Գյումրիում նոր ծննդօգնության կենտրոնի կառուցման ծրագիրը` թյուրընկալման առիթ

Գյումրիում ծննդօգնության նոր կենտրոնի կառուցման մասին որոշումն առայժմ աշխատանքների մեկնարկի ու ավարտի ժամկետներ չի սահմանում, բայց արդեն հասցրել է արձագանքներ ստանալ ոչ միայն որպես նոր ներդրումային ծրագիր: Նոր ծննդօգնության կենտրոնի կառուցման մասին հրապարակումների ալիքը այլ ազդեցություն է ունեցել, ու դարձյալ ակտիվացել են լուրերն այն մասին, որ Գյումրիի ծննդատունը լուծարվել է:

Ծննդատան բուժանձնակազմը պարզաբանում է` փակվելու, լուծարվելու մասին որոշում չկա, թեկուզ թերի ծանրաբեռնվածությամբ շարունակում են աշխատել, բայց թյուրընկալման վատ հետևանքը այս մի քանի օրերին ավելի նկատելի է ՝ դիմելիությունը նվազել է:

«Գալիս են հիվանդները ու մեզ հարցնում, թե հաջորդ այցը որտեղ են գալու, հարցնում են` դուք լուծարվե՞լ եք, որտե՞ղ եք շարունակելու աշխատանքը: Երբ իրենց հարցնում ես, թե ինչից եք որոշել, որ ծննդատունը լուծարվում է, ասում են` լուրեր են շրջանառվում»,- SHANTNEWS.am-ի հետ զրույցում ասել են ծննդատան բուժաշխատողները:

Իսկ Գյումրիի ծննդատան տնօրենը նշել է, որ իրենց հաշվառված հիվանդներն են զանգահարում ու հետաքրքրվում բուժհաստատության հետագա ճակատագրով.

«Նույնիսկ մեզ մոտ` կանանց կոնսուլտացիայում գրանցված կանայք են զարմանքով զանգում, հարցնում, թե  հիմա որտեղ գանք, ասում ենք` եկեք Գյումրիի ծննդատուն, քանի որ առայժմ ոչ մի փոփոխութուն չկա»,- նշել է Գյումրիի ծննդատան տնօրեն Էդգար Սուքիասյանը:

Հիվանդներին ու ծննդկաններին բացատրել են, որ ծննդատունը շարունակում է աշխատել: Փոփոխություններ լինելու են, բայց միայն նոր ծննդօգնության կենտրոն ունենալուց հետո: Ապագա կենտրոնի գործառույթների մասին քննարկումները նախարարությունում են եղել: Կա որոշում, որը վերաբերում է ոչ միայն Գյումրիի ծննդատանը, այլև Գյումրիի Մոր ու մանկան ավստրիական հիվանդանոցի ծննդաբերական բաժանմունքին:

«Գյումրիում 2 ծննդօգնություն իրականացնող հաստատություն ունենք` Գյումրիի ծննդատունը և Մոր ու մանկան ավստրիական հիվանդանոցի ծննդաբերական բաժանմունքը: Որոշում  է կայացվել նոր կառուցվող շենքում տեղակայել այս 2 ծառայությունները, բայց մինչ շենքի կառուցումը, մինչ միավորումը յուրաքանչյուրն իր տեղում շարունակելու է իր գործունեությունը»,- SHANTNEWS.am-ին հայտնել է Շիրակի մարզպետարանի առողջապահության բաժնի պետ Լեյլի Ասլանյանը:

Սա նշանակում է, որ ծննդատունն ու մանկական հիվանդանոցի ծննդաբերական բաժանմունքը կմիավորվեն, երբ նոր կենտրոնը կառուցված կլինի: Միավորման ամենակարևոր հարցի պատասխանն էլ առողջապահության վարչությունում ունեն՝ նախատեսված է 40 մահճակալ հզորություն:

Առողջապահության բաժնի պետն այսքանն ասելուց հետո շեշտեց` որոշումները միայն բանավոր են, քանի դեռ նոր շենքը կառուցված չէ: Գյումրիի ծննդատան տանիքը վերանորոգելու և բաժանմունքների վերազինման խնդրանքները անպատասխան են մնում վերջին մի քանի տարիներին:

Ծնունդների քիչ թիվը հանգեցրեց քիչ ֆինանսավորման, շենքի պահպանության ծախսերի համար գումար չմնաց: Փոխարենը ծննդատան պարտքերն են ավելանում: Պարտքի չափը հասել է 70 մլն դրամի: Մարզպետարանում ու առողջապահության նախարարությունում Գյումրիի ծննդատան պարտքերի հարցի քննարկումը շարունակական ու անսպառ թեմա է, բայց տարբերակներ չեն գտնում:

Ըստ այդմ էլ լուծումը, առողջապահության բաժնի պետի խոսքով, միավորումն է: Գյումրիում ծննդօգնություն իրականացնող երկու հաստատություններն էլ ունեն հավասար` 30 մահճակալ հզորություն, բայց երկուսն էլ աշխատում են թերբեռնված: Նոր կենտրոնի կառուցման համար առայժմ միայն հողհատկացումն է կատարված, և ծրագրի ժամկետների մասին ոչինչ հայտնի չէ: