Ռուսաստանը 10-րդ անգամ վետո է դրել Սիրիայի հարցով ՄԱԿ-ի բանաձևի վրա

ՄԱԿ-ի Անվտանգության խորհրդում Ռուսաստանը հերթական անգամ անգամ վետո է դրել ՄԱԿ-ի և քիմիական զենքի կիրառումն արգելող կազմակերպության համատեղ մանդատի երկարացման՝ ԱՄՆ-ի առաջարկած բանաձևի վրա:

Նշենք, որ այդ բանաձևը ենթադրում էր Սիրիայում քիմիական հարձարկումների ուսումնասիրության առաքելության ժամկետի երկարաձգում: Սա սիրիական պատերազմի 6 տարվա ընթացքում արդեն 10-րդ արգելքն է Ռուսաստանի կողմից: Քվեարկության արդյունքում ամերիկյան բանաձևը անհրաժեշտ 9 կողմ ձայների փոխարեն 11-ը ստացավ, սակայն Ռուսաստանն օգտագործեց իր վետոյի իրավունքը:

Բանաձևին դեմ քվեարկեց նաև Բոլիվիան, Չինաստանը  և Եգիպտոսը ձեռնպահ քվեարկեցին: Ռուսաստանը ՄԱԿ-ի Անվտանգության խորհրդի քննարկմանը դրեց ՄԱԿ-ի և քիմիական զենքի կիրառումն արգելող կազմակերպության համատեղ  առաքելության երկարաձգման սեփական բանաձևը, բայց քվեարկությունից առաջ ՄԱԿ-ում Ռուսաստանի մշտական ներկայացուցիչ Վասիլի Նեբենզյան փաստաթուղթը հետ վերցրեց՝ հիմնավորմամբ, որ Անվտանգության խորհուրդը չի բավարարել Մոսկվայի կողմից բանաձևի քննարկման կարգը:

Խոսքն այն մասին էր, որ Ռուսաստանն առաջարկում էր ուսումնասիրել բանաձևի ամերիկյան տեքստը: Բոլիվիայի պատվիրակությունը պահանջեց, որ ռուսական կողմի ներկայացրած փաստաթուղթը, այդուհանդերձ, դրվի քվեարկության, սակայն այն չհավաքեց անհրաժեշտ ձայներ։

Ռուսական բանաձևը պաշտպանեցին Չինաստանը, Ղազախստանը, Բոլիվիան: ԱՄՆ-ը,Մեծ Բրիտանիան,Ֆրանսիան, Շվեդիան, Ուկրաինան, Իտալիան, Ուրուգվայը դեմ քվեարկեցին, Եթովպիան, Ճապոնիան, Եգիպտոսը և Սենեգալը՝ ձեռնպահ:

Այդպիսով, ՄԱԿ-ը չկարողացավ երկարաձգել Սիրիայում քիմիական հարձակումների դեպքերի ուսումնասիրման առաքելության ժամկետը: Այն լրացել է այսօր՝ Մոսկվայի ժամանակով ժամը 08.00-ին: ԱՄՆ-ը պահանջում էր այդ ժամկետը սահմանել բանաձևի ընդունման պահից սկսած՝ 24 ամիս, մինչդեռ Մոսկվայի առաջարկած տարբերակով այդ ժամկետը սահմանվում էր մինչև 2018 թվականի մայիսի 16-ը: Ռուսաստանը նաև առաջարկում էր վերանայել նախկինում արված ուսումնասիրությունների արդյունքներն ու եզրահանգումները քիմիական հարձակումների մասին: 

Հիշեցնենք՝ 2017 թվականի ապրիլին սիրիական  Խան Շեյխուն քաղաքում քիմիական թունավորման զոհ դարձավ 80 բնակիչ:

Դիահերձում կատարած բժիշկները հաստատեցին, որ նրանք մահացել են զարին գազով թունավորումից: Սեպտեմբերին ՄԱԿ-ի մարդու իրավունքների խորհուրդը հաստատեց, որ քաղաքի վրա քիմիական հարձակում է կատարվել, որի պատասխանատվությունը դրեց Սիրիայի կառավարական ուժերի վրա:

Դա փաստացի հերքում էր Ռուսաստանի տարբերակն այն մասին, թե սիրիական օդուժը ռմբակոծել էր ահաբեկիչներին պատկանող քիմիական գործարանը: Սիրիայի նախագահ Բաշար Ասադը  Խան Շեյխուն քաղաքում տեղի ունեցածաը գնահատեց որպես արհեստածին:

Նա պնդում էր, որ Սիրիան հատուկ համաձայնագրով ոչնչացրել է բոլոր քիմիական պահեստները: Միայն  ՄԱԿ-ի Անվտանգության խորհուրդը և քիմիական զենքի կիրառումն արգելող կազմակերպությունը լիազորություններ ունեն ուսումնասիրել այդ դեպքերը: Ակնկալվում էր, որ հնարավոր կլիներ դրանից հետո գտնել մեղավորներին: