4-րդ աստիճանի վթարայնության Կապսի դպրոցը չի ընդգրկվել առաջնահերթ խնդիրների լուծման ծրագրում

Առաջնահերթ լուծում պահանջող խնդիրների անցած տարվա ծրագրով Շիրակի մարզի կրթական, մարզական և բժշկական 14 հաստատությունների մի մասում շինարարությունը նոր է սկսված, մի քանիսում ավարտվում է։ Հրատապ խնդիրների լուծման անցած տարվա ծրագիր չեն ընդգրկվել ամրացման ենթակա և կապիտալ շինարարություն պահանջող հաստատությունները։ Ծրագրով առաջնահերթություն տրվել է Կառնուտի նորակառույց դպրոցի շենքում սանհանգույցի հիմնանորոգմանը, իսկ խնդիրը առաջ էր եկել նոր շենքի շահագործումից հետո և հետագայում դարձել փլուզման պատճառ։

1978 թվականի կառույց Կապսի միջնակարգ դպրոցի միայն ցուցանակն է նոր ու մուտքի դուռը։ 40-ամյա դպրոցական շենքի մետաղե այս ձողերը ավելի քան 30 տարի առաստաղն են պահում, բայց դրանցով դասարանները չեն ապահովագրվում մասնակի փլուզումներից։

Տեղումներից հետո դասարաններում ոչ թե ջրի կաթոց է, այլ ջրերի մեծ հոսք։ Քանդված տանիքից հոսող ջրերի պատճառով են պատերը քայքայվում, կոյուղատարների ջուրն էլ հավաքվում է նկուղում: Խոնավությունն իր հերթին նպաստել է վթարայնության աստիճանի փոփոխությանը: Սա էլ տարիների ընթացքում ազդել է աշակերտների թվի վրա։ Դպրոցից հեռացել է 30 աշակերտ:

Դպրոցի տնօրեն Նելլի Խոջումյանը հիշեց, որ շենքի վիճակի ուսումնասիրություն նաև եղել է երկու տարի առաջ, բայց եզրակացությունը փաստաթղթի տեսքով չկա, բանավոր հայտնել են, որ շենքը դարձել է 4-րդ աստիճանի վթարային:

Իսկ մետաղե այս կոնստրուկցիաները դեռ 90-ականներին են ամրակայվել` շենքի վիճակը հաշվի առնելով: Իսկ հիմա` 30 տարի անց, դպրոցի տնօրինությանը շինարար-մասնագետներն ասել են, թե ծանր երկաթե կոնստրուկցիաները հակառակը, վնասել են շենքը: Դպրոցի ամրացումը հրատապ է արդեն 30 տարի: Իսկ վերջին խոստումը, որ դպրոցն ընդգրկվելու էր մարզի առաջնահերթ խնդիրների լուծման ծրագիր, անցած տարի էր եղել։ Հետո մերժվել էր նույն և հայտնի պատճառաբանությամբ, թե մեծ ծախսեր պահանջող է: Եվ արդյունքում, առաջնահերթ ֆինանսավորման արժանացավ Կառնուտի դպրոցը: 17 տարվա դպրոցական շենքին նորից գումար է հատկացվել նոր սանհանգույց կառուցելու համար: Դրանք 10 տարի խցանված են մնացել: Կոյուղաջրերը ողողել են շենքի հիմքերն ու ավելի քան 1 մ բարձրության դատարկություն առաջացրել, որն էլ հանգեցրել էր փլուզման:

Սանհանգույցից բացի, փոխվելու են նաև դպրոցի էլեկտրամալուխները, նաև ջեռուցման համակարգը: Գյուղը գազաֆիկացված չէ, դպրոցը շարունակելու են ջեռուցվել էլեկտրականությամբ:

Դպրոցի տնօրեն Հայկուհի Հովհաննիսյանի խոսքերով, ջեռուցման սեզոնին լուրջ խնդիրներ էին ունենում, համակարգում վթարները հաճախակի էին, հետևանքում՝ հրդեհները ևս։

Շինկազմակերպության աշխղեկի խոսքերով` խնդիրն այն պատճառով էր, որ համակարգը նախատեսված չի եղել էլեկտրական ջեռուցման համար, դրա համար էլ լարմանը չի դիմացել և ծանրաբեռնվածությունից վթարներ են եղել։ Կառնուտի միջնակարգ դպրոցի մասնաշենքում հիմնանորոգման աշխատանքներ այս ծրագրով չկան նախատեսված, այն ինչ արվում է, 17 տարի առաջ շինարարի թույլ տված թերությունների վերացում է կոչվում:

Նաև ամենամեծ դասարանի հատակն է փոխվում, որ ֆիզկուլտուրայի դասերն այդտեղ անցկացնեն, դպրոցը կառուցվել է առանց մարզադահլիճի: