2018 թ. գրանցվել է 5․2 տոկոս տնտեսական աճ՝ գլոբալ քաղաքական վայրիվերումների պայմաններում. Փաշինյան

2018-ը քաղաքական առումով աննախադեպ տարի էր: Այս մասին հունիսի 5-ին խորհրդարանում 2018 թ. բյուջեի նախագծի հաշվետվության քննարկման ժամանակ ասաց ՀՀ վարչապետ Նիկոլ Փաշինյանը՝ նշելով, որ դրա մասին վկայում են ցուցանիշները՝ նախագահական մեկ ընտրություն, ՀՀ վարչապետի 5, ԱԺ արտահերթ ընտրություն, Երևանի քաղաքապետի մեկ արտահերթ ընտրություն, տեղի է ունեցել թավշյա հեղափոխություն:

«Սա կարևոր է՝ նկարագրելու համար այն ֆոնը, որի պայմաններում տեղի է ունեցել բյուջեի կատարման ընթացքը: Այս պայմաններում մեր կառավարությունը, որը ձևավորվել է 2018 թ. մայիսին, ըստ էության, կարողացավ լուծել ամենակարևոր խնդիրը, խոսքը մակրոտնտեսական կայունության պահպանման մասին է: ԱԺ մեծ դահլիճում ցանկանում եմ ընդգծել՝ երևի թե հնարավոր չէ համաշխարհային պատմության մեջ գտնել դեպքեր, երբ տեղի են ունենում այսպիսի մասշտաբային քաղաքական փոփոխություններ, և դրանք չեն ուղեկցվում տնտեսական ցնցումներով, ֆինանսական համակարգի փլուզումներով կամ կիսափլուզումներով, և ամեն ինչ տեղի է ունենում մակրոտնտեսական կայունության պայմաններում»,- ասաց նա:

Վարչապետը նշեց՝ 2018 թ. գրանցվել է 5․2 տոկոս տնտեսական աճ, ապա ընդգծեց՝ բյուջեի նախագծում, որն ընդունվել էր նախորդ կառավարության և ԱԺ-ի կողմից, որպես տնտեսական աճի կանխատեսվող ցուցանիշ նշվել է 4․5 տոկոսը, ահա այսպիսի գլոբալ քաղաքական վայրիվերումների պայմաններում կառավարությանը հաջողվել է գերակատարել այն պլանը, որ 2018 թ. բյուջեի հիմքում դրել էր նախորդ կառավարությունը՝ ելնելով բոլորովին այլ կանխատեսումներից:

«Ուզում եմ ընդգծել նաև, որ 2018 թ. պետական բյուջեն կատարվել է, բյուջեի կատարման արդյունքներով՝ ՀՀ կառավարությունը չունի չկատարված պարտավորություններ, կառավարության բոլոր պարտավորությունները կատարվել են, ըստ էության՝ մենք 2018 թ. ունեցել ենք ցածր գնաճային ֆոն, մեզ հաջողվեց զսպել գնաճը, տարվա արդյունքով ունեցանք գնանկում: Ոչ մի արտառոց բան տեղի չի ունեցել, թերակատարում մի փոքր ունենք ծախսային մասերում, սա մի քանի խնդիրների հետ կապ ունի, այդ թվում՝ կոռուպցիայի դեմ հայտարարված պայքարի հետ»,- ասաց Փաշինյանը:

Կառավարության ղեկավարը նաև տեղեկացրեց՝ եղել են խոշոր վարկային ծրագրերով իրականացվող նախագծեր, որոնց հետ կապված՝ բազմաթիվ հարցեր ունեն, հարուցված են քրգործեր, դրանց հարուցման լեյտմոտիվն այն է, որ իրենք համարում են, որ առիթ են ունեցել բազմիցս ասել`պետական բյուջեի, այդ թվում՝ վարկային միջոցները պետք է ծախսվեն մաքսիմալ արդյունավետ, դրա արդյունքում ՀՀ քաղաքացիները պետք է վստահ լինեն, որ ստանում են այն առավելագույն արդյունավետությունն ու որակը, որ կարող են ակնկալել: