Սպորտը պետք է օգնի միավորել մարդկանց. ռուսաստանցի ֆուտբոլային մեկնաբան

Ռուսաստանցի հայտնի ֆուտբոլային մեկնաբան Նոբել Առուստամյանը SHANTNEWS.am-ի հետ զրույցում խոսել է Հենրիխ Մխիթարյանի՝ Բաքու չմեկնելու, Եվրոպա լիգայի եզրափակչին չմասնակցելու որոշման մասին:

– Ի՞նչ եք կարծում, որքանո՞վ է Բաքուն համապատասխանում Եվրոպա լիգայի հյուրընկալ քաղաքի կարգավիճակին:

– Կարծում եմ, որ սպորտը պետք է քաղաքականությունից դուրս լինի: Տվյալ պարագայում տխուր է, ցավալի, որ Հենրիխ Մխիթարյանը և առհասարակ հայ երկրպագուները չեն կարող մասնակցել Եվրոպա լիգայի եզրափակչին, քանի որ դա մեծ իրադարձություն է: Ցավոք, տհաճ իրավիճակ է, այն ձևավորվել է տարիների, տասնամյակների ընթացքում:

– Տարբեր մարզական լրագրողներ, նախկին ու ներկա ֆուտբոլիստներ քննադատել են ՈՒԵՖԱ-ին՝ Եվրոպա լիգայի եզրափակիչը Բաքվում անցկացնելու համար, ի՞նչ կարծիք ունեք:

– Եվրոպայի համար ամեն ինչ պարզ ու հասկանալի է, կան ծանոթ երկրներ, քաղաքներ, որտեղ նրանք պարբերաբար խաղում են մրցաշարերի եզրափակիչներում, այդ թվում՝ Մադրիդը, Փարիզը, Լոնդոնը, Բեռլինը, Միլանը և այլն: Երբ նրանց առաջարկում են մեկնել նոր երկիր, նոր քաղաք, դա փոքր-ինչ վախեցնող է: ՈՒԵՖԱ-ն ու ՖԻՖԱ-ն վաղուց են աշխատում, նրանք հնարավորություն են տալիս անկանխատեսելի երկրներին ու քաղաքներին: Ինչ վերաբերում է Մխիթարյանի հետ կապված պատմությանը, իհարկե, այդ պատմությունն ազդեցություն կունենա հասարակական կարծիքի վրա: Ես այստեղ թեման կբաժանեի երկու մասի: Մի կողմից` կա Բաքուն, որտեղ Եվրոպա լիգայի եզրափակիչն անցկացնելը ռեալ է, և հույս ունեմ, որ մի օր էլ Երևանը կյուրընկալի սպորտային նման մեծ իրադարձությունը: Մյուս կողմից` կա Մխիթարյանի և անվտանգության հետ կապված իրավիճակը:

– Անվտանգության հետ կապված ի՞նչ կարծիք ունեք: «Արսենալ»-ը, օրինակ, մտածել է, որ Մխիթարյանի մասնակցելը Բաքվում կայանալիք Եվրոպա լիգայի եզրափակչին անվտանգ չէ: 

– Վստահ եմ, որ «Արսենալ»-ը շատ լուրջ ակումբ է, կարծում եմ, որ նրանք բազմակողմ ուսումնասիրություններ են իրականացրել, քննարկել են անգլիական հատուկ ծառայությունների հետ: Կարծում եմ, որ «Արսենալ»-ը ու նաև Հենրիխը չեն ցանկացել ռիսկի դիմել: Հասկանալի է, որ կային անվտանգության երաշխիքներ, բայց, եթե որոշել է «Արսենալ»-ը, որոշել է Հենրիխը, ուրեմն դրա համար լուրջ հիմքեր կան: Շատ ցավալի է: Եթե անկեղծ ասեմ, մտածում էի, որ կստացվի այդ եզրափակչի միջոցով մեկ քայլ անել, որպեսզի հայ երկրպագուները, Մխիթարյանը մեկնեին այնտեղ, որպեսզի իրավիճակն ինչ-որ կերպ կարգավորվեր:

– Նման այլ իրավիճակներ հիշո՞ւմ եք, երբ Եվրագավաթի եզրափակչի շուրջ նման աղմուկ բարձրանար: 

– Իհարկե, բազմաթիվ ու տարբեր պատմություններ են եղել: Պարզապես պետք է կրկնեմ, որ կարևոր է, որպեսզի սպորտը և քաղաքականությունը տարանջատված լինեն: Սպորտը պետք է օգնի միավորել մարդկանց, դա ամենակարևորն է:

– Այն, որ Հենրիխ Մխիթարյանը չի մասնակցի Եվրոպա լիգայի եզրափակչին, դա որևէ կերպ կազդի՞ խաղի ելքի վրա: 

– Հենրիխ Մխիթարյանը եվրոպական ֆուտբոլի աստղ է: Իհարկե, նա պետք է խաղա նման մրցաշարերում: Նա կարևոր խաղացող է «Արսենալ»-ի համար, իհարկե, կազդի «Արսենալ»-ի խաղի վրա: Հուսով եմ, որ Հենրիխը դեռ շատ եզրափակիչներ կունենա: