Բոլոր թերացող շինընկերությունները կհայտնվեն սև ցուցակում.Սուրեն Պապիկյան

Բոլոր թերացող շինընկերությունները կհայտնվեն  սև ցուցակում և նրանց կսպառնա սնանկացում: Այս մասին այսօր Գյումրիում հայտարարել է տարածքային կառավարման և ենթակառուցվածքների նախարար Սուրեն Պապիկյանը: Սա վերաբերում է նաև Գյումրու փողոցաշինական ծրագրում ներգրավված շինընկերութուններին, որոնք արդեն երկու անգամ սահմանված վերջնաժամկետներում չեն տեղավորվել: Սուրեն Պապիկյանը շրջել է հիմնանորոգվող մի քանի փողոցներում, ծանոթացել այն խնդիրներին, որոնք խոչընդոտում են աշխատանքների ավարտին: Ու, ըստ էության, Գյումրու փողոցաշինական մեծ ծրագրի առաջին փուլի ավարտի ժամկետներ չեն նշվում:

Տիգրան Մեծ փողոցում տարածքային կառավարման ու ենթակառուցվածքների նախարար Սուրեն Պապիկյանը հիշեց նույն այս հատվածում ամիսներ առաջ վարչապետի շինարարին արված  դիտողությունը, թե հետիոտների համար անցումներ չեն կառուցել: Ժամանակավոր անցումներ չկառուցվեցին, ուղղակի, ամիսներ անց բոլորն արդեն ասֆալտապատ մայթերով են քայլում: Թեև այս մայթերն ու եզրաքարերը երկրորդ անգամ են կառուցել: Գյումրու փողոցաշինական աշխատանքների առաջին փուլի ավարտի ժամկետներ, որպես այդպիսին, չկան: Դրանք մինչև փետրվար էին նախատեսված, երկարացվեց մինչև հունիսի 30-ը: Հիմա էլ պաշտոնապես ու փաստաթղթերում ամրագրված ժամկետ չկա: Շինարարի խոստումները միայն բանավոր են ու ոչ վերջնական:

Փողոցաշինական առաջին փուլով 12 փողոցի ու 2 հրապարակի հիմնանորոգում է նախատեսված: Ու դեռ ընդամենը մեկ՝ Կոմիտաս փողոցում է գործն ավարտված: Երևանյան խճուղում ու «Կումայրի» պատմամշակութային միջուկի փողոցներում հիմնանորոգումն ավարտական փուլում է, մյուսներում ավարտին դեռ շատ կա: Ու եթե շինարարը ուշացնում է գործը, ուրեմն տույժ ու տուգանք կվճարի: Սա քաղաքապետարանի անժամկետ գործին տրվող  միակ պատասխանն է: Տարածքային կառավարման ու ենթակառուցվածքների նախարարը նշեց՝ թերացող շինարարների պատիժն ավելի խիստ պետք է լինի:

«Կատարված աշխատանքներ ունենք, որոնց կատարողականները չենք ստորագրել։ Եթե որևէ շինարար մտածում է, որ կարող է պետական բյուջեի գումարները փոշիացնել, մենք ընդամենը բարեկամաբար պիտի նրանց խնդրենք, որ այլևս նման մոլորություններ չունենան։ Դա ընդհուպ տանելու է տվյալ ընկերության լուծարման, որովհետև չեն վճարվելու։ Եթե ժամկետների խախտումների դեպքում տույժ ու տուգանք է կիրառվում, բացի դրանից՝ պիտի ավելի խիստ միջոցների դիմենք, ընդհուպ՝ սև ցուցակ»,- ասել է ՀՀ տարածքային կառավարման և ենթակառուցվածքների նախարար Սուրեն Պապիկյանը։

Միևնույն ժամանակ, Սուրեն Պապիկյանը նշեց, թե Գյումրու փողոցաշինության ձգձգման օբյեկտիվ պատճառներ էլ կան, որոնք հաշվի առել են: Խոսքը, մասնավորապես, ստորգետնյա կոմունիկացիաների  մասին է, որոնց խնդիրներն ի հայտ են գալիս միայն փողոցը փորելուց հետո: Գյումրիի փողոցաշինությունն ամենածավալունն է, բայց ճանապարհաշինական միակ ծրագիրը չէ Շիրակի մարզում: Համաշխարհային բանկի միջոցներով նորոգվում է Հայրենյաց-Հայկասար-Տուֆաշեն ճանապարհը, պետբյուջեի ֆինանսավորմամբ էլ առաջիկայում կմեկնարկեն Գյումրի-Ամասիա և Գյումրի-Աշոցք ճանապարհների առանձին հատվածների հիմնանորոգման աշխատանքները: