Արարատ Միրզոյանն արձագանքեց Էդմոն Մարուքյանի ելույթին

ՀՀ ԱԺ նախագահ Արարատ Միրզոյանն ապրիլի 16-ի նիստում, օգտվելով արտահերթ ելույթի իր իրավունքից, արձագանքեց «Լուսավոր Հայաստան» խմբակցության ղեկավար Էդմոն Մարուքյանի ելույթին:

«Պարոն Մարուքյանը ճիշտ տեղ հասավ, այդտեղից կշարունակեմ. ինչո՞ւ է ԱԺ նախագահն ընդունել այս թեկնածությունը, եթե այն ֆորմալ առումով այդքան խոցելի էր: Հանրապետության նախագահն առաջադրել է Գոռ Հովհաննիսյանի թեկնածությունը: Ինչպես հարկն է, այստեղ ուսումնասիրել ենք փաստաթղթերը, պարզել, որ թեև Սահմանադրության 20-րդ հոդվածի համաձայն՝ ՀՀ պետական լեզուն հայերենն է, օրենսդրության համաձայն՝ լեզվի մասին օրենքով և այլ իրավական ակտերով, պետական մարմինները պարտավոր են փաստաթղթերի ստեղծման, ձևավորման, շրջանառության ապահովման և պահպանման գործընթացը, օրենքի իմաստով գործավարությունը կատարել գրական հայերենով: Ներկայացված փաստաթղթերի առնվազն զգալի մասը հայերեն թարգմանություն չեն ունեցել, ներկայացված են եղել օտար լեզվով, տվյալ դեպքում՝ գերմաներեն, բացի այդ, օրենքը հստակ սահմանում է՝ ինչպիսի փաստաթղթեր պետք է ներկայացվեն»,- ասաց նա:

Միրզոյանը թվարկեց՝ ինչ փաստաթղթերի ներկայացման պահանջ է սահմանվում օրենքով. կենսագրական տվյալները պարունակող քարտ՝ թեկնածուի իրականացրած մասնագիտական գործունեության ներկայացմամբ, համապատասխան ապացույցներ, այդ թվում՝ պաշտոնի անձնագիր կամ այլ փաստաթղթեր, որոնք հավաստում են մասնագիտական իրավաբանական ստաժ դիտարկող աշխատանքում աշխատանքային պարտավորությունները:

«Եթե իրավացիորեն հարցնում եք՝ ապացույցները կցված չէին, հայերեն չէր և այլն, ինչո՞ւ եք ընդունել, ասեմ՝ որովհետև կարելի է կառչել օրենքի տառից և խանգարել իրավասու մարմնին իրականացնել իրեն վերապահված լիազորությունները: Արդյո՞ք սա ճիշտ մոտեցում է: Ո՛չ, օրենքի տառը երբեք պետք է գերակա չլինի օրենքի ոգու նկատմամբ, պետք է թեկնածությունը գրանցել և հնարավորություն տալ՝ առաջարկելով շտկել ձևական սխալները: Սրա համար ես գրանցել եմ թեկնածուին և գրությամբ դիմել հանրապետության նախագահին՝ առաջարկելով լեզվական և այդ ապացույցների մասով շտկումներ անել, ի պատասխան՝ ստացել եմ նամակ, որտեղ մանրամասն նկարագրված է թեկնածության ձևավորման մրցույթի պրոցեսը»,- նշեց նա:

Միրզոյանն ասաց, որ իրեն հայտնել են՝ նախկինում այլ լեզուներով ներկայացված են եղել տարբեր թեկնածուներ, ԱԺ-ն առարկություն չի ունեցել, ասել են՝ պահանջը կփոխանցեն թեկնածուին, որից հետո նա ներկայացրել է նոր փաստաթղթեր, ընդ որում՝ նոր փաստաթղթերով ոչ թե հիմնավորվում են նախորդ կենսագրական քարտում կամ CV-ում նշված տվյալները, այլ ներկայացվում են նոր կենսագրական տվյալներ:

ԱԺ նախագահն ասաց, որ կան մի շարք հարցեր, որոնք անպատասխան են մնացել, և այստեղ, նրա գնահատմամբ, ԱԺ՝ որպես ինստիտուտի նկատմամբ մեր իսկ ունեցած հարգանքի խնդիր կան:

Միրզոյանը ելույթի ավարտին հիշեցրեց՝ հայ մարզիկները՝ Արսեն Ջուլֆալակյանը և այլք, փառահեղ մասնակցություն են ունեցել և մեդալներ են բերել, առաջարկեց ծափահարել: