Գյումրիում թափառող շներին կրակելով սատկացնելը հանցագործություն է. կենդանասերներ

Ինչու են Գյումրիում թափառող շների դեմ պայքարում կրակելու միջոցով, արդյոք թույլատրելի է բնակելի թաղամասերում այդ տարբերակով վնասազերծում կատարել, և եթե դրանք անթույլատրելի են, ապա ինչ մեթոդով կարելի է պայքարել քաղաքի տարբեր թաղամասերում ոհմակներով թափառող շների դեմ:

«Համայնքը, քաղաքապետարանը որսորդմիության անդամներին ուղղակի վճարում է, կոմունալ բաժինն էլ հետևում է այդ ամենին, որ որսորդները պարզապես փողոցում կրակեն շների վրա: Իրենք ընդհանրապես տեղյակ չեն, որ իրավունք չունեն էլ և դա պատժելի արարք է»-պարզաբանել է «Էկոնյուզ»-ի գլխավոր խմբագիր Մարիամ Տաշչյանը:

«Գյումրիում կրակում են և դա փաստ է, դա ժխտելը առնվազն ծիծաղելի է, ես միայն երեք տեսանյութ ունեմ, որտեղ հենց կրակելու պրոոցեսին նույն մարդն է, և նույն մեքենաները կրակած շներին հավաքում են, այսինքն՝ դա քաղաքապետարանի կողմից ժխտելը լուրջ չէ, քանի որ դա փաստ է»,- ասել է կենդանիների հարցերով զբաղվող Դինգո թիմի ղեկավար Օվսաննա Հովսեփյանը:

Կենդանասերներն ու բնապահպաններն երեկ՝ հունիսի 25-ին, «Երկխոսության մեդիա կենտրոն»-ում անդրադարձել են գյումրեցիներին հուզող այս խնդիրներին, ինչի առիթը տվել էր քաղաքացու համացանցում հրապարակած տեսանյութը, որը կենդանու նկատմամբ դաժան վերաբերմունքի  ապացույցն էր:

«Ես մի քանի ամիս առաջ քաղաքապետարանին նամակ էի ուղարկել, հարցում, 3 կետ էի նշել` ինչ ծառայություններ ունեք փողոցային կենդանիների հետ կապված, ինչքան բյուջե եք տրամադրում, ովքեր են պատասխանատուները: Հնգօրյա ժամկետում պիտի պատասխանեին, որևէ պատասխան չէր եկել, ես նորից ստիպված գնացել եմ քաղաքապետարան, ինձ մի թուղթ  են տվել, որտեղ գրված է, որ քաղաքապետարանը որևէ ծառայություն չունի»,- իր դիմումի անբավարար պատասխանի մասին է բարձրաձայnել տեսանյութի հեղինակ, բնապահպան Անի  Նավասարդյանը:

Շների վնասազերծման աշխատանքներն իրականացնում են քաղաքապետարանի ենթակայությամբ գործող «Զբոսայգիների և պուրակների» ՊՈԱԿԸ: Ըստ բանախոսների՝ կազմակերպության նման աշխատաոճը հակաօրինական է: Քննարկմանը տվյալ կազմակերպությունից կամ  քաղաքապետարանից ներկայացուցիչ չի մասնակցել :

«Իրենցից որևէ ներկայացուցիչ չկա, իրենք ուղղակի փախնում են էս ամենից,իսկ ինչի փախնել, եթե կարելի է էդ հարցը ուղղակի լուծել և անհանգստություն չպատճառել և՛ քաղաքացիներին, և՛ կենդանիներին»,- ավելացրել է Անի Նավասարդյանը:

«Չեն եկել, որովհետև ուղղակի  չէին կարողանալու շատ հարցերի պատասխանել, մի հատ գրություն ուղարկելը ավելի հեշտ է, հետո հարց  ու պատասխան չի առաջանում: Եթե իրենք գային, ես իրենց ցույց կտայի մյուս երկու տեսանյութերը, ինչ պիտի պատասխանեին, որ մոնտաժել ենք»,- ասել է կենդանիների հարցերով զբաղվող «Դինգո թիմի» ղեկավար Օվսաննա Հովսեփյանը:

Բանասխոսները  նաև նշել են, որ արդեն հանրապետության մի քանի մարզերում սկսվել է թափառող շների ստերջացման ծրագիրը, ինչը բավականին բարձր էֆեկտիվություն է ապահովում: Իսկ Գյումրու քաղաքապետարանում այդ մասին չեն էլ մտածում՝ մշտապես պատճառաբաելով, որ ֆինանսական միջոցներ չունեն:

«Գյումրին էն համայնքը չի ,որ ավելի քիչ բյուջե ունենա, քան Բյուրեղավանը կամ Էջմիածինը, որտեղ մենք արդեն էդ ծրագիրը կատարում ենք: Միջին հաշվարկը գործողության մեկ շան համար կազմում է 22-24 հազար դրամ, որի մեջ մտնում են և՛ վիրահատությունը, և՛ դեղորայքը, կենդանուն բռնելն ու մի քանի օր պահելը, ապա բաց թողնելը: Ամբողջը հաշվարկված է և կարծում եմ, որ ավելի մատչելի է ստերջացումը, քան անընդհատ կրակելը, որովհետև էսօր կրակեցիք, 4 օր հետո էդ տարածքում մեկի փոխարեն 4-5 նոր շուն են գալիս»,- կարծում է կենդանիների հարցերով զբաղվող «Դինգո թիմի» անդամ Գոհար Մանուշակյանը։

Կենդանասերները նաև կասկածում են, որ սատկացրած շներն իսկապես թաղվում են փոսերի մեջ, իսկ եթե քաղաքապետարանն իրականում այդպես է վարվում, ապա այստեղ էլ կա հակաօրինական գործելաոճ, արդյոք պահպանվում են այդ տարածքներում սանիտարահիգիենիկ նորմերը, արդյոք այդ փոսերը անհրաժեշտ խորություն ունեն, որտեղ են գտնվում դրանք և հարյուրավոր սատկացրած շների համար քանի փոս է առկա: Այս հարցերը  քաղաքապետարանի ներկայացուցչի բացակայության պատճառով մնացին անպատասխան: