Ավտոմաքսատան հերթերից հետո Գյումրիին հարակից գյուղի տարածքում աղբակույտեր են գոյացել

Գյումրիի ավտոմաքսատանը մեքենաների հերթը պակասել է: Ինչպես մաքսավորները կանխատեսում էին, 2020թ. հունվարի 1-ից, մաքսազերծման վճարների բարձրացմամբ, ներմուծվող մեքենաների քանակը պակասել է:

Հիշեցնենեք, մինչև դեկտեմբերի 31-ը մեքենաների հսկայական հերթեր էին, որոնք ձգվում էին քաղաքից դուրս` դեպի Շիրակ և Ջաջուռ գյուղերը: Հերթեր այլևս չկան, մնացել են դրանց հետևանքները: Մի քանի օրերի ընթացքում վարորդները քաղաքամերձ տարածքում հասցրել են աղբ կուտակել: Սրան գումարվել է նաև դեպի գյուղեր տանող ճանապարհներին տոնական օրերին աղբահանության բացակայությունը:

Գյումրի-Վանաձոր ճանապարհի առանձին հատվածներ աղբանոցի են վերածվել:

Քաղաքի ծայրամասում դեպի Գյումրի-Վանաձոր մայրուղին վիճակն այսպիսին էր մինչև դեկտեմբերի 31-ը: Ավտոմաքսատան հերթը քաղաքի տարածքից դուրս էր բերվել, ուղղվել դեպի մայրուղի: Օրեր առաջ եղած հերթից տարածքում մնացել են աղբակույտեր: Մաքսազերծման սպասող վարորդները իրենց հետևում թողել են պլաստիկե շշեր, տոպրակներ, միանգամյա օգտագործման սպասք, այն ամենը, ինչ օգտագործել են հերթում սպասելիս:

«Ճանապարհի ամբողջ երկայնքով` մոտ 5 կմ հատվածում, ամբողջ երկայնքով աղբ է թափված: Մինչև դեկտեմբերի 31-ն է թափվել, հետո էլ Ամանոր էր, տոնական օրերին չի մաքրվել: Միայն սա չէ խնդիրը: Ավտոմաքսատունը հասկանալի էր, մի քանի օր էր հերթը, բայց գյուղի տարածքում շինաղբ է թափվում քաղաքից բերված: Քաղաքին մոտ լինելու բացասական հետևանքը սա է, որ քաղաքից բերում են, մտածում են` գյուղ է, թափում ու հեռանում են»,- SHANTNEWS.am-ի հետ զրույցում ասել է Շիրակ գյուղի վարչական ղեկավար Համլետ Ասատրյանը:

Տոնական օրերին էլ տարածքը չի մաքրվել, քամին էլ ճամփեզրից աղբը հասցրել է դաշտեր: Գյուղեր տանող ճանապարհներին խնդիրը մշտական է ու կրկնվող: Հիմնականում քաղաքին մոտ գտնվող գյուղերի հարակից տարածքներում ոչ միայն կենցաղային, այլև շինարարական աղբի կուտակումներ են:

Քաղաքից ու հավանաբար հարևան համայնքներից աղբը թափվում է ճամփեզրի բաց տարածքներում, իսկ մաքրելու պարտավորությունը տվյալ գյուղի գյուղապետինն է: Ճանապարհամերձ տարածքներում տարին մի քանի անգամ են մաքրման աշխատանքներ կատարում: Տեղական բյուջեներում գյուղապետարանները աղբահանության համար գումարների հատկացում առանձին հոդվածով չեն նախատեսում:

Շիրակ գյուղը Մարմաշեն խոշորացված համայնքի կազմում է: Մարմաշենի 15 գյուղում աղբահանությունը մեկ կազմակերպություն է իրականացնում` 3 օրը մեկ անգամ: Գյուղերում աղբամանները տոնական օրերին դատարկել են, իսկ ճանապարհամերձ հատվածներում աղբը մնացել է: Բաց տարածքները մաքրելու պարտավորություն ընկերությունը չունի: Պարկերով կուտակված շինաղբը մաքրելու տարբերակ գյուղապետարանն է գտնելու:

«Ճանապարհը սպասարկող ընկերությունները ևս մաքրում են ճանապարհի եզրերը: Կտեսնենք, թե ինչքան մասն են իրենք մաքրելու, մնացածն էլ մենք ենք անելու, որ այս խնդիրը լուծենք»,- SHANTNEWS.am-ի հետ զրույցում ասել է Շիրակ գյուղի վարչական ղեկավարը:

Աշխատանքային օրերը  նոր են սկսվել: Ճանշինի աշխատակիցների հետ գյուղապետը պայմանավորվելու է ու աշխատանքի բաժանում են կատարելու: Մաքրելուց հետո էլ երաշխիք չունեն, որ աղբակույտեր ճանապարհին դարձյալ չեն հայտնվի: