Գյումրիում Մհեր Մկրտչյանի ծննդյան օրը մի շարք միջոցառումներ են անցկացվել

Այսօր Մհեր Մկրտչյանի ծննդյան օրն է: Մեծ դերասանը կդառնար 89 տարեկան: Գյումրիում Մհեր Մկրտչյանի ծննդյան օրը նշել են մի շարք միջոցառումներով: Դերասանի թատերական հրապարակում գտնվող արձանի մոտ ծաղիկներ են խոնարհել, նրա հուշաթանգարանում ինտերակտիվ էքսկուրսիա է կազմակերպվել, իսկ ամենամարդաշատ միջոցառումն անցկացվել է քաղաքի կենտրոնական՝ Գորկայի այգում: Այստեղ ռուսաստանաբնակ բարերար Արթուր Գալստյանի միջոցներով վերականգնվել է «Մեր մանկության տանգոն» ֆիլմի լուսանկարահանման տաղավարը: Վերաբացման արարողությանը մասնակցել են Մհեր Մկրտչյանի խաղընկերները՝ ֆիլմում Վարդուշի և Արմենի դերակատարները:

Լենինականի Գորկայի այգու այս տարածքն ուղիղ 35 տարի առաջ՝ 1984-ին նկարահանման հրապարակ էր: Գլխավոր դերերում Մհեր Մկրտչյանն ու Գալյա Նովենցը, նրանց հետ երիտասարդ դերասանները խաղում էին «Մեր մանկության տանգոն» ֆիլմում: 35 տարի անց վերադարձը նկարահանման վայր հաճելի հուշեր ու հուզմունք էր առաջացրել Արմենի դերակատար Սամվել Սարգսյանի և Վարդուշի կերպարը մարմնավորած Էլինա Աղամյանի մոտ: Ֆիլմի համար ստեղծված դեկորացիան, որը լուսանկարահանման տաղավար է ծառայել, հիմա բոլորին հիշեցնում է Ֆրունզիկի, նրա մարմնավորած Ռուբենի կերպարի մասին: Իսկ ՀՀ վաստակավոր արտիստ Էլինա Աղամյանի համար պաստառն այլ հուշեր է արթնացնում: Հենց պաստառի հետնամասում տեսաժապավենի լիցքավորմանը սպասելու ժամանակ առաջին անգամ Մհեր Մկրտչյանը խոսել է նրա հետ ու գնահատել դերասանուհու տաղանդը:

«Մենք պաստառի հետնամասում կանգնած լուռ սպասում էինք, որ ժապավենը լիցքավորեն: Շատ կներեք, անհամեստություն պիտի անեմ՝ նա շրջվեց դեպի ինձ ու առաջին բառը, որ իմ հետ փոխանակեց Ֆրունզե Մուշեղիչը, ասեց. «Իսկ դուք գիտե՞ք, որ դուք մեծ դերասանուհի եք, իսկ դուք գիտե՞ք, որ դուք շատ տաղանդավոր եք: Ընդհանրապես մեծությունների հետ շատ հեշտ է աշխատել: Միջակությունների, անտաղանդ մարդկանց հետ է դժվար»,- ասել է ՀՀ վաստակավոր արտիստ Էլինա Աղամյանը:

Ռուսաստանաբնակ գործարար Արթուր Գալստյանն անցած տարի Հեղնար աղբյուրն էր վերականգնել, հիմա այս պաստառը, «Մեր մանկության տանգոն» ֆիլմից հայտնի պատշգամբի շենքը վերականգնելու պատրաստակամություն է հայտնել, բայց շենքի պատկանելության հարցը դեռ թույլ չի տալիս վերականգնման թույլտվություն ստանալ:

«Ասում են՝ շենքը մի քանի սեփականատեր ունի: Առաջարկել եմ, թող գան սեփականատերերը, համաձայնության գանք, շենքի այդ հատվածը հատկացնեն, վերականգնենք: Չեմ հասկանում՝ սպասում են, որ փլուզվի, հետո նոր վերականգնե՞ն»,- Shantnews-ին ասել է Արթուր Գալստյանը:

Մհեր Մկրտչյանի անձնական իրերը, ֆիլմում կրած հագուստները, տակառիկն ու կոմոդը…սրանք Մհեր Մկրտչյանի հուշաթանգարանի ցուցանմուշներն են: Դրանց ընդհանուր թիվը 1600 է, բայց թանգարանի տնօրենն է նշում՝ այս ամենը շատ քիչ է Ֆրունզիկին ներկայացնելու համար: Մհեր Մկրտչյանի թանգարանում այսուհետ հայ և համաշխարհային դասականների մոնոներկայացումներ կբեմադրվեն: Թանգարանն իր թատրոնն է ձևավորել՝ կազմված գյումրեցի երիտասարդ դերասաններից:

Մհեր Մկրտչյանի թանգարանն առաջինն է Գյումրիում, որ այսուհետ ինտերակտիվ, թվային էքսկուրսիաներ կկազմակերպի: Այցելուները պլանշետների միջոցով կարող են տարբեր լեզուներով ծանոթանալ ցուցանմուշներին: