Արտաքին աշխարհին կուռ ու միասնական ներկայանալու խնդիր ունենք. ԱՄՆ համայնքը՝ վարչապետի այցին ընդառաջ

Վերջերս ԱՄՆ-ում կազմավորվել է «Արևմտյան Ամերիկայի  համահայկական խորհուրդ» անունով կազմակերպություն, որը, ըստ ամերիկահայ ազգային գործիչ Վիգեն Հովսեփյանի, ամերիկահայ համայնքի ուժերը հավաքագրելու նպատակ ունի: «Ամերիկայի համահայկական խորհրդի» մեջ միավորվել են ամերիկահայ համայնքի բոլոր խոշոր կազմակերպությունները՝ այսուհետև ամերիկահայության խնդիրների շուրջ միասնական և համակարգված գործունեություն ծավալելու համար:

SHANTNEWS.am-ի հետ զրույցում Վիգեն Հովսեփյանն ասում է, որ ԱՄՆ-ում բազմաթիվ հայկական կազմակերպություններ կան, որոնցից խոշորներն ու ազդեցիկները, ընդհանրապես, իրարից անկախ էին գործում: Ըստ նրա, նոր խորհուրդն այդ առումով շատ հարցեր պետք է համակարգի և նպատակաուղղի:

Տեղեկացանք, որ արդեն 23 ամերիկահայ խոշորագույն կառույց միացել է այս խորհրդին, և այլ կազմակերպություններ նույնպես միանալու քայլեր են անում:

Մեր զրուցակիցը նշում է, որ «Ամերիկայի համահայկական խորհուրդը» պատրաստվում է պատշաճորեն դիմավորել վարչապետ Նիկոլ Փաշինյանին: Ըստ մեր զրուցակցի՝ այստեղ հարցն ամենևին էլ Փաշինյանի անձը չէ:

«Կարծում եմ, և բոլորս էլ համոզված ենք, որ ՀՀ վարչապետը, ով էլ որ լինի,  պետք է պատշաճ ընդունելության արժանանա, երբ օտար երկիր է այցելում, քանի որ  վարչապետի անձից  ավելի այստեղ խնդրո առարկա են  մեր հայրենիքի և ազգի հեղինակությունն ու արժանապատվությունը: Այստեղ քաղաքական տարակարծությունները ոչ մի դեր չեն խաղում,  քանի որ արտաքին աշխարհին մենք կուռ և միասնական ներկայանալու խնդիր ունենք»,- ասում է ամերիկահայ գործիչ Վիգեն Հովսեփյանը՝ նշելով, որ դա չի նշանակում թե վարչապետից պիտի թաքցնեն ազգային մտահոգությունները:

«Ընդհակառակը, մեր ազգային պարտականությունը պիտի համարենք հանրային աչքից և բամբասանքներից հեռու վարչապետի հետ կիսել մեր մտահոգությունները, առաջարկները, ինչու չէ՝ նաև պահանջները»,- ավելացնում է նա:

SHANTNEWS.am-ին ամերիկահայ ազգային գործիչը ներկայացրեց նաև թավշա հեղափոխությունից հետո ամերիկահայ համայնքի այսօրվա տրամադրությունները.

«Ազգի մեծամասնությունը ողջունել  է հեղափոխությունը, որովհետև ըստ իս փոփոխության ժամը վաղուց հասունացել էր: Նիկոլ Փաշինյանի անձով հմայվածների շարժում չէր այն համահայկական շարժումը, որ հաղթանակով ավարտվեց: Ուստի, իշխանություններն էլ պետք է հասկանան, թե ինչքան կարևոր և ինչքան կենսական է ընդհանուր հայտարարներ ստեղծել իրենց ծրագրերի շուրջ, այնպես, ինչպես ի սկզբանե հաղթանակն են արձանագրել: Ոչ մեկս էլ այնքան կույր չենք՝ տեսնելու թե ինչպիսի ահռելի ճիգեր են հարկավոր Հայաստանում և առհասարակ՝ հայկական իրականության մեջ՝ բարեկարգումները հաջողության հասցնելու համար:  Տասնամյակներով կուտակված խնդիրներ կան, «ծուռ աճած» ծառերը շատ են, սոցիալ-տնտեսական լրջագույն մարտահրավերներ կան, և սրանք կախարդական փայտիկով  լուծվող հարցեր չեն: Հետևաբար, զգուշավոր լավատեսությամբ պետք է հետևել եղածին, համապատասխան հանձնառություն վերցնել՝ ընդհանուր գործին նպաստելու համար, և միաժամանակ ազնվորեն ու տրամաբանական համբերությամբ հորդորել իշխանավորներին, որ որդեգրեն ամենաճիշտ ուղիներն ու չշեղվեն դրանցից»,- այսօրվա տրամադրություններն այսպես ներկայացրեց մեր զրուցակիցը:

Ամերիկահայ գործիչն անդրադարձավ նաև հայ-ամերիկյան հարաբերություններում այսօր քննարկվող բացթողումների մասին խոսակցություններին.

«Առհասարակ, եթե որևէ երկրի հետ  Հայաստանի հետ հարաբերությունների առումով անբավարարության զգացում գոյություն ունի կամ այդպիսի տպավորություն կա, ապա, որպես կանոն,  պատասխանատվությունը բարդվում է  հայկական կողմի վրա:  Իսկ եթե հակառակն է և դրական զարգացումներ են արձանագրվում, ենթադրվում է, որ մյուս կողմի մեծահոգության պատճառով է դա, կամ էլ պարզապես հայերիս շնորհված պարգև է՝ օտար երկրի կողմից… Դա սխալ տպավորություն է… Քաղաքագիտության ամենտարրական հասկացություններից է այն, որ միջպետական հարաբերությունների առանցքը պետական շահերն են: Ուստի, այս դեպքում, ԱՄՆ-ի համար Հայաստանի առումով  հաճախ հակադիր շահեր կան: Մեկ կողմից Հայաստանը դիտվում է ամբողջականորեն և անհույս կերպով ռուսական ազդեցության գոտի, Իրանի կամ այլ Միջին Արևելեան օրակարգի կետերով՝ ԱՄՆ-ի շահերին հակադրվող կողմ: Մյուս կողմից,  ԱՄՆ-ի հայկական համայնքի ներգործության և լոբբիստական ջանքերի շնորհիվ,  Հայաստանն ու հայությունը  դիտվում են որպես նկատելի դերակատար»,–SHANTNEWS.am-ին ասում է ամերիկահայ գործիչը՝ հիշեցնելով, որ ԱՄՆ-ի քաղաքական թատերաբեմի  վրա հայկական ուժը չունի, օրինակ, հրեական ուժի տարողությունն ու հզորությունը, որպեսզի քաղաքականություն թելադրի:

«Սակայն ԱՄն հայկական համայքն ունի օրեցօր զարգացող և կազմակերպվող ուժ, որպեսզի որոշ շեշտադրումներ կատարի և  մեղմացնի ԱՄՆ-ի հավանական կոշտ քայլերը»,- ընդգծում է մեր զրուցակիցը: