Հրաշալի կլինի յուրացնել իտալական ֆուտբոլային փորձը. Հենրիխ Մխիթարյանի հարցազրույցը

Հայաստանի հավաքականի կիսապաշտպան Հենրիխ Մխիթարյանը «Արսենալ»-ից տեղափոխվել է իտալական «Ռոմա»: Մխիթարյանը երեկ ժամանել է Հռոմ և բուժզննում անցել, որից հետո մինչև 2020-ի հունիսի 30-ը նոր ակումբում վարձակալությամբ հանդես գալու պայմանագիր ստորագրել: Հայ ֆուտբոլիստը «Ռոմա» ակումբի կազմում կխաղա 77 համարի մարզաշապիկով: Ակումբի պաշտոնական էջը հրապարակել է Հենրիխ Մխիթարյանի առաջին հարցազրույցը իտալական ակումբի ֆուտբոլիստի կարգավիճակում։

«Սա նոր հնարավորություն է: Սա հիանալի հնարավորություն է կարիերան նոր էջից սկսելու համար: Հատկապես՝ այս ակումբում: Ես գիտեմ, թե այս ակումբն ինչի է ընդունակ, և գիտեմ, որ այն կարող է հասնել ավելիին: Սկզբում ամեն ինչ սկսվեց ասեկոսեներից, հետո մտադրությունները լրջացան: Երբ ես իմացա ստեղծված հնարավորության մասին, մտածեցի և որոշում կայացրի տեղափոխվել «Ռոմա»»,- պատմել է Մխիթարյանը:

Նա նշել է, որ դեռ չի տեսել քաղաքը, բայց գիտե, որ այն զարմանալի քաղաք է:

«Մի քիչ էլ իտալական պատմության մասին գիտեմ»,- ասել է ֆուտբոլիստը:

Մխիթարյանը նկատել է՝ մարզումների հրապարակը, սարքավորումները հրաշալի են. ամեն ինչ արված է, որպեսզի խաղացողը շատ մարզվի և խաղադաշտում դրսևորի լավագույն որակները: Հայ ֆուտբոլիստը կարծում է, որ սկզբում մի քիչ դժվար կլինի. նոր մշակույթ է, նոր երկիր, նոր քաղաք, նոր թիմ, նոր ֆուտբոլային փիլիսոփայություն, նոր խաղընկերներ: Նա, սակայն, խոստանում է՝ ամեն ինչ կանի, որպեսզի շուտ հարմարվի և օգնի թիմակիցներին՝ հասնելու նրան, ինչ իրենցից պահանջվում է:

«Հրաշալի կլինի յուրացնել իտալական ֆուտբոլային փորձը: Ես, իսկապես, փորձում եմ գոլեր խփել, դա ինձ հաճույք է պատճառում: Իհարկե, բացի գոլեր խփելուց, շատ կարևոր է օգնել թիմին հաղթել: Ավելի լավ է օգնել թիմին հաղթել խաղը և գոլ չխփել, քան գոլ խփել և պարտվել: Այս պարագայում ես կանեմ առավելագույնը՝ գոլեր խփելու և թիմին օգնելու հաղթանակի հասնելու համար»,- ասել է նա:

Մխիթարյանը նշել է, որ շատ բան է սովորել իր հետ աշխատած մարզիչներից և կարող է ասել, որ նրանք բոլորն էլ տարբեր են: Ֆուտբոլիստի գնահատմամբ՝ հրաշալի փորձ էր նրանց հետ աշխատելը: Նա, սակայն, նշել է՝ անհամբերությամբ է սպասում Ֆոնսեկայի հետ աշխատելուն:

«Գիտեմ՝ ինչպես է նա խաղում: Հետևում էի, ինչպես էր նա ղեկավարում իմ նախկին թիմը՝ «Դոնեցկի Շախտյորը»: Հուսով եմ՝ նա կարող է փոխանցել իր գաղափարները «Ռոմային» խաղացողներին: Ես դեռ չեմ աշխատել նրա հետ և չգիտեմ նրա մարզումների ու խաղի փիլիսոփայությունը: Այս հարցին ես գուցե կարողանամ պատասխանել մրցաշրջանի վերջում: Կարծում եմ՝ նա ունի լավ գաղափարներ և բավականին խելացի է. դրա համար էլ նա այստեղ է»,- նշել է ֆուտբոլիստը:

Հայ ֆուտբոլիստը խոսել է նաև ազգային հավաքականում հանդես գալու պատասխանատվության մասին:

«Անկեղծ ասած, ես չեմ նայում որքան եմ խաղացել և ինչի եմ հասել: Ամենակարևորն այն է, թե ինչ կարող ես տալ ազգային հավաքականին: Այս դեպքում փորձում եմ ուժերիս սահմաններում անել առավելագույնը: Շատ խաղերում ինձ համար անսովոր դիրքում եմ խաղում, սակայն միշտ հաճույքով եմ խաղում և մեծ պատվով եմ կրում այդ մարզաշապիկը: Ես դեռ չեմ հանդիպել թիմակիցներիս, բայց համոզված եմ, որ նրանք ունեն մեծ նպատակներ: Գիտեմ՝ նրանք կանեն առավելագույնը, և, իհարկե, մենք չենք կարող հասնել նպատակներին՝ առանց մեր երկրպագուների: Պետք է համախմբվենք և միասին հասնենք հաջողության»,- ասել է Մխիթարյանը: