Ամասիայի վթարային շենքերից մեկը փլուզվում է․ բնակիչների կյանքը վտանգված է

Ամասիայի շենքերից մեկում տեղի ունեցած հերթական փլուզումից հետո վթարայինում ապրող 12 ընտանիքի անվտանգության, հետագա բնակության խնդիրը նորից հայտնվեց օրակարգում: Մեկ շաբաթ առաջ էր, որ քառահարկ շենքի երկրորդ հարկի բնակարաններից մեկի լոգասենյակի բետոնե կառուցատարրերը փլուզվեցին և հայտնվեցին առաջին հարկում, որտեղ, բարեբախտաբար, ապրողներ չկան: Շենքն ունի 32 բնակարան, որից 20-ում վաղուց չեն բնակվում:

Երկրորդ հարկի այն բնակարանն է, որտեղ տեղի էր ունեցել փլուզումը: Մեկ շաբաթ անց տան լոգասենյակն անվտանգության ժապավեններով փակ է, իսկ չուգունե վաննան՝ ննջարանում: Տանն ազատ քայլել, տեղաշարժվել չեն կարող, վախենում են՝ հատակը սկսել է շարժվել, պատերի ճաքերն էլ օր օրի ավելանում են ու լայնանում:

«Լրիվ պեռեգառոտկեն կախված է, երրորդ հարկի պանելը իջած է ցած, ամեն օր ծեփոնները կթափվի ցած»,- իր տան վիճակն է նկարագրել վթարային շենքի բնակչուհի Լուսինե Բարսեղյանը։

1965 թվականին բոլորին հայտնի Խրուշչովյան նախագծով կառուցված շենքում քարաթափումներն ու փլուզումները վերջին 10 տարիներին ավելի են հաճախացել։

Շենքի հիմքերը խարխլել են նկուղներ լցվող կոյուղաջրերը: Սա էլ տարիներով չլուծված խնդիրներից է: Անվտանգ չեն նաև շքամուտքերը,  աստիճանահարթակների ամրանները բետոնե ծածկից առանձնացել են:

«Շենքը ուղղահայաց է իջնում, ճաքում է, շենքը տրաքում է, ոչ թե մի կողքի է թեքվում, այլ տրաքում է»,- փլուզվող շենքի խնդիրն է նկարագրել Վոլոդյա Դավթյանը:

Քառահարկ շենքի 32 բնակարանից 20-ը վաղուց է դատարկվել:Բնակիչները հեռացել են իրենց տներից, ոմանք վարձով են ապրում Ամասիայում, ընտանիքներ կան, որ այլ բնակավայրեր են տեղափոխվել: Խրուշչովյան շենքը, հնաբնակների խոսքերով, դեռ 60-ականներին են անորակ կառուցել:

Բնակության համար ոչ պիտանի շենքում մնացել է 12 ընտանիք․ ասում են՝ եթե գնալու տեղ ունենային, իրենք էլ  չէին մնա:

2017 թվականին տրված սեյսմիկ եզրակացությամբ՝ շենքը 3-րդ աստիճանի վթարայնության է, իսկ շենքում ուսումնասիրություններ մի քանի անգամ են եղել, բայց այդպես էլ բնակելիի վթարայնության աստիճանը չի փոխվել՝ բանավոր ասել են, թե բնակության ենթակա շենք չէ:

Հերթական փլուզումից հետո բնակիչները նորից դիմում են հասցեագրել մարզպետարան, կառավարություն: Այդպիսի նամակներ ու դիմումներ տասնյակներով ունեն: Այս տարիների ընթացքում Ամասիայի համայնքապետարանը վթարայինում ապրող ընտանիքների բնակության հարցի լուծման  տարբերակներ առաջարկել է։

Հիմա էլ նույնն են ներկայացնում․ տարբերակներից են՝ դրամական փոխհատուցում, կամ 2000-ականներին սկսված շենքի կառաւցումն ավարտել ու տալ բնակիչներին: Համայնքում խիստ վթարային շենքից բնակիչների տարհանումը նշում են ՝ հրատապ է: «Անընդհատ ցնցումներ տեղի կունենան, թեկուզ որ կքելենք, ամբողջ շենքը դղրդա գը»,- հավաստիացրել է բնակիչներից Սարգիս Յավրումյանը: Համայնքապետարանը նախատեսում է այս ընթացքում երկրորդ հարկի տան փլուզված հատվածը վերանորոգել: Թեև դրանից  վտանգավորությունը չի նվազի: Նաև պատրատվում են դիմել Սեյսմիկ ծառայությանը՝ դարձյալ ուսումնասիրություններ կատարելու պահանջով: