Հենց հիմա կարող եք դա հայտարարել ու էս ամեն ինչին վերջակետ կդրվի․ Շիրակի մարզպետը՝ Անիի համայնքապետին

Այսօր աշխատանքային օրվա ավարտին Շիրակի մարզպետ Տիգրան Պետրոսյանը մարզպետարանում հանդիպում է ունեցել Անի խոշորացված համայնքի ղեկավար Արտակ Գևորգյանի, համայնքապետարանի աշխատակիցների, ավագանու անդամների և բնակիչներից մի քանիսի հետ։

Հանդիպման ընթացքում քննարկվել է Անի համայնքում շուրջ ութ ամիս ընթացող իրավիճակը, երբ մի խումբ բնակիչներ, ժամանակ առ ժամանակ փակելով համայնքապետարանի դուռը, իրենց դժգոհությունն են հայտնում համայնքապետի աշխատանքից ու պահանջում նրա հրաժարականը։ Մի քանի օր առաջ էլ մարզպետն իր աշխատասենյակում հանդիպում էր ունեցել նաև դժգոհ բնակիչների հետ։

«Հանդիպումների ընթացքում  երկու կողմերի հետ էլ ես ֆիքսել եմ մի կարևոր բան, այսօր մենք ձեր համայնքում ունենք իրավիճակ, որը ըստ էության՝ պիտի լուծվեր համայնքի մակարդակով։Մենք ունենք մի իրավիճակ, երբ համայնքի ղեկավարը, համայնքի ավագանին ու ազգաբնակչության մի մասը ՝ շատ թե քիչ ,հասցրել են համայնքը փակուղու առաջ և շատ մեծ հարցականի առաջ է Անի համայնքի շարունակական զարգացումը։ Կարծես թե՛ ժամանակի, և թե՛ ծավալի առումով մեր երկրում ամենաերկարատև գործընթացներից մեկը  ձեր համայնքում է  կատարվում»,- նշել է Տիգրան Պետրոսյանը։

Մարզպետը ներկաներին խորհուրդ է տվել հարցը կարգավորել փոխզիջման և կոնսենսուսի տարբերակով, իսկ համայնքի ղեկավար Արտակ Գևորգյանն էլ նշել է, որ աշխատանքի նոր մեթոդ են որդեգրել, ու շրջելով 19 բնակավայրերով` փորձում են այսպես կազմակերպել իրենց աշխատանքը,որն իր բնորոշմամբ՝ 10-20 հոգու քմահաճույքի պատճառով է ստեղծվել։

«Այն մեխանիզմը, որը ներդրվել է դուռ փակելու մեխանիզմով, փորձել արգելել, կանգնեցնել համակարգային գործունեությունը, դա այլևս իր նպատակային նշանակությունը կորցրել է և էժանագին մեթոդներ են»,- ասել է Արտակ Գևորգյանը։

Համայնքի ղեկավարը նաև մեղադրել է դժգոհող բնակիչներին մյուս կառույցների աշխատանքը ևս խոչընդոտելու համար և նրանց մեղադրել  փողոցային պայքարով իր դեմ դուրս գալու մեջ, ինչին մարզպետ Պետրոսյանը հակադարձել է՝ ասելով,որ այդ նույն փողոցային մեթոդներով  մեր երկրում հաղթահարվել են շատ լուրջ խնդիրներ, և խնդրել այդ փողոցային ասված մոտեցումը հանել բառապաշարից։

Հանդիպման ընթացքում քննարկվել են նաև բողոքավոր կողմի կատարած ստորագրահավաքի օրինաչափության, դրանց արժանահավատութունը պարզելու մեխանիզմները։ Արտակ Գևորգյանը նաև առաջարկել է համայնքում անցկացնել վստահության հանրաքվե,ինչը խոստացել է կազմակերպել շատ բարձր մակարդակով։ Իսկ մարզպետ Տիգրան Պետրոսյանն էլ  նշել է, որ որևէ բան շատ բարձր մակարդակով ապացուցելու հնարավորություն համայնքապետը հենց հիմա ունի։

«Դուք ունեք էդ հնարավորությունը ,ես ձեր ասածի մեջ պաթոս նկատեցի,երբ որ շատ բարձր եք խոսում, հենց հիմա կարող եք հայտարարել ու էս ամեն ինչին վերջակետ կդրվի,խնդրում եմ շատ բարձր վստահության մասին խոսելուց առաջ մտածեք»,- ասել է Տիգրան Պետրոսյանը։