Գյումրիում վիճակահանությամբ բաշխվել են 11 սոցիալական բնակարաններ

Գյումրիում սոցիալական բնակարանաշինության երրորդ փուլով կառուցվել է 18 բնակարան: Հիշեցնենք, որ «Առդա» բարեգործական հիմնադրամը քաղաքապետարանի հետ համատեղ երրորդ տարին է՝ սոցիալական բնակարանաշինության ծրագիր է իրականցնում: Անի թաղամասի սկզբնամասում գտնվող կիսակառույցների հիմքի վրա 3 տարիների ընթացքում կառուցվել է 3 հարկանի շենք՝ 41 բնակարանով:  Բնակարանների՝ վերջին փուլի վիճակահանությունը տեղի է ունեցել այսօր: Բաշխվել են 18 բնակարաններից 11-ը, քանի որ դիմումատուները քիչ են եղել: Շահառուները հիմնականում միայնակ ծերերն են, ովքեր բնակվում են տնակներում: 2017, 2018 և 2019 թվականների ընթացքում նախկին կիսակառույց հիմքերի վրա 3 հարկանի ու 4 մուտքով շենք կառուցվեց: Վերջին երկու մուտքերի շինարարությունը դեռ ավարտված չէ: Վերջին մանր գործերն են մնացել:

Սոցիալական բնակարանաշինության երրորդ փուլով այս տարի 18 բնակարան է կառուցվել: 18 բնակարանի համար 11 շահառու կա: Առաջին անգամ կառուցված բնակարաններն ավելի շատ են, քան շահառուների դիմումները, որոնք ստացվել են տնակներում ապրող միայնակ ծերերից: Փոխքաղաքապետը սրանով պայմանավորեց այն, որ կառավարությունը հաջորդ տարի Գյումրիում անօթևանության խնդրի լուծման համար հատկացումներ է կատարել, իսկ տնակներում ապրողներն էլ գերադասում են ոչ թե սոցիալական, այլ սեփական բնակարան ունենալ:

«Հաջորդ տարի բյուջեով պետք է բնակարաններ գնվեն: Ըստ էության, մարդիկ գերադասում են սեփական բնակարան ունենալ, քան սոցիալական: Բայց մեր առաջարկած պայմաններն ավելի լավն են: Պետք է մի քիչ թուլացնենք պայմանները, որ դիմումներ ստանանք: Եթե առաջ վիճակահանություն անում էինք, մարդիկ դատարկ թղթեր էին հանում, այս տարի դիմում չեղավ: Հիմա պահանջները պետք է թուլացնենք, որպեսզի 7 բնակարանն էլ բաշխենք»,- Shantnews-ին ասել է «Առդա» բարեգործական հիմնադրամի գործադիր տնօրեն Հրահատ Ստեփանյանը:

Սոցիալական բնակարանների շահառուներին ներկայացվող պահանջները քաղաքապետարանի համապատասխան հանձնաժողովը քննարկելու ու փոփոխելու է հունվարին, իսկ այսօր բաշխված 11 բնակարաններից 8-ը բաժին են հասել մեկ սենյականոցի շահառուներին, 3-ը՝ երկու սենյականոցի: Նրանց թվում էին նաև նախկին տեքստիլ կոմբինատի հանրակացարանի 3 բնակիչները:

Քաղաքապետարանի հետ վերջապես համաձայնության են եկել՝ խիստ վթարային շենքն ազատել սոցիալական բնակարանի դիմաց: Հանրակացարանի երկու բնակիչներին միասին հատկացվելու է երկու սենյականոց բնակարան: Նրանք այսօր ներկա չէին: Բնակարանի ընտրությունը տեղի ունեցավ առանց վիճակահանության: Իսկ հանրակացարանի երրորդ բնակիչը մեկ սենյականոց կստանա: Մեկ սենյականոցի 3 շահառուներ էլ անցած տարվանից են սպասում:

Մասնակցել էին վիճակահանության, բայց բնակարանները չէին բավականացրել: Նրանցից մեկը Սուսաննա Հակոբյանն է: Տարեց չէ, սոցիալական բնակարանի շահառու է ճանաչվել՝ ելնելով նրանից, որ հաշմանդամ է ու տնակում է ապրում: «Առդա» հիմնադրամը բնակարանաշինական ծրագիրն առայժմ այսքանով ավարտված է համարում: Քաղաքապետարանը կրկին կիսակառույցներ է առաջարկում հիմնադրամին, բայց այս անգամ ոչ թե բնակարանների, այլ մանկապարտեզ կառուցելու համար: Հավանական բարերարը, ինչպես գործադիր տնօրենը նշեց, Գյումրիի փեսա է: Ծրագիրը դեռ քննարկման փուլում է: Իսկ սոցիալական բնակարանների շահառուների նկատմամբ հիմնադրամը շարունակում է իր պարտավորությունները՝ փոխհատուցում է նրանց կոմունալ ծախսերը: Այսօրվա վիճակահանության մասնակիցներն իրենց նոր բնակարանները կստանան դեկտեմբերի 25-ին: