Արթիկի 3-րդ ավագ դպրոցը հիմնանորոգվում է․ աշակերտները դասերը կանցկացնեն Կենցաղի տան մասնաշենքում

Երկու ավագ դպրոցների օպտիմալացումից հետո՝ 2 տարի անց, հիմնանորոգման ծրագիր է սկսվել Արթիկի երրորդ ավագ դպրոցում: Վերակառուցման ծրագիրը ֆինանսավորում է Համաշխարհային բանկը: Որպես ավագ դպրոց այն միակն է Արթիկի տարածաշրջանում, որտեղ աշակերտների թիվը հասնում է 270 -ի: Այս թիվը կրկնապատկվել է լուծարված 7-րդ ավագ դպրոցի աշակերտության տեղափոխության արդյունքում:

2017-ին շենքային վատ պայմանների, վթարայնության պատճառով փակվեց 7-րդ ավագ դպրոցը, որի վերակառուցումը ծախսատար լինելու պատճառաբանությամբ համարվեց ոչ նպատակային, բայց հետո, տիպային դպրոցի շենքը արտադրական նպատակներով օգտագործելու համար օտարվեց անհատ ձեռներեցի:

Որպես տիպային կառույց՝ դպրոցի այս շենքը կառուցվել է 60 տարի առաջ: Արթիկի երրորդ միջնակարգ, իսկ վերջին տարիներին արդեն  ավագ դպրոցն օպտիմալացումից հետո միակն է: 50-ականների կառույցը երկրաշարժի հետևանքով վնասներ է ունեցել, ամրացման աշխատանքներ եղել են, պատերն ամուր են, բայց որպես ավագ դպրոց՝ չուներ պահանջվող պայմանները:

«Մի դասարանից մյուսն անցում էր կատարվում դասարանի միջոցով, որը հարմար չէր, մեկը մյուսին խանգարում էր»,-իրենց պայմաններն է ներկայացրել ավագ դպրոցի տնօրեն Արևիկ Արշակյանը։

Երկու ավագ դպրոցների միավորումը պատճառ դարձավ, որ առաջնային հիմնանորոգման ծրագիրն ընդգրկի այս դպրոցը: Նորից դրսից ու  ներսից ամրացման աշխատանքներ են իրականացվում ամբողջ դպրոցում: Հաշվի առնելով աշակերտների թիվն ու դասարանների հագեցվածությունը՝ փոքր դասասենյակները մեծացնում են՝ միջնապատերն ապամոտնաժելով:

Ըստ նախագծի՝ ավագ դպրոցի հիմնական դասասենյակները կենտրոնացվելու են երկրորդ հարկում: Բոլոր հարկերում ջերմամեկուսացում  ապահովելու համար նաև հին, փայտաշեն առաստաղներն են մոնտաժվում:

Ներքին վերանորոգումներից բացի, շենքի արտաքին տեսքը կենթարկվի ձևափոխությունների: Հին կառույցի վերակառուցմանը զուգահեռ  շինարարը կառուցելու է նոր մասնաշենք: Այն լինելու է ավագ դպրոցի մարզադահլիճը, իսկ նոր մասնաշենքի հարակից տարածքում կստեղծվի ֆուտբոլի դաշտ ու վազքուղիներ:

«Դպրոցի մոտ կառուցվելու է նոր մարզադահլիճ ՝ իր սանհանգույցներով, հանդերձարաններով, գույքի պահեստով ու մարզադաշտով»,- ասում է աշխղեկ Ալիկ Հովհաննիսյանը։

50-ականներին կառուցված տիպային դպրոցը մարզադահլիճ չի էլ ունեցել, ֆիզկուլտուրայի դասերն այսքան տարի պարապել են դասասենյակներում կամ միջոցառումների դահլիճում: Հատկացված տարածքում արդեն հողային աշխատանքներ են իրականացվում:

Հանված սևահողը դպրոցի բակ է տեղափոխվում, հետո օգտագործելու են բարեկարգման, կանաչապատման համար: Շինաշխատանքների ընթացքը կարող է դանդաղել  տարածքում եղած հաստաբուն 3 ծառերի պատճառով: Շինարարին թույլ չեն տալիս դրանք կտրել, բնապահպանները եկել, տեսել են, ծառերը համարակալել ու գնացել:

Իսկ դպրոցի հին շենքի վերակառուցման և նոր մասնաշենքի կառուցման ընդհանուր ծրագիրը կավարտվի 1․5 տարի անց: Այդ  ընթացքում ավագ դպրոցը դասերը կանցկացնի Արթիկի նախկին Կենցաղի տանը: Սեպտեմբերի 1-ն այստեղ են դիմավորելու:

Ժամանակավոր դպրոցում ևս պայմաններ են ապահովվել, ջեռուցումը կլինի էլեկտրականությամբ, նախկին սպասարկման կենտրոնի սենյակները հարմարեցրել են դասապրոցես կազմակերպելու համար:

Տարիներով փակ, չօգտագործվող շինությունը դպրոցին տրամադրվել է վարձակալությամբ: Ֆինանսական հարցերի կարգավորումը դրված է Կրթության, գիտության, մշակույթի և սպորտի նախարարության ու մարզպետարանի վրա: Շենքը նախատեսված է 250 աշակերտի համար: Դպրոցը թեև ունի նոր գույք, բայց ժամանակավոր դպրոց չեն տեղափոխի: