Նայելով այս մթնոլորտին` կարող եմ ասել, որ ոչ մի լավ բան չի կարող լինել. Ծառուկյանը՝ խորհրդարանի մասին

ԱԺ «Բարգավաճ Հայաստան» խմբակցության առաջնորդ Գագիկ Ծառուկյանը ԱԺ-ում պատասխանել է լրագրողների հարցերին:

Նա նշել է, որ շատ համբերատար է, հանգիստ է, սակայն այսօր նայում է խորհրդարանին և հասկանում, որ այս սկզբունքով և մոտեցումով որևիցե առաջարկ, որը արդյունավետ կլինի տնտեսության, քաղաքացու, գյուղացու համար, չկա.

«Ամեն մեկը կանգնում է, մի բան ասում, պատասխանում մյուսին: Ես, նայելով այս մթնոլորտին, մի բան կարող եմ ասել, որ ոչ մի լավ բան չի կարող լինել»:

Նա անդրադարձավ այն դիտարկմանը, թե ինքն ԱԺ-ում քիչ է ելույթ ունեցել և ասաց, որ այդ ամենը ասողը իր արածի անգամ չնչին տոկոսը չի արել.

«Ծառուկյանի թիմը Ծառուկյանը չի՞»:

Գագիկ Ծառուկյանը մեկնաբանեց «Իմ քայլը» խմբակցության պատգամավոր Վահագն Հովակիմյանի այն դիտարկումը, թե ԲՀԿ խմբակցության ղեկավարը հաճախ հաճախ ելույթ չի ունենում և նշել է, որ միայն դատարկ խոսելը կարևոր չէ.

«Եթե նայելով տվյալ բանը ասած մարդուն, որ ինքը իրական կյանքում ոչ մի բան չի արել և 10 տարի «Հայկական ժամանակում» աշխատել է որպես հասարակ լրագրող և 18 անգամ էլ գործից հանել են, այդ մարդը իրավո՞ւնք ունի Ծառուկյան անունը ասելու: Նա համեմատական կարգով պետք է նայի, թե ում մասին է խոսում, ու Ծառուկյանը ինչ է արել: Չեմ ուզում խոսել այս մասին, ժողովուրդը գործ է ուզում, ոչ թե դատարկ-դատարկ խոսել»:

Գագիկ Ծառուկյանը նշեց, որ եթե իր աշխատաոճի առնվազն 3 տոկոսը ցանկացած պատգամավոր կատարած լիներ, ապա մեր երկիրը կզարգանար:

ԲՀԿ խմբակցության ղեկավարը նաև անդրադարձավ «Առինջ մոլ»-ում ՊԵԿ-ի կողմից իրականացված ստուգումներին և այն դիտարկմանը, թե այնտեղ հարկեր են թաքցվել.

«Եթե շուկան 3 տարի հարկ չի վճարել, ասենք թե Երևանի ծայրամասում է, մարդիկ չեն գնում. մեկ տրանսպորտ էր գնում այնտեղ, այն էլ հանեցին: Մինչև այսօր էլ ես գումար եմ տալիս, որ մարդիկ երկրից չթողնեն, չգնան»:

Գագիկ Ծառուկյանը նշեց, որ ՊԵԿ-ի աշխատակիցը 50 դրամի համար ՀԴՄ չտրամադրելու հարցով 170 հազար տուգանք է գրել առևտրի աշխատակիցներից մի մարդու, որն օրական ընդամենը 5000 դրամ է աշխատում, ընտանիք է պահում:

Հիշեցնենք` այսօր ԱԺ-ում «Իմ քայլը» խմբակցության անդամ Վահագն Հովակիմյանը խորհրդարանում արձագանքել է «Բարգավաճ Հայաստան»-ի քննադատությանը` ասելով հետևյալը.

«Երբ հայտարարեցի հիշողությունը չկորցնելու մասին, հարգարժան գործընկերս նույնիսկ նեղսրտեց, թե հիշողությունը չկորցնելու համար պետք է հիշողություն ունենալ ու անմիջապես ինձ մեղադրեց կոստյումի հետ կապված արտահայտություն անելու համար, այն դեպքում, երբ այդ մասին հայտարարել էր այլ պատգամավոր: Պետք է հիշողություն ունենալ ու հիշել, որ իրենց խմբակցության ղեկավարը, լինելով 16 տարվա պատգամավոր, առաջին անգամ ելույթ է ունեցել այս տարվա հունվարին»:

Պատգամավորը շեշտել էր՝ դիմացինին մեղադրելու համար պետք է հիշել սեփական խմբակցության ելույթ ունեցող, հրապարակային միտք արտահայտող կազմը, այն դեպքում, որ 4 գումարում իրենց խմբակցությունն ԱԺ-ում մոտ 3 տասնյակ պատգամավորով ներկայացված է եղել, բայց միշտ ԱԺ ամբիոնից ելույթ է ունենում 5-6 պատգամավոր:

Նրան արձագանքել էր ԲՀԿ-ից Գևորգ Պետրոսյանը: