Եթե որևէ նախագիծ ներկայացրել է ընդդիմությունը, դա դեռ չի նշանակում` այն պետք է մերժվի. Փաշինյան

ՀՀ կառավարության մարտի 21-ի նիստում ներկայացվեց «Վարչական իրավախախտումների վերաբերյալ Հայաստանի Հանրապետության օրենսգրքում լրացում կատարելու մասին» նախագիծը, որ հեղինակել է ԱԺ «Լուսավոր Հայաստան» խմբակցությունը: Դրանով առաջարկվում է սահմանել, որ լիցենզիա չունեցող անձանց կողմից «վարկ», «փոխառություն», «գումար», «փող», «վարկավորում», «փոխառության տրամադրում», «գումարի տրամադրում», «փողի տրամադրում», «դրամի տրամադրում» բառերի, բառակապակցությունների կամ դրանց հոլովաձևերի և ածանցյալների օգտագործումը գովազդում կամ հրապարակային օֆերտայում տուգանվում է սահմանված նվազագույն աշխատավարձի հազարապատիկի չափով, իսկ տուգանքի նշանակման որոշումն ուժի մեջ մտնելու օրվանից չորս տարվա ընթացքում այն կրկին կատարելու դեպքում տուգանվում է սահմանված նվազագույն աշխատավարձի երկուհազարապատիկի չափով։

«Առավել նպատակահարմար կլիներ հարցի կարգավորումն իրականացնել համալիր ձևով, մասնավորապես՝ ուսումնասիրել վարկային միջնորդային ծառայությունները գովազդելու բնագավառը, գովազդ իրականացնող սուբյեկտների շրջանակը (ֆիզիկական կամ իրավաբանական անձինք), առաջարկվող ծառայությունների ձևաչափը, առանձնահատկությունները, գնային քաղաքականությունը, որից հետո միայն անդրադառնալ համապատասխան կարգավորման մեխանիզմներին և նշանակվող տուգանքի չափին: Նշված տեղեկատվությունը հնարավորություն կտա լիարժեք ձևով գնահատել իրական պատկերը և ճիշտ ընտրել կարգավորման մեխանիզմները»,- ասված է նախագծում:

ՀՀ վարչապետ Նիկոլ Փաշինյանը, դիմելով զեկուցող ՀՀ արդարադատության նախարար Արտակ Զեյնալյանին, ճշտեց.

«Մեր գործընկերների մտահոգությունը հետևյալն է՝ տարբեր տեղերում գովազդվում են վարկեր, փողեր, պարտքեր, որի արդյունքում առաջանում են խնդիրներ, մարդիկ տոկոսի տակ են ընկնում և այլն: Մեր գործընկերներն առաջարկում են, որ այն կազմակերպությունները, որ լիցենզիա չունեն և նման ծառայություն են առաջարկում, այդ գովազդի համար ենթարկվեն վարչական տույժի, բայց մեր օրենսդրությամբ կա հնարավորություն, որ առանց լիցենզավորման նման օրինական ծառայություն մատուցվի: Պրոբլեմը կա, բայց մենք քննարկել և կարևորել ենք քաղաքացիների ֆինանսական գրագիտության բարձրացումը: Շատ դեպքերում պետք է ուսումնասիրել՝ գովազդի սահմանափակում պե՞տք է անել, թե՞ ոչ, օգտակա՞ր է, թե՞ ոչ, պետք է որոշել քայլեր՝ քաղաքացիների ֆինանսական գրագիտությունը բարձրացնելու առումով, որ մարդիկ կարողանան հստակ հաշվարկել՝ ինչպիսի պարտք արժե վերցնել, ինչպիսի գործունեության համար, և լավ կլինի, որ դրանք միտված լինեն արդյունքներ, ոչ թե հետևանքներ ունենալու»:

Փաշինյանն արձագանքեց, որ այս փուլում գոնե հարկավոր է գնալ քաղաքացիների ֆինանսական գրագիտությունը բարձրացնելու ուղղությամբ:

ՀՀ կենտրոնական բանկի նախագահ Արթուր Ջավադյանը հայտնեց, որ քաղաքացիների ֆինանսական գրագիտության բարձրացման ուղղությամբ բազմաթիվ ծրագրեր են իրականացնում, մանրամասն աշխպատում են ԿԳՆ հետ, արդեն վերապատրաստում են անցել բավական մեծ թվով ուսուցիչներ, վերապատրաստում անցնող ուսուցիչների ընդհանուր թիվը մոտ 12 000 է, ֆինանսական գրագիտության մեկամսյակ են անցկացնում բոլոր մարզերում, և այս տարի էլ, ինչպես նախորդ տարի, իրականացվելու են միջոցառումներ, հավաքներ, կլոր սեղաններ, բոլոր բուհերում, ուսումնական կազմակերպություններում աշխատում են անցկացնել սեմինարներ, հեռուստատեսությամբ և տարբեր այլ մեդիամիջոցներով:

«Այս նախագծում առաջարկը նաև մերն էր ոչ միայն գովազդի, այլև նշված գործողության համար, որ պատժենք առաջին անգամ 2 մլն դրամով, եթե կրկնվի՝ 4 մլն դրամով»,- ասաց նա:

ՀՀ փոխվարչապետ Մհեր Գրիգորյանը հետաքրքրվեց՝ եթե բուն գործունեության տեսակի հետ խնդիր չունեն, գովազդի հետ ինչո՞ւ են խնդիր առաջացնում:

«Սա եղավ կուրսայինների պատմությունը, որ բուն ֆունկցիայի հետ խնդիր չունենք, բայց գովազդն արգելում ենք, ես կարծում եմ՝ այդ գործունեությունն ինքնին պրոբլեմ է, պրոբլեմ եղել է և լինելու է, պետք է արգելել այդ գործունեությունը, դրան չենթարկվելու դեպքում պատասխանատվության ենթարկել այդ անձանց»,- ասաց նա:

Փաշինյանի համար զարմանալի էր, որ նախագծին տրված եզրակացությունը բացասական է, սակայն բանավոր ներկայացնելիս Կենտրոնական բանկը կողմ է արտահայտվում այդ նախագծին:

«Մենք այստեղ գործ ունենք հին իներցիայի հետ՝ եթե նախագիծը ներկայացված է ընդդիմության կողմից, ուրեմն պետք է մերժել, եթե էդ է, շատ վատ իներցիա է»,- ասաց նա:

Փաշինյանը կառավարության անդամներին դիմելով՝ ընդգծեց.

«Եթե որևէ նախագիծ ներկայացրել է ընդդիմությունը, դա դեռ չի նշանակում, որ այն պետք է մերժվի, այս պահից արձանագրենք այդ գործելակերպի ավարտը»: