Լեոնարդո դի Կապրիոյի կյանքի կանոնները

Լեոնարդո դի Կապրիո: Նրա անունը գիտեն բոլորը, անգամ նրանք, որոնք շատ հեռու են ֆիլմերից և կինեմատոգրաֆիական աշխարհի գործերին առհասարակ չեն խառնվում:

Այս դերասանի՝ «Օսկար» ստանալ-չստանալու հարցը տարիներ շարունակ հուզում էր բոլորին, իսկ երբ դերասանը «Փրկվածը» ֆիլմի համար ստացավ այդքան սպասված արձանիկը, բոլորն իրենց պարտքը համարեցին «Ֆեյսբուքում» գրառում անել «Լեոոոոոո՜, Օսկաաա՜ր» բովանդակությամբ, իսկ մինչ աշխարհը տոնում էր Լեոյի հաղթանակը, նա իր բաղձալի արձանիկը մոռացել էր «Օսկարի» մրցանակաբաշխությունից հետո կազմակերպված խնջույքին:

Բոլոր ժամանակների ամենահայտնի «Տիտանիկ» ֆիլմի իտալական, գերմանական և ռուսական արմատներ ունեցող դերասանը արդեն հասցրել է մարմնավորել բազմաթիվ պատմական և բազմաշերտ հոգեբանություն ունեցող կերպարների: Դի Կապրիոն ընկերություն է անում համաշխարհային կինեմատոգրաֆիայի Օլիմպոսի ռեժիսորների հետ՝ Ջեյմս Քեմերոն, Ալեխանդրո Գոնսալես Ինիարիտու, Սթիվեն Սփիլբերգ, Քրիստոֆեր Նոլան, իսկ Մարտին Սկորսեզեն իր ֆիլմերը չի պատկերացնում առանց Լեոյի:

Դերասանական և պրոդյուսերական գործունեությունից բացի՝ Դի Կապրիոն նաև զբաղվում է բարեգործությամբ ու շրջակա միջավայրի պաշտպանության հարցերով:

Այսօր այս տաղանդավոր և սրտակեր դերասանը դառնում է 43 տարեկան:

ShantNews-ը  ներկայացնում է դերասանի կյանքի կանոնները:

Ուշադիր հետևիր այն մարդկանց գործունեությանը, որոնք չեն ուրախանում քո հաջողություններով:

Անկեղծ ասած՝ ես չէի էլ ակնկալում «Օսկար» ստանալ իմ կատարած աշխատանքի դիմաց: Առհասարակ մրցանակաները ինձ համար երբեք էլ չեն հանդիսացել մոտիվացնող երևույթներ: Ես ոգեշնչվում եմ միայն այն բանից, որ հնարավորություն եմ ստանում աշխատել լեգենդար մարդկանց հետ և նրանց հետ ստեղծել մի բան, որով ես հետագայում կհպարտանամ:

Եթե դու հնարավորություն ունես քո կյանքում զբաղվել այն գործով, որն իրոք քեզ հաճույք է պատճառում և երջանկացնում, ապա համարիր, որ դու բազմաթիվ մարդկանցից բավականին առաջ ես անցել այս կյանքում:

Ես այն մարդկանցից չեմ, որոնք ձգտում են լինել նորաձև ու զիլ դեմք: Ես պարզապես ես եմ …  

Դերասանների աշխատանքի առավելություններից է, երբ դու պարզապես մարմնավորում ես մի կերպարի, թափանցում ես նրա բնավորության ամենանեղ շրջանակները և միայն դրա համար քեզ տալիս են շատ բարձր հոնորարներ: Ես հիմա չգիտեմ՝ ով եմ, ես միշտ փոխվում եմ:

Եթե չունես կյանքի նպատակ, ապա սկսում ես աշխատել ուրիշների նպատակների համար:

Կարծում եմ, որ ԱՄՆ-ի գլխավոր խնդիրն այն է, որ ձգտում է կարգ ու կանոն հրավիրել այն երկրներում, որոնցից ընդհանրապես գաղափար չունի:

Չեմ սիրում դպրոցները: Այնտեղ ստիպում են կենտրոնանալ այնպիսի առարկաների և երևույթների վրա, որոնց մասին առհասարակ չես էլ ցանկանում իմանալ:

Կարծում եմ, որ փաստավավերագրական ֆիլմերում ռեժիսորն Աստված է:

Փառքը կարծես ունիվերսալ անցաթուղթ լինի՝ կարող ես քո ցանկացած վայրը գնալ քո ցանկացած ժամին:

Ես չունեմ քաղաքական ասպարեզում հաստատվելու ձգտումներ և չափազանց վախենում եմ այն մարդկանցից, որոնք դա ունեն:

Ես հավանում են ամենահասարակ աղջիկներին, որոնց ամեն օր տեսնում ենք փողոցում՝ աշխատանքի շտապելիս, ուսանողուհիներին, մատուցողուհիներին և այլն: Շատ հաճախ են ինձ տեսնում երեկույթներին սովորական աղջիկների հետ, որոնց հետ ինձ զուտ ընկերությունից բացի համարյա ոչինչ չի միավորում: