Իրանի և ԱՄՆ-ի հակամարտությունը շարունակվում է բանակցությունների դաշտում

Վերջին օրերին ԱՄՆ-ի և Իրանի միջև տեղի ունեցած իրադարձությունները՝ իրանցի գեներալի սպանությունը և Իրաքում ամերիկյան ռազմաբազաների հրթիռակոծությունը, մեծապես սրել են իրավիճակը Մերձավոր Արևելքում, սակայն ԱՄՆ-ն, կարծես, մի փոքր մեղմացրել է դիրքորոշումը և երկխոսության պատրաստակամություն է հայտնել:

ՄԱԿ-ում ԱՄՆ-ի մշտական ներկայացուցիչ Քելլի Քրաֆթը ՄԱԿ-ի անվտանգության խորհրդին նամակ է հղել, որում մասնավորապես ասել է հետևյալը.

«Միացյալ Նահանգները պատրաստ է առանց նախապայմանների Իրանի հետ լուրջ բանակցություններ վարել, որոնց նպատակը կլինի կանխել միջազգային խաղաղությունն ու անվտանգությունը հետագա վտանգի տակ դնելը և իրանական ռեժիմի կողմից իրավիճակի սրումը: ԱՄՆ-ը պատրաստ է տարածաշրջանում լրացուցիչ միջոցներ կիրառել, եթե ամերիկյան անձնակազմի և շահերի պաշտպանության անհրաժեշտություն լինի»,- ասել է Քելլի Քրաֆթը:

Նամակում ԱՄՆ-ի ներկայացուցիչը նաև արդարացնում է իրանցի գեներալ Ղասեմ Սոլեյմանիի սպանությունը՝ հղում անելով ՄԱԿ-ի կանոնադրության 51-րդ հոդվածին, համաձայն որի՝ երկրները պարտավորվում են անմիջապես զեկուցել Անվտանգության խորհրդի 15 անդամներին՝ ինքնապաշտպանություն իրականացնելու իրենց իրավունքը կիրառելու մասին:

Իրանը նույնպես վկայակոչել էր ՄԱԿ-ի կանոնադրության 51-րդ հոդվածը՝ արդարացնելով Իրաքում ամերիկյան ռազմաբազաների վրա հարձակումը: Ինչ վերաբերում է բանակցություններ վարելու Վաշինգտոնի առաջարկին՝ Թեհրանը մերժել է այն:

Իրանական IRNA լրատվական գործակալությանը տված հարցազրույցում ՄԱԿ-ում Իրանի մշտական ներկայացուցիչ Մաջիդ Թահթ-Ռավանչին հայտարարել է, որ ԱՄՆ-ի համագործակցության առաջարկը Իրանին չի մոլորեցնի, և Թեհրանը չի կարող ընդունել այն:

«Քանի դեռ ԱՄՆ-ը շարունակում է հարաբերություններում թշնամանք տարածել, բանակցություններն իմաստ չունեն: Վաշինգտոնն Իրանի դեմ բազմաթիվ պատժամիջոցներ է սահմանել, որոնք կարելի է դիտարկել որպես տնտեսական ահաբեկչություն»,- ասել է Թահթ-Ռավանչին:

ԱՄՆ նախագահի վարչակազմի ռազմավարությունը և Ղասեմ Սոլեյմանիի սպանության որոշումը մտահոգություններ է առաջացրել ամերիկացի օրենսդիրների շրջանում: ԱՄՆ-ի Կոնգրեսի ներկայացուցիչների պալատն օրինագիծ է քննարկելու, որը նախատեսում է սահմանափակել ԱՄՆ նախագահ Դոնալդ Թրամփի լիազորությունները՝ կապված Իրանի նկատմամբ ռազմական գործողություններ իրականացնելու հետ:

Թրամփի կուսակից հանրապետականները Սոլեյմանիի սպանությունը բնութագրում են որպես անհրաժեշտ քայլ երկրի ազգային անվտանգության համար, մինչդեռ դեմոկրատները դա համարում են պատերազմի հրահրում և ցանկանում են զսպել Թրամփի հետագա հնարավոր ռազմական գործողությունները:

Ի դեպ, Մերձավոր Արևելքում տիրող իրավիճակին առաջին անգամ անդրադարձել է Հռոմի Ֆրանցիսկոս պապը: Նա Միացյալ Նահանգներին և Իրանին երկխոսության և զսպվածության կոչ է արել:

Հիշեցնենք, որ Իսլամական հեղափոխության պահապանների կորպուսի «Ղոդս» հատուկ ստորաբաժանման հրամանատար, գեներալ Ղասեմ Սոլեյմանին և նրան ուղեկցող մի քանի այլ անձինք սպանվել էին հունվարի 3-ին ԱՄՆ նախագահ Դոնալդ Թրամփի հրամանով տեղի ունեցած հրթիռակոծության հետևանքով:

Ի պատասխան այս հարձակման՝ Թեհրանը հրթիռակոծել էր Իրաքում գտնվող ամերիկյան 2 ռազմաբազա: Այս հարձակման հետևանքով ամերիկյան կողմում զոհեր և վիրավորներ չեն եղել: Իրանի գերագույն առաջնորդ այաթոլլա Ալի Խամենեին ամերիկյան բազաների հրթիռակոծությունն անվանել էր «ընդամենը ապտակ»: