Հոլանդացի ուսանողները գյումրեցի փոքրիկների համար խաղահրապարակ են կառուցում

Հոլանդացի ուսանողները գյումրեցի փոքրիկների համար խաղահրապարակ են կառուցում։ Մեկ ամիս է, որ Գյումրիի հաղթանակի զբոսայգուն կից նոր խաղահրապարակում շինաշխատանքներ են ընթանում: Այս մասին հայտնում է SHANTNEWS.am-ի  թղթակիցը։

Գյումրիում խաղահրապարակ կառուցելու գաղափարն ու ծրագիրը հոլանդացի ուսանողներինն է: Քոլեջներից մեկի ուսանողներն ու դասախոսները միասին եկել են Գյումրի` կամավորական աշխատանք կատարելու: Խաղահրապարակը կառուցվում է «Ալվան ծաղիկ» սոցիալ-կրթական կենտրոնի բակում, բայց այն կդառնա բոլոր փոքրիկների ժամանցի վայրը:

Հոլանդիայի «Քենդեյ» քոլեջի ուսանողները մի քանի ամիս առաջ չէին պատկերացնում, որ դպրոցական արձակուրդները  կանցկացնեն մի քաղաքում, որտեղ ոչ թե հանգստի, այլ բարեգործական նպատակներով կլինեն: Հոլանդացի ուսանողները դարձել են շինարարներ ու խաղահրապարակ են կառուցում գյումրեցի երեխաների համար: Գյումրիի մասին լսել են իրենց դասախոս Ռենե Բեոնքից, որի կապը Գյումրիի հետ սկսվել է 1988-ից հետո:

«Գյումրի եկա 1989 թվականին, երկրաշարժից  հետո ցանկություն հայտնեցի գալ ու օգնել աղետյալ քաղաքի բնակիչներին: Ավստրիական թաղամասում շինարարություն էինք անում: Այդ տարիներից հետո ես չկարողացա կապը կտրել Գյումրիի հետ: Միշտ պատմում եմ իմ ուսանողներին, թե Գյումրին ինչ քաղաք է ու ինչու է անհրաժեշտ օգնել  այս քաղաքի փոքրիկներին»,- մեր թղթակցի հետ զրույցում ասել է «Քենդեյ» քոլեջի դասախոս Ռենե Բեոնքը։

«Երբ մեր դասախոսը պատմեց մեզ Գյումրիի մասին, հասկացանք , որ այստեղի  շատ մանուկներ դեռ   խաղահրապարակներ չունեն: Մեր ծրագիրը, երբ քոլեջի տնօրինությունը հաստատեց, սիրով համաձայնեցինք գալ  Գյումրի, որպեսզի այստեղ կառուցենք  այդ խաղահրապարակը»,- ասել է Գում Վոսորսը։

Ծրագիրը հավանության արժանացել էր, քաղաքն էլ հայտնի էր, բայց ուսանողների համար ամենաբարդ փուլը ֆինանսական միջոցներ հայթայթելն էր: Հանգանակություն են կազմակերպել իրենց քոլեջում, իրենց ձեռքի աշխատանքներն են վաճառել ու երկու ամսում կարողացել են անհրաժեշտ գումարը հավաքել:

«Գումարը պետք էր, որպեսզի մենք շինանյութ գնեինք: Սկսեցինք պլաստմասսե շշեր հավաքել, վաճառել, թխվածքներ պատրաստել ու դրանք վաճառել մեր քոլեջում: Գիտեք` ամենակարևորը ո՞րն էր, որ երբ մենք մարդկանց ասում էինք, թե ինչի համար է այդ գումարը, ոչ ոք չէր հրաժարվում մեզ օգնել»,- ասել է ուսանողներից Լին Աշլինգը։

8 ուսանողով ու երկու դասախոսով խաղահրապարակում տարբեր աշխատանքներ են կատարում` տղաները հողային, աղջիկները,  որքան էլ զարմանալի է, ներկարարությունից մինչև զոդման աշխատանքներ: 16 տարեկան է Յուլյա Ալավիտալոն, նա, ուսմանը զուգահեռ, զոդողի մասնագիտությունն է սովորել իր պապից։

«Ես աշխատում եմ մեր քաղաքում, նաև մեքենաներ եմ վերանորոգում: Երբ քննարկում էին, թե այս ծրագրին ինչ մասնագետներ են պետք, ես վստահաբար ասացի, որ զոդելու-եռակցելու աշխատանքներում ես կարող եմ օգտակար լինել: Եվ հիմա տեսաք, թե ինչպես աստիճանների համար բազրիքներ պատրաստեցի: Դրանք  ամուր են ու ապահով փոքրիկների համար»,- ասել է Ալավիտալոն։

Խաղահրապարակից հետո հոլանդացի կամավորները կանցնեն «Ալվան ծաղիկ» սոցիալական  կենտրոնի  նախակրթարանի վերանորոգմանը, որտեղ մարզի տարբեր գյուղական համայնքներից փոքրիկներ են հաճախում:

Հոլանդացի ուսանողները, երբ շինարարության փուլն ավարտեն, դատարկ չեն թողնելու խաղահրապարակը, այստեղ տեղադրելու են խաղեր, իսկ կենտրոնում հայոց այբուբենի պատն են ստեղծելու, որպեսզի փոքրիկները տառաճանաչ դառնան, գուցե նաև հենց իրենք` հոլանդացի ուսանողները, ցանկություն ունենան հայերեն սովորել: