Որևէ մեկը չի կարող մեզ հետ «ռազբորկա» անել, որևէ մեկը չի կարող մեզ հետ «ռազբորկաների» լեզվով խոսել. Մարուքյան

ԱԺ միջանցքում «Լուսավոր Հայաստան» խմբակցության ղեկավար Էդմոն Մարուքյանը լրագրողների հետ զրույցում անդրադարձավ  նախորդ օրն ԱԺ պատգամավոր Մխիթար Հայրապետյանի հետ ունեցած բանավեճին և մամուլում տարածված այն լուրերին, թե հետո նաև «ռազբորկա» է եղել:

«Դահլիճից դուրս ենք եկել, խոսել ենք, որ տարընթերցումներ չլինեն, որովհետև կողմերն իրար սխալ էին հասկացել: Գևորգ Գորգիսյանը մեծ հաշվով չէր ընդհատել, այլ տեղից ինչ-որ միտք էր ասել, որն իրեն չէր վերաբերվում, այլ մեզ էր վերաբերվում»:

Իսկ այն հարցին, թե արդյո՞ք հաշտեցում եղել է, Մարուքյանը նշել է, որ կռիվ չի եղել, որ հաշտեցում էլ լիներ:

«Որևէ մեկը չի կարող մեզ հետ «ռազբորկա» անել, որևէ մեկը չի կարող մեզ հետ «ռազբորկաների» լեզվով խոսել: Էդ տեղեկությունները չեն համապատասխանում իրականությանը: Հա եկել էր, խոսել ենք, բայց դա «ռազբորկա» չէ, դա արդեն ձեր մեկնաբանություններ են»,- նշեց Մարուքյանը:

«Հարաբերությունները չէին խաթարվել, որ հարթվեին: Քաղաքական ամբիոնից էմոցիոնալ ելույթներ են լինում, այսօր էլի եղան և միշտ լինելու են: Դրանք բանավեճեր են: Մարդիկ քարից չեն, ռոբոտներ չեն, և, այո՛, մարդիկ լինում են էմոցիոնալ: Նայեք աշխարհի բոլոր պառլամենտների ելույթները, որևէ մեկը ռոբոտի պես չի խոսում: Մենք ընդդիմադիր ուժ ենք, մեր գործով ենք զբաղված: Լավ բան ա, ասում ենք՝ լավ  բան ա, կողմ ենք: Վատ բան ա, ասում ենք՝ վատ բան ա, առաջարկություններ ենք անում: Մենք հո մերկապարանոց չե՞նք քննադատում: Առաջարկությունը բերել ենք, չէ՞: Սա է ընդդիմադիր Հայաստանը: Սովորե՛ք: Նոր Հայաստանում էսպես պետք ա լինի»:

Լրագրողները նաև փորձեցին պարզել` արդյո՞ք Էդմոն Մարուքյանը Նիկոլ Փաշինյանին կհարցնի, թե ուժային մարմինների կարգավիճակի փոփոխության հետ կապված իր խոստումը ինչո՞ւ չի պահել,  ինչպես ժամանակին հարցնում և հիշեցնում էր Սերժ Սարգսյանին խոստումը չպահելու մասին: Մարուքյանը վստահեցրեց՝ հարցուպատասխանի ժամանակ արդեն նախատեսել են հարցնել:

«Էդ հարցն արդեն դրված է քաղաքական ամենաբարձր հարթակում: Էդ հարցին էսօր 88 հոգի չպատասխանեց, մնաց 1 հոգի»:

Էդմոն Մարուքյանը պատասխանեց նաև նախորդ օրը ՍԴ դատավորի պաշտոնում  Գոռ Հովհաննիսյանի թեկնածության շուրջ քվեարկությանը:

«Մենք ընտրել են Գոռ Հովհաննիսյանին, որովհետև գտնում ենք, որ նա կարող է լինել անկախ, անաչառ ՍԴ դատավոր: Նա կապ չուներ ո՛չ նախորդ իշխանությունների հետ, ո՛չ ներկա: Ծառայություններ չէր մատուցել ո՛չ նախորդ իշխանություններին, ո՛չ ներկա: Կարող ա մի քիչ հռետորական արվեստին չէր տիրապետում, բայց նա լավ իրավաբան- գիտնական է, և առանձին հանդիպման ժամանակ էլ համոզվել էինք, որ կարող է լինել ՍԴ լավ անդամ: Ես դեռ երեկ ԱԺ նախագահին ասացի, եթե այս մարդն արդեն թեկնածու է, դուք գրանցել եք թեկնածու, ուրեմն մենք մասնակցում ենք քվեարկությանը: Եվ եթե թեկնածու ա, ինչի՞ եք վիճարկում թղթերը: Ես հարցուպատասխանից հասկացա, որ տրամադրվածություն կար, բայց չհասկացա, թե ինչու, կարող եք ճշտել իրենցից»: