Չի կարելի այդպիսի բան անել, ամեն ինչ անում ենք, որ հետ գնանք. վարչապետը զայրացավ

Կառավարության այսօրվա նիստում՝ «Պետական կենսաթոշակների մասին» փոփոխություններ կատարելու վերաբերյալ օրենքի նախագծի քննարկման ժամանակ, ՀՀ աշխատանքի և սոցիալական հարցերի նախարար Զարուհի Բաթոյանը, արձագանքելով առաջարկվող փոփոխություններից մեկին, տեղեկացրեց, որ իրենք ևս ներկայում քննարկում են կենսաթոշակառուին տարեկան մեկ անգամ բանկ ներկայանալու պարտավորությունից ազատելու հարցը:

Սա առաջացրեց վարչապետ Նիկոլ Փաշինյանի զարմանքն ու դժգոհությունը: Նախարարը մանրամասնեց՝ բանկ ներկայանալու անհրաժեշտությունը կապ չունի ողջ լինելու փաստն արձանագրելու հետ, դա կարող է իրականացվել սոցիալական աշխատողի կամ բանկի աշխատակցի միջոցով:

«Բոլոր դեպքերում ես լավ չեմ հասկանում այն նախագծերը, որ մեզ առաջարկում են հետ գնալ: Ասում են՝ մեր հիշողությունը կարճ է, բայց այդքան էլ կարճ չէ: Այս ամենը ինչի՞ց է առաջացել, այն բանի արդյունքում, երբ պարզվել է, որ Հայաստանում տասնյակ հազարով թոշակառուներ կան, որոնք գոյություն չունեն, և որոնք թոշակ են ստանում, ինչի արդյունքում պետությանը միլիարդների վնաս է պատճառվել: Հիմա մենք առաջարկում ենք էլի մեխանիզմ ստեղծել, որ էլի միջանցքներ թողնենք, որ նույն բանը տեղի ունենա՞: Անհասկանալի տրամաբանություն է, այսինքն՝ տասը տարի անցավ, բոլորս մոռացանք, ամեն ինչ սկսում ենք զրոյի՞ց»,- հարց ուղղեց Փաշինյանը:

Վարչապետն ասաց, որ բացարձակապես չի ընդունում այդ տրամաբանությունը, կարծում է՝ պետք է մարդկանց օգնել, որ հավաստագրումն ավելի հեշտ տեղի ունենա, բայց դա պետք է անել առաջ գնալու ճանապարհով: Կառավարության ղեկավարը, դիմելով Բաթոյանին, շեշտեց՝ պետք չէ նման բան քննարկել ընդհանրապես:

«Մինչև այսօր Հայաստանում գոյություն ունեն գոյություն չունեցող նպաստառուներ, մեզնից մեծ ջանքեր է պահանջում այդ համակարգի հետևից գնալը: Փոխանակ մտածենք՝ ոնց անենք, գոյություն չունեցող նպաստառուներ գոյություն չունենան, ասում ենք՝ եկեք միջանցք բացենք, որ նորից գոյություն ունենան գոյություն չունեցող թոշակառուներ»,- ասաց նա:

Բաթոյանն արձագանքեց, որ նախագիծը քննարկվելու է, և խոսքը բացառիկ դեպքերի մասին է, երբ մարդիկ ունեն այդ լիազորությունները:

Փաշինյանը նշեց.

«Նախկին մեխանիզմը այդ նույն մարդիկ չե՞ն ստեղծել, նույն մարդիկ են ստեղծել, որոնք իրավասություն են ունեցել հավաստագրելու՝ մարդը կա, թե չկա: Այսօր 21-րդ դարն է, ամիսը մեկ անգամ կարող է սկայպով զանգել, անձամբ խոսել: Ամեն ինչ անում ենք, որ հետ գնանք: Փոխանակ մտածենք՝ ոնց անենք, հայտնվենք 2030թ. հնարավորինս շուտ, ամեն ինչ անում ենք, որ հայտնվենք 1997-ում: Չի կարելի այդպիսի բան անել: Պաշտոնյա ենք դնում, որ հաստատի՝ մարդը կենդանի՞ է, թե՞ չէ, դա նշանակում է, այդ պաշտոնյային հնարավորություն ենք տալիս, որ գոյություն չունեցող թոշակառուի թոշակը ինքը ստանա, նման բան ոնց կարելի է թույլ տալ»:

ՀՀ արդարադատության նախարարի արձագանքին, թե այս պահի դրությամբ սկայպի միջոցով կապ հաստատելու՝ վարչապետի առաջարկի իրագործումը հնարավոր չէ, Փաշինյանը պատասխանեց, որ պետք է հնարավոր դարձնել:

«Հայաստանն ուզում ենք հետ գլորենք 1950 թ., իբր մարդու իրավունքներն ենք պաշտպանում: Ո՞նց ենք պաշտպանում էն մարդու իրավունքը, որ, ենթադրենք, մի «խուտըռ»-ում անկողնային պաrկած է, Մոսկվայից հյուպատոսը գնալու է, հավաստիացնի, հետ գա՞: Մենք տենց արտագնա հյուպատեսական ծառայություն ունե՞նք, կամ, որ 15 օր գնա-գա, այդ ընթացքում հյուպատոսական ծառայության առջև հերթ կանգնածների իրավունքն ո՞վ է պաշտպանելու»,- ասաց վարչապետը:

ՀՀ տրանսպորտի, կապի և տղեկատվական տեխնոլոգիաների նախարար Հակոբ Արշակյանը հայտնեց, որ խնդրի լուծման ժամանակակից տարբերակներ կան, պատրաստակամություն հայտնեց համագործակցել:

Վարչապետն արձագանքեց.

«Այսօր ծրագրեր կան, որ փողոցում տեսախցիկը կախում ես, մարդը տակով անցնում է, անուն-ազգանուն, հեռախոսի համարը, կոշիկի ռազմերը, երեկ ինչ է կերել, ում տուն է հյուր գնացել, ում է բարևել, լրիվ ասում է, մենք դրել, ինչ ենք քննարկում»: