Ձմեռային պատանեկան Oլիմպիական խաղերում Հայաստանը կներկայացնի աշոցքցի 16-ամյա դահուկորդ Սպարտակ Ոսկանյանը

Հունվարի 9-22-ը Շվեյցարիայի Լոզան քաղաքում կանցկացվեն պատանեկան երրորդ ձմեռային Oլիմպիական խաղերը, որտեղ Հայաստանը կներկայացնի Աշոցքի 16-ամյա դահուկորդ Սպարտակ Ոսկանյանը:

Պատանի դահուկորդը միջազգային հեղինակավոր մրցաշարին մասնակցության իրավունքը նվաճել է ունեցած վարկանիշային միավորների շնորհիվ, որոնք հրապարակել է դահուկավազքի միջազգային ֆեդերացիան: Հայաստանի միակ ներկայացուցիչը վերջին մարզումերն է անցկացնում ծննդավայր Աշոցքի ձյունապատ սարերում, որն այս տարի ձմեռային սպորտաձևերի սիրահարների համար դարձել է ժամանցի լավագույն կենտրոններից մեկը:Ձյուն, քամի, մառախուղ ու ցածր տեսանելիություն: Ցերեկային ժամերին մինչև 15 աստիճան ցուրտն էլ տեղի բնակիչների համար սովորական բան է: Ամեն օր ձյունապատ սարերում դահուկ ու սահնակ քշողների պակաս չկա:Այս առումով բնությունն առատաձեռն է Աշոցքի հանդեպ: Սարալանջերի բնական թեքությունները տարածաշրջանում դահուկավազքն ու ձմեռային սպորտաձևերը զարգացնելու հնարավորություն են տալիս: Մարզիչներն էլ համոզված ասում են՝ հյուսիսային բնակավայրերի երեխաները բնությունից օժտված են ֆիզիկական լավ տվյալներով:«Ձևավորված է դահուկային գենը, որովհետև հմտությունները ձեռք բերած ծնողների կողմից անցնում են երեխաներին և էս ցրտաշունչ կլիման, էս ձյունառատ երկիրը, սարերը մեծ հնարավորություն են ընձեռում, որպեսզի տեղացիները զբաղվեն դահուկավազքով»,- Աշոցքի ձմեռային գրավչությունն է ներկայացնում Հայաստանի դահուկավազքի հավաքականի մարզիչ Արթուր Միքայելյանը։

Միքայելյան ամուսինների տղաները ևս դահուկորդներ են,Հայաստանը ներկայացրել են միջազգային հեղինակավոր մրցաշարերում: Մի քանի օրից նրանց սաներից 16-ամյա Սպարտակ Ոսկանյանը կմասնակցի Շվեյցարիայում կայանալիք պատանիների ձմեռային օլիմպիական խաղերին: Սպարտակն առաջին անգամ է մասնակցելու միջազգային մրցաշարի, մրցելու է 70 երկրների շուրջ 2000 մարզիկների հետ:

«Այնտեղ մեծ պետություններ են, հզոր մարզիկներ են, և ես ինչքան ուժ ունեմ արժանապատվորեն կներկայացնեմ իմ երկիրը»,- ասում է պատանի դահուկորդ Սպարտակ Ոսկանյանը։

Ձմեռային օլիմպիական խաղերում Հայաստանի միակ ներկայացուցիչը կմրցի երկու մարզաձևերում, նախ կհաղթահարի մոտ երկու կմ դժվարանցանելի կրոսը, ապա՝ պայքարը կշարունակի 10 կմ դահուկավազքում: Ընդամենը երեք տարի դահուկավազքով զբաղվող Սպարտակից մարզիչները հաջող ելույթ են սպասում :

Նման հեղինակավոր մրցաշարից առաջ մարզումներ է ունեցել Ֆինլանդիայում, որտեղ ի տարբերություն Աշոցքի՝ ձնածածկույթը եղել է արհեստական, իսկ բնակլիմայական պայմանները՝ ավելի բարենպաստ։

«Ֆինլանդիայում օդն ավելի մեղմ էր, էստեղ բարձրությունը 2100 մետր է, իսկ այնտեղ՝ մոտ 150-200 մետր, օդը ավելի թեթև է, քան էստեղ»,- իր տպավորությունների մասին է խոսել Ֆինլանդիայից օլիմպիադայի ներկայացուցիչ դահուկորդը։

Տեղի պոտենցիալը, բնական ռեսուրսներն ու տուրիզմի կենտրոն դառնալու հեռանկարը հաշվի առնելով՝ Աշոցքում անցկացված դիվանագետների դահուկավազքի առաջնությունից հետո որոշվեց Աշոցքում կառուցել միջազգային ստանդարտներին համապատասխան ժամանակակից դահուկային կենտրոն:

«Մեր դահուկուղին համապատասխանում է միջազգային չափանիշներին, մենք իրավունք ունենք անցկացնելու խոշոր միջազգային մրցումներ, միայն ինֆրաստրուկտուրա, հյուրանոցներ ու հանդերձարաններ չկան»,- ասում է Արթուր Միքայելյանը։

Ենթակառուցվածքների, այդ թվում՝ գիշերակացի, սպասարկման այլ ծառայությունների բացակայությունը խանգարում են զբոսաշրջային խմբերին ընդունելու համար։ Թեև այս տարի Աշոցքում ձմեռային էքստրեմալ հանգիստն անցկացնել նախընտրողների պակաս չեն ունեցել:

Երկարատև ձմեռներով ու մինչև երկու մետր ձնածածկույթով հայտնի հյուսիսային բնակավայր Աշոցքն այսօր հայտնվել է շատ տուրիստական կազմակերպությունների ու բլոգերների ուշադրության կենտրոնում, բայց տարածաշրջանի ձմեռային գրավչությունը զբոսաշրջիկներին ճիշտ ներկայացնելու մոտեցումներն են բացակայում: