1 մլն հեռախոսազանգ, 2300 հրդեհ, քարաթափման, փլուզման ու սողանքի դեպքեր. Ֆելիքս Ցոլակյանն ամփոփել է վերջին 6 ամիսների աշխատանքը

Արտակարգ իրավիճակների նախարարությունը վերջին 6 ամիսների ընթացքում 1 մլն հեռախոսազանգ է սպասարկել: Այս մասին այսօր՝ ապրիլի 19-ին, ասաց ՀՀ արտակարգ իրավիճակների նախարար Ֆելիքս Ցոլակյանը: Տարվա կտրվածքով զանգերի թիվն անցնում է 2.5 մլն-ը, սակայն դրանց միայն մի մասն է եղել ահազանգ՝ 18-20 հազարը, մնացած զանգերը եղել են տեղեկատվական բնույթի են եղել:

Ամփոփելով ԱԻՆ-ում իր գործունեության ամիսները` նախարարը նշեց, որ գրանցվել է 2300 հրդեհ, ամենամեծն իր մասշտաբներով եղել է Վահագնաձորի հարակից անտառում բռնկված հրդեհը, որի աշխատանքներին նախարարն իր անմիջական մասնակցությունն է ունեցել:

«Այլ բան է, երբ լսում ես, այլ բան է, երբ անձամբ տեսնում ես: Այդ աշխատանքներին մասնակցությունն օգնեց մեզ հասկանալ, թե որտեղ են բացերը, և նաև հետևություններ անել: Դրանց մասին առաջիկայում կտեղեկացնենք»,- ասաց նախարարը:

Վերջին 6 ամիսների ընթացքում գրանցվել է քարաթափման 29, փլուզման 43, սողանքի 2 դեպք, կոմունալ կենսապահովման համակարգերի վթարների 13 դեպք: Բոլոր դեպքերում փրկարարներն ակտիվ մասնակցություն են ունեցել:

«Սա ամենօրյա ծանր աշխատանքի մի մասն է, բայց, ցավոք, մի քանի հազար մարդկանց կյանք փրկելուն զուգահեռ, նաև զոհեր են լինում: Կոչ եմ անում քաղաքացիներին բարձրացնել զգոնությունը: Այսօր մենք հասել ենք մի պրոֆեսիոնալ մակարդակի, որ կարող ենք արդեն օգնության ձեռք մեկնել մեր բարեկամներին, եթե աղետ է: Վերջերս մեր ավտոշարասյունն Իրան մեկնեց՝ օգնություն ցույց տալու ջրհեղեղից տուժածներին»,- նշեց նախարարը՝ մեծ կարևորություն տալով փրկարարի ու քաղաքացու ամենօրյա կապի առկայությանը:

Նախարարը կարևորել է նաև միջազգային կառույցների հետ աշխատանքը, որը բարձր մակարդակի վրա է: Վերջին մի քանի ամիսների ընթացքում հաջողվել է լուծել նաև փրկարարների համազգեստի խնդիրը, որը երկար ժամանակ չի լուծվել: Այսօր փրկարարները կարող են ստանալ այնքան համազգեստ, որքան նախատեսված է օրենքով: Լուծված է նաև փրկարարների վառելիքի հարցը:

«Երկարատև աշխատանքի արդյունքում հասանք նրան, որ ամենածայրամասային հրշեջ փրկարարական ջոկատը ստանում է վերջին կաթիլ վառելիքը, որ նախատեսված է օրենքով և այդպես չի եղել: Ձմեռվա սեզոնին ունենք տեղեր, որ կուտակումներ են լինում թե´ մարդկային, թե´ մեքենաների: Որպեսզի այստեղ կարողանանք օպերատիվ օգնել մարդկանց, իմ հրամանով այստեղ ստեղծվեցին հենակետեր ու ժամանակավոր կացարաններ՝ տնակների ձևով, և մեր փրկարարները շուրջօրյա հերթապահություն են կատարում այդ տեղերում, ինչը մեծ օգուտ տվեց: Սիսիանի զանգեր, Սելիմի լեռնանցք, Աշոցքի տարածք, Քարվաճառի ճանապարհը: Ու, բարեբախտաբար, ծանր դեպքեր այդ հատվածներում չենք ունեցել, և սա շարունակական աշխատանք է»,- ընդգծեց Ֆելիքս Ցոլակյանը:

Խոսելով աշխատավարձերի մասին` նախարարն ասաց, որ փրկարարների աշխատավարձը ցածր է, և կարողացել են հասնել նրան, որ կառավարությունն օգնություն է ցուցաբերել, և արդյունքում փրկարարները տարեկան 4 անգամ պարգևավճարներ են ստանում իրենց աշխատավարձի չափով: Թեև ոչ ամբողջությամբ, բայց փոքր ինչ վիճակը թեթևացնում է: Նախարարը նաև տեղեկացրեց, որ աշխատավարձի բարձրացման հարցը ևս ուշադրության կենտրոնում է: