Գյումրիի մաքսատանը 2019-ին 55 000 ավտոմեքենա է մաքսազերծվել

Հյուսիսային մաքսատուն-վարչությունը Գյումրիում 2019-ին մաքսազերծել է 55 հազար ավտոմեքենա՝ մեծ մասը միայն դեկտեմբեր ամսին: Նույն այդ ընթացքում էր, որ մաքսատանը հսկայական հերթեր էին: Հյուսիսային մաքսատուն-վարչության պետն այսօր ամփոփ տվյալներ է ներկայացրել և նշել, որ նոր տարվա առաջին օրերին մեքենաների հոսքն անհամեմատ քիչ է:

Մինչև հունվարի վերջ մաքսազերծելու են նախնական հայտարարագրում ստացած մեքենաները, որոնք Հայաստան են ներկրվել 2019 թվականին: Գյումրիի ավտոմաքսատան տարածքից դուրս մեքենաների հերթեր այլևս չկան: Դեկտեմբերին հերթը կիլոմետրեր էր ձգվում: Ներմուծողները շտապում էին մինչև տարեվերջ ու դեռ չավելացված մաքսատուրքերով ձևակերպումներ կատարել։ Իսկ արդյունքում Հյուսիսային մաքսատուն-վարչությունը գրանցել է մաքսազերծումների աննախադեպ թիվ: Ավտոմեքենաների մաքսազերծումը Հյուսիսային մաքսատուն վարչությունում սկսվեց հոկտեմբերի կեսից:

«Դեկտեմբեր ամսին Հյուսիսային մաքսատունը ձևակերպել է 30607 մեքենայի մաքսազերծում, նախորդ ամիսներին՝ 25 հազար: Ընդհանուր 55 հազար մեքենա է մաքսազերծվել: Հիմա մեքենաների հոսքը բավական քիչ է: Մաքսազերծվում էին հայտարարագրում ստացած մեքենաները: Դրույքաչափերի փոփոխության հետ կապված՝ նոր մեքենաներ չեն ներմուծվում:

Այսինքն՝ ճանապարհին մնացած մեքենաները, որոնք նախնական հայտարարագրում են ստացել, նրանք են մաքսազերծվում: Նախնական հայտարարագրում ստացել է 4686 մեքենա, որոնց ձևակերպումները պետք է կատարենք մինչև հունվարի վերջ»,- SHANTNEWS-ին ասել է Հյուսիսային մաքսատուն-վարչության պետ Ռուսլան Գրիգորյանը:

Դեկտեմբերին օրական մինչև 1800 մեքենա են մաքսազերծել: Հիմա սպասող փոխադրամիջոցները միայն մաքսատան տարածքում են: Հոսքը նվազել է: Մաքսազերծման համար դիմում են նախապես հայտարարագրում ստացածները: Նախնական հայտարարագրումներ կատարել են բրոքերային կազմակերպությունները:

Քիչ չեն դեպքերը, երբ բրոքերային գրասենյակից մաքսատուն հասած փաստաթղթերում անճշտություններ են հայտնաբերում: Սա էլ ձգձգում է մաքսազերծման գործընթացը, ինչի հետևանքով էլի կան ներկրողներ, որոնք մաքսազերծման համար օրերով Գյումրիում են մնում:

«Նախնական հայտարարագրում ստացել են տարբեր  բրոքերային կազմակերպություններում: Հիմա իրենց թղթերի անճշտության պատճառով անընդհատ պետք է կապ հաստատեն բրոքերական կազմակերպության հետ, իրենց թղթերը ներկայացնեն մեզ՝ մաքսային մարմնին, որպեսզի ստանան  մաքսային ձևակերպում: Այդ ընթացքը կարող է երկարացնել քաղաքացիների ձևակերպում ստանալը»,- ասել է Ռուսլան Գրիգորյանը:

Գյումրիի մաքսատան տարածքում առայժմ քիչ բրոքերային ընկերություններ կան: Հյուսիսային մաքսատուն-վարչությունը նոր տարում դեռ նոր ներկրված ոչ մի մեքենա չի մաքսազերծել, միայն հայտարարագրվածներն են:

Նոր ներկրվածների համար հունվարի 1-ից գործում են ավելացված մաքսատուրքերը: Ընդհանուր առմամբ, Հյուսիսային մաքսատուն-վարչությունը 2019-ին աշխատել է խիստ ծանրաբեռնված:

Մաքսազերծման ծավալները 2020-ին, ըստ վարչության պետի, պահպանվելու են արդեն ոչ միայն մեքենաների մասով: Ավտոմաքսատան տարածքը փուլային աշխատանքի արդյունքում վերածվելու է արտաքին տնտեսական գործունեության կենտրոնի: