Եկեք համակարգը առողջացնենք, որ դատավորի թեկնածուն չվախենա լինել ընդդիմության թեկնածու. Մարուքյան

«Նիկոլ Փաշինյանը թող ասի` քանի՞ անգամ է ինքը բանակցել՝ որպես «Ելք» խմբակցության ղեկավար էդ ֆորմատով և հասել հաջողության, ես էլ փորձեմ»,- այսպես պատասխանեց ԼՀԿ ղեկավար Էդմոն Մարուքյանը ԲՀԿ-ի հետ բանակցության հավանականության մասին հարցին:

Ընդդիմության կողմից ԲԴԽ դատավորի թեկնածու առաջադրելը եղել է բանավոր բանակցության արդյունք:

«Մենք ասում ենք սիրելի, հարգարժան «Իմ քայլ», 3 մարդ հրաժարական է տվել, այսինքն` կա 3 թափուր տեղ: Ասում ենք կարո՞ղ է ընդդիմությունը 1 տեղում գոնե թեկնածու ներկայացնել և ունենանք մի քիչ բազմազան Բարձրագույն դատական խորհուրդ: Ասում են՝ այո´, սիրով, այո´, ինչո՞ւ չէ, անպայման ներկայացրեք:

Մենք ներկայացնում ենք, նրանք մերժում են բոլոր թեկնածուներին, և բոլոր տեղերի համար նրանք ներկայացնում են թեկնածու և ասում են այ, էս էլ սենց ստացվեց: Հետևաբար մենք առաջինը կողմ քվեարկեցինք, երկրորդը կողմ քվեարկեցինք և տեսանք, որ իշխանությունը պատրաստ չէ գնալ որևէ զիջման, երրորդին դեմ քվեարկեցինք»:

Արամ Աբրահամյանի այն դիտարկմանը, թե լավ դատավորները գուցե վարանեն ընդդիմության կողմից առաջադրվել, քանի որ տարբեր հարցերի կարող են տալ այնպիսի պատասխան, որը դուր չգա խորհրդարանական մեծամասնությանը, Մարուքյանը նշեց, որ նույն բանը տեղի է ունեցել նաև իշխանության կողմից ներկայացված թեկնածուների հետ, որոնց հարցեր տալուց հետո մերժել են.

«Մենք այդ պրոցեսի անունը դրել ենք «հավատաքննություն»: Եթե մարդը, մտավորական մարդը, իրավաբան գիտնականը կամ դատավորի թեկնածուն, պատրաստ չէ ընդդիմության կողմից առաջադրվել և վախեր ունի, ուրեմն մեր համակարգը հիվանդ է, հետևաբար, խոսել էդ հիվանդ համակարգում ինչ-որ բաների մասին, որ լավ է, հիմա շատ լավ բաներ կլինեն, աբսուրդ է: Դրա համար հիմա եկեք էդ համակարգը առողջացնենք, որ մարդը չվախենա ընդդիմության թեկնածուն լինել: Էդ մարդուն հո Ադրբեջանը չի ներկայացնում, ինչի՞ պիտի էդ մարդը վախենա: Էս է տրամաբանությունը: Դեռևս քաղաքական համակարգը հիվանդ է»:

Մարուքյանը նաև նշեց, որ իր խմբակցության կողմից ներկայացված թեկնածուները եղել են պարզապես մասնագետներ, ապաքաղաքական մարդիկ, որոնք երբևէ քաղաքական կողմնորոշվածություն չեն ունեցել, իշխանության դեպքում պատկերը այլ է.

«Օրինակ` վերջին ՍԴ թեկնածուն քաղաքական աֆիլացվածություն ուներ, որի մասին մենք խոսեցինք: Նախկինում էլ ենք դրան դեմ եղել, հիմա էլ ենք դրան դեմ: Չնայած կա կարծիք, որ քաղաքական դեմքեր կարող են լինել և դառնալ ՍԴ դատավոր»:

Մարուքյանի խոսքով` Սահմանադրությունն  արգելում է ընտրվելուց հետո կուսակցական լինելը և պետք է այդուհետ պահպանի քաղաքական զսպվածություն:

«Սահմանադրությունը չի արգելում, բայց մեծամասնությունն ինքն իրեն պետք է գրաքննի, կարողանա վեր կանգնել ներկուսակցական շահերից և չներկայացնի քաղաքական համախոհ, ներկայացնի մարդ, որն ունի սեփական կարծիք, համաձայն չի ո´չ ինձ հետ, ո´չ իրենց հետ, ո´չ էն մյուսների հետ»,- հավելեց նա: