Դոնալդ Թրամփի լավագույն բիզնես խորհուրդները

ԱՄՆ-ում մարդկանց մեծ մասը նախագահ Դոնալդ Թրամփին շարունակում է ընկալել ոչ միայն որպես քաղաքական գործիչ, այլև հաջողակ գործարար: Այդ առումով հարկավոր է ականջալուր լինել նրա խորհուրդներից մի քանիսին, քանի որ Դոնալդ Թրամփը կարողանում է ոչ միայն գումար վաստակել, այլև կառավարել ԱՄՆ հզոր պետությունն ու դուրս գալ ամենադժվար իրավիճակներից:

Մի առիթով Դոնալդ Թրամփն ասել է, որ կարիերա կառուցելու շատ ուղիներ կան, բայց ամենակարևորը՝ ճիշտ ընտանիքում ծնվելն է, իսկ հաջողության հասնելու համար, ըստ նրա, «պետք է առանձնացնել քեզ մոլորակի բնակչության 98%-ից»:

«Ամենաանհավանականը, որ կարող եք անել ձեր ֆինանսական բարօրության համար՝ « հիասքանչ գաղափար հորինելն է ու դա իրացնելը»,-համոզված է նա: Թրամփը միշտ աշխատանքի է վերցնում այն մարդկանց, որոնք ցանկանում են աշխատել հենց իր ընկերությունում: Ըստ նրա՝ պետք է աշխատել այնտեղ, որտեղ ձեզ դուր է գալիս: Իսկ եթե աշխատանքը հաճույք չի պատճառում, պետք է փոխել այն:

Թրամփը պնդում է, որ հարստանալու միակ միջոցը «ռեալիստական մոտեցումն է և ամենակարևորը՝ առավելագույն ազնվությունը»:

«Անհրաժեշտ է հրաժարվել ամսագրերի և հեռուստատեսության ստեղծած պատրանքներից: Չէ՞ որ ամեն ինչ այդքան հեշտ չէ: Կյանքը շատ դաժան է, և եթե ցանկանում եք հաղթել, պետք է լինել պինդ, ինչպես քարը: Պետք է հաղթել ոչ միայն ուղեղով, այլև բռունցքներով»,- ասել է նա:

ԱՄՆ նախագահը համոզված է, որ առավելագույն հաջողությունը գալիս է այն ժամանակ, երբ լողում ես հոսանքին հակառակ, ու նշանակություն չունի, թե որքան խելացի և համակողմանի զարգացած ես: Նա հպարտությունը համարել է ամենամեծ հիմարությունը, որը խանգարում է մարդուն տնտեսել սեփական միջոցներն ու ռեալ գնահատել դրանք: Վստահ է, որ պետք է ծախսել այնքան, որքան համարում եք անհրաժեշտ, բայց ոչ ավելի, քան կարող եք: Ամենակարևորը՝ չպետք է երեխաներին երես տալ հարստությամբ, քանի որ դա կարող է նրանց մոտ վերացնել աշխատելու, ինչպես նաև սեփական ուժերով հաջողության հասնելու ցանկությունը:

Ըստ Թրամփի՝ հաջողակ գործարարի համբավ ձեռք բերելու պայմաններից մեկը՝ բիզնեսի պարզ կանոններից մեկին հետևելն է՝ հագնվել համապատասխան այն պաշտոնի, որը ցանկանում եք ունենալ:

Նա խորհուրդ է տալիս սկսնակ գործարարներին միշտ ձեռքի տակ ունենալ իմաստունների խելացի մտքերով գրառումների գրքույկ, որոնք կոգեշնչեն դժվար րոպեներին: Թրամփը կյանքում հետևում է իր իսկ սահմանած՝ «Վարձել լավագույններին, սակայն չվստահել նրանց և ոչ մի բանի» սկզբունքին: Նա համոզված է, որ վատ ժամանակները կարող են սեփական բիզնեսը ստեղծելու լավագույն հնարավորությունը տալ: Նա խաղատան օրինակով հետաքրքիր խորհուրդ է տվել սկսնակ գործարարներին՝ հայտարարելով, որ կարողության հասնելու լավագույն սկզբունքներից մեկը խաղատան տնօրենի պաշտոնը զբաղեցնելն է, քան այդ սարքերի դիմաց նստելը: Միլիարդատերը խոստովանել է, որ կյանքն իրեն ևս մի շատ կարևոր դաս է տվել. «Նա, ով մի անգամ դավաճանել է դժվար պահին՝  կդավաճանի կրկին»:

«Ցանկացած ապրանք ձեռք բերելիս կամ ծառայություն ստանալիս՝ մի՛ վախեցեք սակարկելուց՝ ձեզ համար առավելագույն բարենպաստ պայմանների հասնելու համար… Ցանկացած «լավ ժամանակներ» անցյալում ծանր աշխատանքի և նվիրվածության արդյունք են: Վաղվա արդյունքները կախված են այն բանից, թե ինչ եք անում այսօր: Եթե ցանկանում եք բերքը հավաքել վաղը, սերմեր ցանեք ամեն օր: Եթե գեթ մի պահ դադար առնեք կամ թուլանաք՝ կսկսեք ցած սահել»,- ասել է նա:

ԱՄՆ նախագահը մտորել է նաև աշխարհի ու մարդկանց մասին: «Աշխարհը միայն թվում է քաղաքակիրթ, իրականում դաժան է, մարդիկ՝ անխիղճ: Առերես կարող են ժպտալ, բայց այդ ժպիտի տակ թաքնված է ձեզ վերացնելու ցանկությունը: Գիշատիչները սպանում են սնվելու համար, մարդիկ՝ զվարճանալու: Նույնիսկ ընկերները կարող են ձեզ մեջքից հարվածել՝ թշնամիներից ավելի վատ: Անհրաժեշտ է կարողանալ պաշտպանվել»,- գտնում է նա: