Ախորժելի առավոտ. ինչպե՞ս են նախաճաշում տարբեր երկրներում

Բարի լույս: Իհարկե, շատերը նախընտրում են առավոտյան քնել մինչև վերջին վայրկյանը, բայց կգտնվեն նաև այնպիսի մարդիկ, որոնց համար, անկախ զբաղվածության աստիճանից, նախաճաշելը ամենակարևոր ու նաև հաճելի գործերից է: Յուրաքանյուր մարդ իր նախաճաշի անհատական ճաշացանկն ունի: Իսկ ShantNews-ը ներկայացնում, թե ինչպես են նախաճաշում աշխարհի տարբեր երկրներում:

1, Մեծ Բրիտանիա

Միացյալ թագավորությունում արդեն դարեր շարունակ նախաճաշի ճաշացանկը չի փոխվում: Բրիտանացիները նախընտրում են առավոտյան ուտել հիմնականում սունկ, տոմատ, շոգեխաշած վարսակ, տապակած լոբի, ձվածեղ, կարտոֆիլով խրթխրթան կոտլետ և տապակած երշիկ: Այո, այսքանը միասին՝ փոքր չափաբաժիններով, մեկ ափսեի մեջ: Բրիտանացիների համար ոսկե կանոն է նախաճաշից հետո սուրճ, թեյ կամ նարնջի հյութ խմելը, որը անպայման պետք է մատուցվի ջեմով, մեղրով կամ մարմելադով:  Շոտլանդացիների նախաճաշը նման է անգլիականին, բայց նրանց մոտ ընդունված է նաև նախաճաշին մատուցել ոչխարի լյարդ:

2, Սկանդինավիա

Դանիացիների թեթև նախաճաշը հիմնականում բաղկացած է ելակի ջեմով տոստերից, մուգ կամ սպիտակ հացով և պանրի զանազան տեսակներով պատրաստված բուտերբրոդներից: Այս նախաճաշի ավելի հարուստ տարբերակն էլ կա, որի մեջ ներառված են թերխաշած ձու, երշիկի տեսականի, խոզապուխտ, մյուսլի շիլա և եգիպտացորենի փաթիլները՝ կաթով խառնած: Դանիացիները սովորաբար առավոտյան խմում են սուրճ կամ թեյ: Իսկ շվեդական նախաճաշի սեղանին պետք է լինեն հատապտղային ջեմով բլիթներ, ապխտած ձկով կամ ձկան սառը մսով պատրաստված փոքրիկ բուտերբրոդներ: Շվեդները նախաճաշն ավարտում են տաք սուրճով կամ տեղական բարձր խտություն ունեցող կաթով, որին տեղացիները անվանում են կաթնային յոգուրտ և նրա մեջ սովորաբար ավելացնում են զանազան հատապտուղներ, ջեմ կամ դարչին: Իսկ իսլանդացիները նախընտրում են ձկնատեսակներով կերակուրներ, ընկույզով ու շագանակագույն շաքարով համեմված վարսակի փաթիլներով շիլա:

3, Գերմանիա

Գերմանացիները սովորաբար նախաճաշում են առավոտյան 7-8-ն ընկած ժամանակահատվածում և նախընտրում են օրվա սննդի մեծ մասը հենց առավոտյան ընդունել: Գերմանական նախաճաշի սեղանին պետք լինեն եփած ձու, ջեմով բուլկիներ, ձեթի մեջ տապակած խոզապուխտով հաց, յոգուրտ, պանրի տեսականի և մրգեղեն: Խմում են քաղցր սուրճ, կաթնային թեյ, տաք շոկոլադ կամ մրգային հյութեր: Վերջին շրջանում Գերմանիայում ավելի շատ տարածվեցին, այսպես ասած, չոր նախաճաշերը, որոնք ներառում են եգիպտացորենի փաթիլներ՝ մյուսլի շիլայով խառնած, որին ավելացնում են պանիր, մրգեր, պաշտետ կամ երշիկեղեն:

4, Ֆրանսիա

Ֆրանսիայում նախաճաշին երբեք չեն ուտում միս, ձկնամթեք, աղցաններ, պանիր: Իսկական ֆրանսիական նախաճաշը ունի նաև անվանում՝ «le petit déjeuner», որը թարգմանաբար նշանակում է «փոքրիկ նախաճաշ»: Այն ներառում է տաք շոկոլադ, կակաո կամ սուրճ, բայց ոչ թունդ սև, այլ՝ կաթնային էսպրեսսո կամ լատտե: Այս ըմպելիքները մատուցվում են ֆրանսիական թարմ հացի վրա քսված հատապտղային ջեմով: Ֆրանսիական նախաճաշի կարևորագույն ատրիբուտը կրուասանն է: Ասում են՝ եթե ֆրանսիացին առավոտյան կրուասան չի կերել, ապա օրվա ընթացքում մտածել և գործել չի կարողանա:

5, Իտալիա

Իտալացիները նույնպես առավոտյան նախընտրում են ուտել կրուասան՝ տարբեր միջուկներով և խմում են թունդ սև կամ կաթնային սուրճ: Հնարավոր է խմել նաև ուղղակի կապուչինո: Իտալացի երեխաները ամեն առավոտ խմում են կաթ կամ թաք շոկոլադ: Կրուասաններից բացի, նաև ուտում են տարբեր միջուկներով բլիթներ, երշիկով հաց կամ կարագով ու պանրով պատրաստված բուտերբրոդներ:

 Բարի ախորժակ և ուրախ օր…

                                                                                                                                                                     Պատրաստեց Լիլիթ Խաչատրյանը