Իսրայելի քաղաքական ճգնաժամը և 1 տարում նշանակված 3 արտահերթ ընտրությունները. ինչպե՞ս Իսրայելը բախվեց նման իրավիճակի

Իսրայելի Կնեսետի պատգամավորները 94 կողմ, 0 դեմ ձայնով ինքնալուծարման որոշում են կայացրել: Դա տեղի է ունեցել այն բանից հետո, երբ կոալիցիոն կառավարություն կազմելու բանակցությունները հերթական անգամ ձախողվել են:

Իսրայելի քաղաքացիները կրկին պետք է քվեարկություն կատարեն 2020թ. մարտի 2-ին: Երկրում շարունակվող քաղաքական ճգնաժամը, թերևս, աննախադեպ է. առաջիկա ընտրությունները կլինեն արդեն երրորդը մեկ տարուց պակաս ժամանակահատվածում:

Ինչո՞ւ և ինչպե՞ս Իսրայելը կանգնեց նման իրավիճակի առաջ. մի փոքր հետադարձ հայացք 

2019թ. ապրիլի խորհրդարանական ընտրությունները

Այս տարվա առաջին ընտրությունները տեղի էին ունեցել ապրիլին: Նեթանյահուն ընտրությունների արդյունքները մեծագույն հաղթանակ էր անվանել, և նոր կառավարություն կազմելու մանդատ էր ստացել երկրի նախագահ Ռևեն Ռիվլինից: Մայիսին Նեթանյահուն փորձում էր համաձայնության հասնել և կառավարություն կազմել Իսրայելի նախկին պաշտպանության նախարար Ավիգդոր Լիբերմանի կուսակցության հետ, սակայն զորակոչի վերաբերյալ օրինագծի շուրջ տարաձայնությունների պատճառով հնարավոր չէր եղել կոալիցիա կազմել. խորհրդարանը ցրվել էր, և սեպտեմբերին նոր` արտահերթ խորհրդարանական ընտրություններ էին նշանակվել:

2019-ի սեպտեմբերի խորհրդարանական ընտրությունները

Այս ընտրություններում գործող վարչապետի «Լիկուդ» կուսակցությունը 120 տեղանոց Կնեսետում ստացել էր 32 մանդատ, իսկ նրա գլխավոր հակառակորդ` Իսրայելի պաշտպանության բանակի գլխավոր շտաբի նախկին պետ Բենի Գանցի «Կապույտ և սպիտակ» դաշինքը՝ 33: Իսրայելի նախագահ Ռևեն Ռիվլինը նախ` Նեթանյահուին էր հանձնարարել կոալիցիա կազմել, սակայն դա նրան չէր հաջողվել:

«Քիչ առաջ ես նախագահին տեղեկացրի, որ իրեն եմ վերադարձնում կառավարություն կազմելու մանդատը»,- հայտարարել էր Նեթանյահուն բանակցությունները ձախողելուց հետո:

Այնուհետև Իսրայելի հաջորդ կառավարությունը կազմելու մանդատ ստացավ Բենի Գանցը: Ի դեպ, 2008-ից ի վեր Գանցն առաջինն էր, որ իշխող կոալիցիա կազմելու մանդատ էր ստացել նախագահից, սակայն նրան նույնպես չհաջողվեց կոալիցիա կազմել:

Իսրայելի նախագահ Ռևեն Ռիվլինը կողմերին նաև կոչ էր արել միասնության կառավարություն կազմել, սակայն նրանք համաձայնության չէին եկել այն հարցում, թե ով պետք է զբաղեցնի վարչապետի պաշտոնը:

Այս ձախողումներից հետո Ռիվլինը 21 օր ժամկետ էր տվել Կնեսետին, որպեսզի օրենսդիրները կառավարություն կազմելու համար թեկնածու առաջադրեն պատգամավորների շարքից: Դեկտեմբերի 11-ին այդ վերջնաժամկետն ավարտվել էր, իսկ կառավարություն այդպես էլ չէր կազմվել:

Նեթանյահուի դեմ մեղադրանքները

Այս ամենից զատ, գործող վարչապետ Բենիամին Նեթանյահուի նկատմամբ մեղադրանք է առաջադրվել կոռուպցիայի, լիազորությունների չարաշահման և խարդախության համար: Ըստ մեղադրող կողմի՝ Իսրայելի վարչապետը նվերներ է ստացել հարուստ գործարարներից, բացի դրանից՝ արտոնություններ է տվել որոշ լրատվամիջոցների դրական լուսաբանման դիմաց:

Նեթանյահուն չի ընդունում մեղադրանքները և այս ամենը համարում է հեղաշրջման փորձ: