Սպանողը Բիլյանը չի, պատահական կրակել է Էդվարդը. ո՞վ սպանեց ոստիկանին ՊՊԾ գնդում

ՊՊԾ գնդի գրավման գործով Պավել Մանուկյանի, Վարուժան Ավետիսյանի և մյուսների դատաքննությունը հասել է ամբաստանյալների հարցաքննության փուլ: Այսօր ցուցմունք է տվել ամբաստանյալ Պավել Մանուկյանը: Բայց մինչ այդ, դատարանը հրապարակել է խմբի անդամներից մի քանիսի պաշտպաններ Մուշեղ Շուշանյանի ու Տիգրան Եգորյանի՝ դատարանին  ուղարկած գրավոր միջնորդությունը նիստը հետաձգելու խնդրանքով: Եգորյանն ու Շուշանյանը  բավարար ժամանակ  են խնդրել՝ հարցաքննված տուժողների և վկաների ցուցմունքները վերլուծելու համար, իրենց պաշտպանյալների պատշաճ պաշտպանությունն իրականացնելու համար: Դատավոր Մեսրոպ Մակյանը ճշտեց.

«Ի՞նչ է նշանակում «բավարար ժամանակ»: Դատարանը  մեկ ամիս առաջ Տիգրան Եգորյանին իր խնդրանքով ուղարկել է նիստերի արձանագրությունների կրիչները, մինչդեռ հիմա պարոն Եգորյանը նորից ժամանակ է խնդրում՝ չհստակեցնելով, թե որքան»: Վարուժան Ավետիսյանը պարզաբանեց. «Կարծում եմ՝ առնվազն երեք  շաբաթ: Հսկայական նյութ է, չեն հասցնում ծանոթանալ»:

Մեղադրող Պետրոս Պետրոսյանը կարծիք հայտնեց, որ  փաստաբանները պարտավոր են իրենց ծանրաբեռնվածությունը ստանձնել այնպես, որ որևէ պաշտպանյալ չտուժի:

5 րոպե պաշտպան Զարուհի Փոստանջյանի հետ  խորհրդակցելուց  հետո Պավել Մանուկյանը որոշեց ցուցմունք տալ: Դատարանը արձանագրեց՝ մյուս ամբաստանյալներին հարցաքննելը Շուշանյանի և Եգորյանի պաշտպանյալների իրավունքները չի ոտնահարում.

«Հակասություններ կարող են և չառաջանալ: Եթե առաջանան, մյուս մեղադրյալներն այս պահին ունեն պաշտպաններ: Եթե առաջիկա նիստերում Եգորյանն ու Շուշանյանը կներկայանան և  հարցեր կունենան Պավել Մանուկյանին, կարող են ուղղել դրանք»,- ասաց Մեսրոպ Մակյանը:

«Մեկ տարի երկու ամիս առաջ ցուցմունք  եմ տվել. ես պնդում եմ իմ ցուցմունքը` սպանողը Բիլյան Արմենը չի, կրակողը Արմեն Բիլյանը չի:  Բիլյանը եղել է անցագրային կետի մոտ, դա բացարձակ ճշմարտություն է: Այլ ասելիք չունեմ»,- ասաց Պավել Մանուկյանն իր ցուցմունքում:

Նա հրաժարվեց պատասխանել պետական մեղադրողի հարցերին: Մեղադրող Պետրոս Պետրոսյանն ասաց, որ ավելի քան 35 հարց էին պատրաստել, սակայն ամբաստանյալը չի պատասխանում ոչ մեկին:

Հիշեցնենք  Արմեն Բիլյանը մեղադրվում է ոստիկանության  ավագ ենթասպա Գագիկ Մկրտչյանի սպանության համար:

Պատասխանելով ոստիկանի այրու` Հասմիկ Ոսկանյանի հարցին, թե ո՞վ է կրակել Գագիկ Մկրտչյանի վրա, Պավել Մանուկյանն ասաց.

« Այդ պատահական կրակոցը եղել է Էդվարդ Գրիգորյանի կողմից: Ուղղակի վիրավորվել է նաև Արմեն Լամբարյանը` ռիկոշետից: Ուղղակի բզել են, կրակոց է հնչել»,- ասաց Մանուկյանը:

Նա  չհիշեց, թե քանի հոգի է եղել սենյակում, երբ հնչել է կրակոցը:  Պետական մեղադրող Պետրոս  Պետրոսյանը հիշեցրեց, որ դատարանում Արմեն  Լամբարյանն ասել է, որ ինքը հերթապահ մասում չի եղել, որտեղ հնչել է կրակոցը:

Պավել Մանուկյանը պատասխանեց տուժողի իրավահաջորդ Հասմիկ Ոսկանյանի հարցերին: Ասաց, որ կրակոցի ժամանակ եղել է սենյակում, Էդվարդ Գրիգորյանի կողքին: Բիլյանը եղել է զորամասի հատվածում: Արայիկ Խանդոյանը ևս  եղել է իրենց  հետ: Հարցին, թե ինչպե՞ս է հնչել կրակոցը, Պավել Մանուկյանը պատմեց.

«Լրիվ պատահական է եղել, Էդվարդն ուղղակի բզեց… մենք նրան (Գագիկ Մկրտչյանին-խմբ․) օգնել ենք, վիրավոր մասը կապել, ինքն իր ոտքով հասել է մուտքի մոտ: Էդվարդն իրեն շատ վատ զգաց: Բոլորս զայրացել էինք»:

«Լավ, ընդունում եմ, միամիտ կրակեց, բայց եթե այդքան անփորձ էին, ինչո՞ւ էիք նրանց ձեզ հետ տարել հեղափոխություն անելու: Ես չեմ անիծում, Աստծո հույսին եմ թողնում, իսկ Աստված հերթով իրականությունն է տալիս: Անկախ ամեն ինչից՝ մարդու կյանք եք խլել, ձեր պատճառով որդուս վիզը ծուռ է: Հազա՜ր ամոթ, եթե պատահական է եղել: Պատահական չի եղել այդ կրակոցը, բանալին չտալու համար բա կրակո՞ւմ են: Տարիուկես նստելուց հետո՞ հիշեցիք, որ Բիլյանը չի, Էդվարդն է: Վաղը կարո՞ղ է քնեք-արթնանաք, ասեք՝ Բիլյանը չի, Վարուժանն է»,- զայրացած ասաց Հասմիկ Ոսկանյանը: