արցախի բնակավայրերում, բայց նախընտրեց ապրել Գյումրիում:

«Ես ծնվել ու մեծացել եմ Սփյուռքում, ու այնտեղ ճանաչում ես Գյումրին որպես երկրաշարժի քաղաք: Իմ կարծիքով` դա սխալ է, չի կարելի Գյումրին ճանաչել միայն երկրաշարժով, որովհետև այնքան հետաքրքիր է ու գեղեցիկ, որ չես կարող միայն այդպես ճանաչել»,- ասում է Ալինը:

Ալինի համար երաժշտությունը հայրենիք-Սփյուռք կապերն ամրապնդելու հրաշալի միջոց դարձավ:

«Մեկ մարզ, մեկ երգ» մշակութային նախագծի միտքը ծնվեց հենց Արցախ այցելության ժամանակ, հետո ծավալվեց ու հասավ մյուս մարզերին: Նկարահանվել է 19 տեսահոլովակ: Երաժիշտ կատարողների ու խմբերի հետ Ալինը երգել է հայտնի հայկական երգերը, ներկայացրել տվյալ մարզին բնորոշ միջավայրն ու պատմությունը:

«Շիրակի մարզի վիդեոն նկարահանեցինք «Բամբիռ» խմբի հետ, նրանց երգը Ջագի երգն էր ու միասին երգեցին: Ես ճանաչում էի «Բամբիռին», սիրում էի ու որոշեցինք հենց նրանց հետ ձայնագրել նախագծի երգերից մեկը»,- իր նախագծի մասին է պատմում Ալին Դեմիրճյանը:

Ալինը նաև հեղինակային երգերի կատարող է, կիթառն էլ՝ իր երգն ու երաժշտությունը փոխանցելու անբաժան գործիքը: Յոթ տարի աշխատել է Արգենտինայի հայկական դպրոցում, դասավանդել է հայոց լեզու և  երաժշտություն:

Իր ծննդավայր Բուենոս Այրեսում ապրող հայկական համայնքը երգն ու ազգային արժեքները պահպանելու լավագույն ջատագովներից է: Եկեղեցիներին կից հայկական դպրոցներում ազգային երգն ու երաժշտություն են սովորում: Ալինի և հազարավոր հայերի համար «Բարով եկար, սիրուն կռունկ» երգը հայրենիքի կարոտի շունչն է:

«Գալիս ես Հայաստան, որովհետև հայ ես, բայց հետո, եթե դու նորից ես վերադառնում կամ եթե երկար ես մնում կամ որոշում ես այստեղ տեղափոխվել, նշանակում է`  այստեղ լավ է, հանգիստ է, քեզ զգում ես ինչպես տանը»,- իր զգացողությունների մասին է պատմում Ալինը:

Նախագծի ընթացքում ձայնագրված երգերը Ալինը ներկայացրել է Աթենքում ու Արգենտինայի մի քանի քաղաքներում: Որպես նախագծի շարունակություն` արգենտինահայ երգչուհին նախաձեռնելու է այցելություններ աշխարհի այն երկրներ, որտեղ կան հայկական մեծ ու փոքր համայնքներ:

Նպատակ ունի ներկայացնել նրանց բնորոշ բարբառներով ազգային երգերը: