Ի՞նչ նյութեր են հայտնաբերվել Բեն Լադենի համակարգչում

Կենտրոնական հետախուզական վարչությունը հրապարակել է ֆայլերի հերթական խմբաքանակը, որոնք հայտնաբերվել են «Ալ Քաիդայի» ղեկավար Ուսամա բեն Լադենի համակարգչում՝ նրա սպանությունից հետո:

Կայքում հրապարակված նյութերի շարքում նաև Բեն Լադենի օրագիրն է, Youtube-ից տեսանյութեր և մուլտֆիլմեր, ելույթների ձայնագրություններ, ինչպես նաև ընտանեկան ձայնագրություններ, այդ թվում «Ալ Քաիդայի» առաջնորդի որդու՝ Համզայի հարսանեկան արարողության տեսանյութը:

Որոշ նյութեր չեն հրապարակվել՝ ելնելով ազգային անվտանգության շահերից: Բացի այդ, չեն հրապարակվել այն նյութերը, որոնք վնասված էին, պարունակում էին հեղինակային իրավունքի խախտման տարրեր և պոռնոգրաֆիկ նյութեր: 

Սա արդեն Ուսամա բեն Լադենի նյութերի 4-րդ հրապարակումն է: ԿՀՎ տնօրեն Մայք Պոմպեոն հայտնել է, որ հինգշաբթի օրը հրապարակվել է 18.000 փաստաթուղթ, 79.000 ձայնագրություն և լուսանկարներ, 100.000 տեսանյութ:

«Այս նոր հրապարակումները ամերիկացիներին ավելի մեծ հնարավորություն կտան հասկանալ Ուսամա բեն Լադենի ծրագրերի ու գործողությունների մանրամսները: ԿՀՎ-ն կշարունակի փնտրել ուղիներ՝ հնարավորինս շատ տեղեկություն բացահայտելու և ամերիկյան հասարակությանը տրամադրելու համար»,- ասված է Պոմպեոյի հաղորդագրության մեջ:

Ի՞ՆՉ ԻՄԱՑԱՆՔ ԲԵՆ ԼԱԴԵՆԻ ՈՐԴՈՒ՝ ՀԱՄԶԱՅԻ ՄԱՍԻՆ

Համզան Ուսամա Բեն Լադենի սիրելի որդին էր: Տեսանյութը նկարահանված է Իրանում: 

Բեն Լադենը հարսանիքին ներկա չէ, սակայն ներկաներից մեկն ասում է, որ նորափեսայի հայրը ուրախ է և այդ ուրախությունը տարածվում է բոլորի վրա: Համզա բեն Լադենին համարում էին հոր հետնորդը՝ որպես «Ալ Քաիդայի» առաջնորդ: Վերջին շրջանում տարածվում էին տեսանյութեր, որտեղ Համզան սպառնում էր ԱՄՆ-ին, կոչ էր անում տապալել Սաուդյան Արաբիայի իշխանությունը և կողմ էր արտահայտվում Սիրիայի ջիհադիստներին:

Բեն Լադենի համակարգչի կոշտ սկավառակի վրա պահպանվել են այնպիսի մուլտֆիլմեր, ինչպիսիք են «Ցիպա ճուտիկը», «Երեք հրացանակիրները», ինչպես նաև Youtube-ում հայտնի տեսանյութերից «Չառլին դարձյալ կծեց մատս»: Համակարգչում տեղադրված էր նաև Final Fantasy VII խաղը:

Դատելով կոշտ սկավառակի պարունակությունից՝ Ուսամա բեն Լադենը նայում էր իր մասին ֆիլմեր, քանի որ հայտնաբերվել է նաև երեք փաստավավերագրական ֆիլմ՝ այդ թվում «Որտե՞ղ ես դու, Ուսամա բեն Լադեն» ֆիլմը:

«Ալ Քաիդայի» առաջնորդը հետաքրքրվում էր նաև National Geographic-ի արտադրանքով. «Քունգ Ֆու-սպանության վարպետությունը», «Կանաչ բերետավորները» (ԱՄՆ բանակի մասին), «Աշխարհի վատագույն թույնը» (օձերի մասին):

Ինչպես տեղեկացնում է ԿՀՎ-ն, այդ նյութերն ակնհայտ են դարձնում նաև «Ալ Քաիդայի» և ԴԱԻՇ-ի ահաբեկիչների գաղափարական տարբերություններն ու «Ալ Քաիդայի» ներսում առկա տարաձայնությունները: