Շիրակի մարզի Սարատակ գյուղի թրաշուշանի դաշտերը չորացել են

Այս տարի Շիրակի մարզի 52 գյուղերում կարկտահարության վնասները կազմում են շուրջ 3 մլրդ դրամ: Ընդ որում, կարկտահարված դաշտերը հետո նաև երաշտից են տուժել: Մարզի ջրամբարներում կուտակված ջուրը չի բավարարել պահանջարկը: Օրինակը Արթիկի տարածաշրջանի Սարատակ գյուղում է: Ոռոգման սեզոնին ընդամենը մեկ անգամ է ջուրը գյուղ հասել, որի հետևանքով չորացել են կարտոֆիլի, բանջարաբոստանային մշակաբույսերի և թրաշուշանի դաշտերը:

Արթիկի տարածաշրջանը միակն է մարզում, որտեղ գյուղացիները ծաղկի մշակումով են զբաղվում: Ծաղկի դաշտերը կարկտահարությունից ու երաշտից տուժել են 100 տոկոսով: Սա համապատասխան հանձնաժողովն է հաշվարկել, բայց փոխհատուցվող գյուղերի ցանկում Սարատակը չի ընդգրկվել:

Սպիտակ, կարմիր ու վարդագույն… տարվա այս եղանակին Սարատակի դաշտերը սովորաբար այս գույներով են ներկվում: Մի քանի հեկտար ձգվող թրաշուշանի դաշտերում ծաղկաքաղը ձգվում է մինչև հոկտեմբերի վերջ: Բայց այս տարի դաշտերում ծաղիկները հատուկենտ են: Ցանել են, մշակել, բայց ոռոգման սեզոնին ջրել չեն կարողացել, ծաղիկների փոխարեն հիմա միայն չորացած ցողուններն են դաշտերում:

Ծաղկի մշակությամբ Սարատակում 6 ֆերմերային տնտեսություն է զբաղվում: 3 հեկտարից ավելի դաշտերը ոռոգման սեզոնին ընդամենը մեկ, լավագույն դեպքում երկու անգամ են կարողացել դաշտերը ջրել հունիս և հուլիս ամիսներին: Օգոստոսին արդեն ջրամբարում բավարար քանակության ջուր չի եղել: Ոռոգման ջուր Վարդաքարի ջրամբարից բաց չեն թողնում արդեն երկու ամիս: Հիմնավորումը մեկն է՝ ջրամբարում մեռյալ ծավալի ջուր կա, որն անհրաժեշտ է պահպանել բնապահպանական նկատառումներով:

«Ջրի քիչ լինելը այնպես չէ, որ ինչ-որ մեկի ցանկությունն էր: Այս տարի երաշտ էր, ջրամբարում ջուր չկար: Մեկ անգամ ջրեց ժողովուրդը, երկրորդ ջուր չկարողացան անել: Մեր գյուղում կարկտահարությունից 100 %-ով տուժել էին նաև ցորենի ցանքերը, ծաղկի դաշտերը, 80%-ով էլ՝ կարտոֆիլը: Հանձնաժողովն արձանագրեց, բայց աջակցության գումարներ մենք չենք ստացել: Կարևորն այն է, որ արձանագրել են 100% վնաս, բայց հետո ես գնացի մարզպետարան, ակտի մեջ նայեցի, որ գրված էր 70%»,- SHANTNEWS-ին ասել է Սարատակի գյուղապետ Միշա Ղրզոյանը:

Սարատակի կարկտահարության վնասները բարձր են, տարբեր մշակաբույսերի վնասները տարբեր են եղել: Սա նշում է գյուղվարչության պետը: Բայց. ըստ նրա, փոխհատուցում ստացողների ցանկում հայտնվել են հունիսի 27-ի ամենաուժեղ կարկտից տուժած գյուղերը:

«Սարատակ գյուղի վնասները բավական բարձր են: Սա կա արձանագրված, բայց խնդիրը դրանում չէ: Իրենց աջակցություն չի ցուցաբերվել միայն այն պատճառով, որ Կարմիր Խաչի որոշումով ընտրվել են այն գյուղերը, որոնք կարկուտից վնասներ կրել են հունիսի 27-ին, իսկ Սարատակում կարկտահարություն եղել է հունիսի 24-ին»,- SHANTNEWS-ին ասել է Շիրակի մարզպետարանի գյուղատնտեսության վարչության պետ Մովսես Մանուկյանը:

Բացի Կարմիր խաչի աջակցությունից, այլ փոխհատուցում առայժմ չկա: Այս տարի Շիրակի մարզում 8 անգամ է կարկտահարություն եղել, իսկ Կարմիր խաչն ընտրել է կոնկրետ մեկ օրվա տուժածներին: Հունիսի 24-ին ոչ միայն Սարատակը, այլև հարևան Հոռոմն ու Լուսակերտն են տուժել: Բոլոր 3 գյուղերն էլ փոխհատուցվողների ցանկում չեն: