Ո՞վ կդառնա «ժողովրդի ծառան». հայտնի են Ուկրաինայի նախագահական ընտրությունների ֆավորիտները

Ուկրաինայում ավարտվել են նախագահական ընտրությունները: Քվեաթերթիկների ավելի քան 60 %-ի հաշվարկի համաձայն՝ առաջատար է դերասան, երգիծաբան Վլադիմիր Զելենսկին: Նրա օգտին է քվեարկել ընտրողների 30.36%-ը: Զելենսկուն գրեթե երկու անգամ զիջում է գործող նախագահ Պյոտր Պորոշենկոն: Նա հավաքել է ձայների 16.65%-ը: Երրորդ տեղը գրավել է «Բատկիվշինա» կուսակցության ղեկավար Յուլյա Տիմոշենկոն՝ քվեների շուրջ 13%-ով, իսկ «Ընդդիմադիր բլոկի» համանախագահ Յուրի Բոյկոյի օգտին է քվեարկել ընտրողների ավելի քան 11%-ը: Ընտրություններին մասնակցությունը կազմել է 63.52%:

Ուկրաինայի նախագահական ընտրություններում առաջատար Վլադիմիր Զելենսկին «Ժողովրդի ծառան» հեռուստասերիալում մարմնավորում էր հասարակ քաղաքացու, որը դառնում է նախագահ: Սակայն Զելենսկու մասնակցությամբ երգիծական հեռուստասերիալը շուտով կարող է իրականություն դառնալ: Հենց սերիալի վերնագրով էլ Զելենսկին անվանել է իր կուսակցությունը՝ «Ժողովրդի ծառան»:

Վլադիմիր Զելենսկին ընտրարշավի ընթացքում լայնորեն օգտագործել էր սոցիալական ցանցերը՝ այսպիսով թիրախավորելով երիտասարդությանը: Ըստ արևմտյան վերլուծաբանների՝ Զելենսկուն հաջողություն է ապահովել նաև այն հանգամանքը, որ նա խոսում է թե՛ ուկրաիներեն, թե՛ ռուսերեն, ինչը նրան ձայներ է ապահովել Ուկրաինայի արևելքում, որտեղ հիմնականում խոսում են ռուսերեն:

Իսկ Զելենսկու «Աքիլլեսյան գարշապարը», ըստ արևմտյան լրատվամիջոցների, նրա մտերիմ հարաբերություններն են օլիգարխ Իգոր Կոլոմոյսկու հետ: Վերջինիս սեփականությունը հանդիսացող 1+1 հեռուստաալիքը նախընտրական շրջանում մեծապես սատարել է Զելենսկուն: Դերասանը, սակայն, բազմիցս հերքել է այն մեղադրանքները, թե ինքը օլիգարխ Կոլոմոյսկու խամաճիկն է:

Ի դեպ, Զելենսկուն է սատարում նաև Վրաստանի նախկին նախագահ, Օդեսայի նախկին նահանգապետ Միխայիլ Սաակաշվիլին:

Настоящее время հեռուստաալիքին տված հարցազրույցի ժամանակ Սաակաշվիլին ողջունել է ընտրությունների նախնական արդյունքները:

«Վլադիմիր Զենլենսկին մի մարդ է, որը շատ է սիրում Ուկրաինան: Այն կերպարը, որ նրանից փորձում են ստեղծել Պորոշենկոյի լրատվամիջոցները, չի համապատասխանում իրականությանը… Ճիշտ է, նա փորձ չունի, բայց ուկրաինացի քաղաքական գործիչների դեպքում փորձը վատ է: Ուկրաինացի քաղաքական գործիչների մեծ մասն ունի փորձ, թե ինչպես երկիրը դարձնել Եվրոպայի ամենաաղքատ երկիրը՝ ըստ ՀՆԱ-ի, նրանք ունեն կոռուպցիայի, ստելու և գողանալու փորձ, այնպես որ, այն, որ Զելենսկին փորձ չունի, միայն դրական է»,- ասել է Սաակաշվիլին:

Զելենսկին նույնպես դրական է արտահայտվել Սաակաշվիլիի մասին և պատրաստակամություն հայտնել համագործակցել նրա հետ:

Ուկրաինայի գործող նախագահ Պյոտր Պորոշենկոն իր ընտրարշավի հիմքում էր դրել հայրենասիրությունը և ռուսական ագրեսիային դիմակայումը: Պորոշենկոյի կարգախոսն էր «Բանակ, լեզու, հավատ», և նրա հիմնական թիրախը պահպանողական ուկրաինացիներն էին:

Պորոշենկոյի ընտրարշավին, սակայն, մեծ վնաս հասցրեց անցյալ ամիս տեղի ունեցած սկանդալը. նրա մտերիմ գործընկերոջ որդին մեղադրվեց ուկրաինական բանակին ռուսական մաքսանենգ պահեստամասեր վաճառելու մեջ, ինչը երկրի պետական բյուջեին ավելի քան 9 մլն դոլարի վնաս էր հասցրել:

Ընտրությունների նախնական արդյունքներով երրորդ հորիզոնական զբաղեցրած Յուլյա Տիմոշենկոն հայտարարել է ընտրախախտումների և սադրանքների մասին և այդ ամենի մեջ մեղադրել է Ուկրաինայի անվտանգության ծառայությանը:

Ի դեպ, ընտրությունների ընթացքում ոստիկանությունը ստացել է խախտումների մասին մոտ 2500 հաղորդում, սակայն միջազգային դիտորդները ընտրությունները արդար են գնահատել:

Ուկրաինայի ԿԸՀ-ն պաշտոնապես հայտարարել է ապրիլի 21-ին ընտրությունների երկրորդ փուլի անցկացման մասին, քանի որ թեկնածուներից ոչ ոք չի հաղթահարել անհրաժեշտ 50 տոկոսանոց շեմը:

Պյոտր Պորոշենկոն բավականին մարտական է տրամադրված երկրորդ փուլին: Նրա շտաբից բոլոր թեկնածուներին կոչ են արել հանգիստ ընդունել երկրորդ փուլում Պորոշենկոյի հաղթանակը:

Ընտրություններից հետո իր աջակիցների առջև ելույթի ժամանակ Պորոշենկոն հայտարարել է Ղրիմը և Դոնբասը վերադարձնելու մասին:

«Ապրիլի 21-ից հետո մենք կմտնենք շատ կարևոր մի փուլ և կվերադարձնենք բռնազավթված Ղրիմը և Դոնբասը… Ռուսաստանի ղեկավարը Ուկրաինայի համար երազում է փափուկ, մեղմ, անփորձ, թույլ, գաղափարապես անվճռական և քաղաքականապես անտարբեր նախագահ: Արդյո՞ք մենք նրան նման հնարավորություն կտանք», – ասել է Պորոշենկոն:

Իսկ մինչ այդ Ուկրաինայի գործող նախագահը հեգնական գրառում էր կատարել իր Twitter-յան էջում:

«Ռուսաստանի հետ այսպես թե այնպես ստիպված կլինենք նստել մեծ սեղանի շուրջ՝ մեր եվրոպական և ամերիկյան գործընկերների հետ միասին, սակայն Ռուսաստանը չեն ներկայացնելու Մաքսիմ Գալկինը կամ Եվգենի Պետրոսյանը, այլ, ի գիտություն բոլորիդ, Վլադիմիր Պուտինը»:

Так, і з Росією так чи інакше за великим столом з нашими європейськими та американськими партнерами прийдеться говорити. Але представлятиме її не Максим Галкін чи Євгеній Петросян, а, так, щоб ви знали про всяк випадок, Володимир Путін.

— Петро Порошенко (@poroshenko) March 31, 2019