2017-ի 9 ամիսներին 13,500 մարդ ՀՀ-ից մեկնել ու չի վերադարձել. ԱՎԾ

Ազգային վիճակագրական ծառայությունը դեկտեմբերի 5-ին հրապարակել է «Հայաստանի սոցիալական պատկերն ու աղքատությունը 2017» զեկույցը: Այս զեկույցում նաև ներկայացված են 2013-2016 թվականների միգրացիոն ցուցանիշները, ըստ որոնց, տնային տնտեսությունների (տ/տ) 24.9 %-ը 2013-2016 թվականներին ներգրավված են եղել արտաքին և ներքին միգրացիոն գործընթացներում, որոնցում ներառված են տնային տնտեսությունների 15 և բարձր տարիքի անդամների 10.8%-ը:

Այս մասին հայտնում է «Առավոտ» օրաթերթը: Զեկույցի համաձայն՝ միգրացիոն գործընթացներում այդ տարիներին ներգրավված տղամարդկանց 76.0%-ը վերադարձել է, սակայն չվերադարձած տղամարդկանց թիվն ավելի շատ է, այն կազմում է 88.1 %:

Միգրացիոն գործընթացներում ներգրաված կանանցից 24.0%-ը վերադարձել է տուն, իսկ չվերադարձածները՝ 11.9% է: Քաղաքային բնակիչների 65.8%-ն է վերադարձել, չեն վերադարձել 49.7%-ը, սակայն գյուղական բնակավայրերի վերադարձածների քանակն ավելի բարձր է:

Ըստ զեկույցի, միգրացիոն գործընթացներում ներգրավված գյուղացիների 50.3%-ը չի վերադարձել, վերադարձել է 34.2%-ը: Ուսումնասիրված ժամանակահատվածում միգրացիոն գործընթացներում ներգրավված 15 և բարձր տարիքի անձանց 55.9%-ը (շուրջ 155 հազար մարդ) 2016 թվականի դրությամբ դեռևս բացակայել են իրենց մշտական բնակության վայրից, եւ գտնվել են Հայաստանի տարբեր մարզերում, կամ այլ երկրում: 2013-2016 թվականներին արտաքին և ներքին միգրացիոն տեղաշարժերում ընդգրկված 15 և բարձր տարիքի անձանց 12.0%-ի տեղաշարժերը 2016 թվականի դրությամբ եղել են ներհանրապետական, 11.6%-ը` ԼՂՀ են մեկնել, իսկ մնացած 76.4%-ը` միջպետական, որի գերակշիռ մեծամասնությունը` 89.8%-ը Ռուսաստանի Դաշնություն է մեկնել:

2013-2016-ին 3 ամիսից ավելի տևողությամբ արտաքին միգրացիոն գործընթացներում (առանց ներհանրապետական տեղաշարժերի) ներգրավված և 2016-ի դրությամբ դեռևս արտերկրից չվերադարձած անձանց շուրջ 55%-ի Հայաստանից բացակայելու տեւողությունը եղել է 3-12 ամիս, իսկ 45 %-ինը` 1 տարի և ավելի: 2013-2016թվականներին իրենց մշտական բնակավայրից բացակայած՝ մեկնած և 2016-ի դրությամբ դեռևս չվերադարձած 15 և բարձր տարիքի անձանց 17.0%-ի բացակայության տևողությունը հաշվետու ժամանակաշրջանի դրությամբ կազմել է՝ 3 ամիս և պակաս, 45.2%-ինը՝ 4-12 ամիս, իսկ 37.8%-ինը՝ մեկ տարի և ավելի:

Ուսումնասիրվող ժամանակահատվածում արտաքին միգրանտները կազմել են (հաշվառման ժամանակ) երկրից 3 ամիս և ավելի ժամկետով բացակայածների՝ չվերադարձածների շուրջ 90%-ը՝ մոտ 95 000 մարդ, իսկ երկարաժամկետ միգրանտները կազմել են 46%:

Հետազոտության արդյունքներով արձանագրվել է, որ 2013-2016-ին 3 ամիս ևւ ավելի տեւողությամբ ՀՀ-ից մեկնած և 2016-ին դեռևս չվերադարձած 15 և բարձր տարիքի միգրանտների միջին տարեկան թվաքանակը կազմել է շուրջ 24 000 հազար մարդ: ԱՎԾ-ի հրապարակած ՀՀ սոցիալ-տնտեսական վիճակը 2017 թվականի հունվար-սեպտեմբերին ցուցանիշների համաձայն ժողովրդագրական իրավիճակը հատվածում նշված է՝ 2015 թվականին ՀՀ բնակչությունը տարեսկզբին կազմել է 3 միլիոն 10 հազար 600 մարդ, 2016-ին՝ 2 միլիոն 998 հազար 600 մարդ, 2017-ի տարեսկզբին՝ 2 միլիոն 986 հազար 100 մարդ:

2017 թվականի հոկտեմբերի 1-ի դրությամբ բնակչության թվաքանակը կազմել է 2 միլիոն 979 հազար 600, այսինքն՝ 2017-ի հոկտեմբերի 1-ի դրությամբ ՀՀ մշտական բնակչության թվաքանակը նվազել է 6500 մարդով: Սա հաշվարկվել է բնակչության բնական հավելաճով և միգրացիայով: Ըստ այդմ՝ 2017-ի հունվար-սեպտեմբերին բնակչության հավելաճը կազմել է 7000 մարդ, իսկ միգրացիայի բացասական ցուցանիշը կազմել է 13 հազար 500 մարդ, այսինքն՝ 13 հազար 500 ՀՀ քաղաքացի մեկնել է և չի վերադարձել: Այս ամենի արդյունքում այս տարվա սեպտեմբերի 1-ի դրությամբ, 9 ամիսների ընթացքում ՀՀ մշտական բնակչության քանակը նվազել է 6500 մարդով: