«Հայանտառ» ՊՈԱԿ-Ը կենթարկվի բնապահպանության նախարարությանը

Այսօր կառավարության նիստում  քննարկվեց  անտառային ոլորտի բարեփոխումների հայեցակարգը, ռազմավարությունը և միջոցառումների ցանկը: Գյուղատնտեսության նախարար Իգնատի Առաքելյանը նշեց, որ հայեցակարգի ընդունումը  պայմանավորված է անտառային ռեսուրսների անտառածածկի վերականգնման, անտառների տնտեսական, սոցիալական, բնապահպանական նշանակության գործունեության պահպանմանը:

Հայեցակարգի համաձայն՝ «Հայանտառ» ՊՈԱԿ-ը կվերակազմավորվի կոմիտեի՝ տեղափոխվելով բնապահպանության նախարարության ենթակայության ներքո՝ հաշվի առնելով, որ անտառներն այսօր ավելի շատ բնապահպանական նշանակություն ունեն: Նախարարի խոսքով`այս փոփոխությունը չի նշանակում, որ անտառների հետ կապված գյուղատնտեսական ծրագրեր չեն իրականացվելու, այնուամենայնիվ, ճիշտ կլինի, որ բնապահպանության ենթակայության ներքո գործի:

Վարչապետը դիմեց բնապահպանության նախարար Արծվիկ Մինասյանին.

«Պարո’ն Մինասյան, մենք ձեզանից ակնկալում ենք, որ շատ արագ պետք է ձևակերպեք քվոտաները: Այն լիմիտները, որոնք տրամադրում ենք, շատ ավելի ցածր են, քան շուկայում առկա քանակը: Այդ գործողությունները պետք է լեգալիզացնենք, ռեսուրսներն ուղղենք անտառների պահպանմանը: Որքա՞ն ժամանակ է պետք, որ այդ ամեն ինչը ֆորմալիզացնենք»:

Արծվիկ Մինասյանը նշեց, որ այդ ռեֆորմի արդյունքում լրացուցիչ հաստիքի հարց չի առաջանա, համատեղ կաշխատեն գյուղնախարարության հետ:

«Ինչ վերաբերում է Ձեր հանձնարարականին, ապա ֆորմալ առումով իրավական տեսանկյունից դեռևս պետք է աշխատենք գյուղատնտեսության նախարարության հետ»,- ասաց նա:

Բնապահպանությանը նախարարը  խոստացավ  2018 թվականի չափաքանակների մասին  արդյունքներ  ներկայացնել  10 օրվա ընթացքում:

Վարչապետը շարունակեց.

«Ամբողջն ասում եք, բիզնեսով զբաղվողներին հստակ կանոնները դնում եք, կանոնները դնում եք տրամաբանական չափերի մեջ, կանոնների խախտումների նկատմամբ մաքսիմալ կոշտ վերաբերմունք, 10 օր պայմանավորվեցինք»:

Նախարարը տեղեկացրեց նաև, որ ռեֆորմները նախատեսված է ավարտել երեք տարվա ընթացքում, իսկ մինչ այս տարվա ավարտը ցանկանում են կառուցվածքային փոփոխություններն իրականացնել: 

«Պարոն Մինասյան, երեք տարվա ռեֆորմը նշանակում է՝ ռեֆորմ չի լինի, այդպիսի ռեֆորմ չկա, որ երեք տարի է տևում»,- ասաց վարչապետը, իսկ նախարարը պատասխանեց, որ նկատի ունեն տեսլականը, որը իրականություն է դառնալու ըստ հայեցակարգի: