Գյումրիի համայնքային գույքի անհետացումն ուսումնասիրում է Շիրակի մարզի դատախազությունը

Գյումրիի քաղաքապետարանի հաշվեկշռից դուրս է գրվել 35 անուն գույք: Այս հրաժարումների մասին կա ավագանու համապատասխան որոշում:  Այն շենք-շինություններն են, որոնք տարբեր տարիներին օտարվել են, բայց շարունակել են գտնվել քաղաքապետարանի հաշվեկշռում: Գույքի մի խումբն էլ տարիներ շարունակ էլի հաշվեկշռում է եղել, բայց պարզվել է, որ ընդհանրապես գոյություն չունի: Երբ է վերացվել ու օտարվել համայնքապատկան գույքը, ինչու այդ մասին փաստաթղթերը չեն պահպանվել: Այս հարցերն ուսումնասիրում է Շիրակի մարզի դատախազությունը: Դիմում իրավապահներին ներկայացրել է Գյումրիի ավագանու անդամ Լևոն Բարսեղյանը:

Ամեն տարի քաղաքապետարանը համայնքային գույքի ցանկը հաստատում է, որ պարզ լինի, թե ինչքան է քաղաքի ունեցվածքը: Գյումրիի ունեցվածքը ցանկով ավելի շատ է, քան իրականում կա: Այս մասին պարզ դարձավ հոկտեմբերին ավագանու հերթական նիստի ընթացքում, երբ ավագանու հաստատմանը ներկայացվեց 35 անուն գույքը համայնքային հաշվեկշռից դուրս հանելու հարցը: 35 անուն գույքը երեք խմբի են բաժանել, այսինքն՝ 3 առանձին պատճառ կա շենքերը քաղաքի հաշվեկշռից հանելու համար: Գոյություն չունեցող 22 կառույց է քաղաքապետարանի ցանկում առանձնացված: Դրանք  պահակատներ են, կաթսայատներ, ավտոտնակներ և այլ շինություններ:

«Կային շենք-շինություններ, որոնք կրկնվում էին տարբեր հասցեների տակ և տարբեր բովանդակությամբ էին կրկնվում, բայց նույն շենքի մասին էր խոսքը: Կար երկրորդ խումբը գույքի, որը հաշվեկշռում ներառված էր, բայց հաշվառված չէր: Նշված չէր ոչ հասցե, ոչ չափ, ոչ մակերես: Մենք երկար փնտրեցինք ու եկանք այն եզրակացության, որ չկան դրանք: Կամ թյուրիմացությամբ են մտել ցանկի մեջ, կամ ինչ-ինչ պատճառով վերացվել են, չկան: 13 անուն գույք էլ օտարվել է, բայց գտնվում էին մեր հաշվեկշռում: Այդ ցանկում են 2 կաթսայատուն, Մնջոյան փողոցի նախկին ֆուտբոլային դպրոցի շենքը, որի փաստաթղթերը կան, և տրոլեյբուսային վարչության շենքը: Փորձեցինք գտնել տրոլեյբուսային պարկի փաստաթղթերը, չկային: Կադաստրի հետ ճշտեցինք, որ օտարվել է ու գրանցվել կադաստրում»,- SHANTNEWS-ին ասել է Գյումրիի գլխավոր ճարտարապետ Հենրիկ Գասպարյանը:

Գյումրիի երկարամյա գլխավոր ճարտարապետը նախորդ տարիներին գույքագրում լինել-չլինելու և դրանց արդյունքների մասին ոչինչ չհիշեց: Ինչպես նաև տեղյակ չէր, թե ինչպես է ստացվել, որ 13 շենք-շինություններ օտարվել են, բայց մնացել են քաղաքապետարանի հաշվեկշռում: Դրանց օտարման, հանձնման-ընդունման ակտերը քաղաքապետարանում չեն պահպանվել: Ըստ գլխավոր ճարտարապետի` օտարված շենքերի կադաստրային փաստաթղթերը կան, դրանք ճշտել են: Բայց ինչպես է ստացվել, որ համայնքային գույքից մի մաս օտարվել է, իսկ մյուսը` վերացել, ու փաստաթղթեր չկան: Ավագանու անդամը մի քանի հնարավոր տարբերակ է ներկայացնում:

«Եթե փորձենք տրամաբանել, ստացվում է, որ կամ քաղաքային իշխանությունը փոխվելու ժամանակ, երբ պարոն Ղուկասյանին փոխարինել է պարոն Բալասանյանը, պարոն Բալասանյանին հանձնվել է այդ գույքը, ընդունվել է պարոն Բալասանյանի կողմից, և հետո այդ գույքը վերացվել է: Բայց այդ ընթացքում՝ 2012-ից ես եղել եմ Գյումրիի ավագանու անդամ և չեմ հիշում, որ մենք ավագանու որոշմամբ օտարած կամ աճուրդի դրած լինենք այդ գույքը: Մյուս տարբերակը այն է, որ գույքը օտարվել է ավելի վաղ, իսկ ընդունում-հանձնումը չի հսկվել: Դիմել եմ դատախազություն, թող ուսումնասիրեն, պարզեն, որովհետև համայնքից ոչինչ հենց այնպես չպիտի վերանա»,- SHANTNEWS-ի հետ զրույցում ասել է Գյումրիի ավագանու անդամ Լևոն Բարսեղյանը:

Գյումրիի գլխավոր ճարտարապետը նշեց, որ գույքի օտարումը տեղի է ունեցել մինչև 2010 թվականը: Համայնքային գույքի օտարման ու անհետացման հարցը հիմա դատախազությունն է ուսումնասիրում: Քաղաքապետարանից արդեն պահանջել ու ստացել են բոլոր այն փաստաթղթերը, որոնք վերաբերում են նշված գույքին: Ըստ քաղաքապետարանի ցանկի` դրա ընդհանուր արժողությունը կազմում է 90 մլն դրամ: