Կփակվի՞ արդյոք փոքր ու միջին ձեռնարկատիրության զարգացման կենտրոնի Շիրակի մասնաճյուղը

Կառավարությունը պատրաստվում է դադարեցնել փոքր ու միջին ձեռնարկատիրության զարգացման ազգային կենտրոնի մարզային մասնաճյուղերի գործունեությունը: Այս մասին մարզային կենտրոններին տեղեկացրել էին դեռ տարեսկզբին: Նախազգուշացումներից հետո աշխատանքից ազատման մասին ծանուցագրեր են ստացել Շիրակի մասնաճյուղի աշխատակիցները, որոնք երկուսն են: Մարտի 15-ն էլ, ըստ ծանուցագրի, վերջնաժամկետն է, բայց մասնաճյուղը փակելու վերջնական որոշում դեռ չկա: Մասնաճյուղի տնօրենը սպասում է քննարկումների, որոնց արդյունքում այլ լուծում կգտնվի:

Փոքր ու միջին ձեռնարկատիրության Շիրակի մարզային կենտրոնն արդեն 15 տարի է գործում է. հիմնական գործառույթն էլ սկսնակ ու աշխատող գործարարներին աջակցելն է ցածր տոկոսադրույքով վարկավորման, բիզնես գիտելիքների հարցերում:

Ինչպես մյուս մարզերի, այնպես էլ Շիրակի մարզի մասնաճյուղի աշխատանքի արդյունավետությունը կառավարությունը ցածր է գնահատել, իսկ սա արդյո՞ք նշանակում է վերջնական լուծարում, թե՞ այլ մոտեցում է լինելու մասնաճյուղերի նկատմամբ:

Ծանուցագրերը ստանալուց հետո մասնաճյուղի տնօրեն Արթուր Զաքարյանը հանդիպումներ ու քննարկումներ ունեցել է կառավարության անդամների հետ: Ավելի շատ վստահ է, որ կառուցվածքային փոփոխությունների են գնալու: Մասնաճյուղն անցած տարիներին արդեն աշխատողների կրճատման գնացել է: Հիմա երկու աշխատող են, նրանցից մեկը տնօրենն է:

Սկսնակ ձեռներեցների հետ բիզնես դասընթացներ են վարում: Վերջին տարիներին նվազել է պետական երաշխավորությամբ բիզնես վարկերի տրամադրումը, բայց իրենց ներկայացվող բիզնես գաղափարները չեն պակասում: Արտահանման հեռանկարով ու մինչև 5 մլն դրամի տարեկան 10 տոկոս վարկավորման ծրագրից օգտվելու համար մասնաճյուղին է դիմել սկսնակ գործարար Համբարձում Ասատրյանը: Որոշել է տրիկոտաժի արտադրությամբ զբաղվել: Մտադիր է վարկավորմամբ հաստոցներ գնել, իսկ արտադրանքը նպատակ ունի Վրաստանի և Ռուսաստանի շուկաներում իրացնել: Ասում է՝ բիզնեսը ընտանեկան է լինելու:

Գյուղոլորտը ևս փոքր ու միջին բիզնեսի աջակցման պետական ծրագրերի բաղադրիչներից է: Անհատ ձեռներեց Սուրեն Գասպարյանը վարկավորում է ակնկալում Շիրակի մարզում նոր տեսակի բիզնեսն ընդլայնելու համար: Երբ մարզի համայնքներում հակակարկտային կայաններ չկան, կարկտապաշտպան այս ցանցերն են պաշտպանում հողագործի բերքը: Սուրեն Գասպարյանը ոչ միայն հենասյուների արտադրությամբ, այլև դրանց մոնտաժով է զբաղվում: Կարկտապաշտպան այս ցանցերը, որոնք Իտալիայից են Հայաստան բերվել, նորույթ են: Հիմա արդեն դրանց տեղական արտադրություն կա: Անհատ ձեռներեց Սուրեն Գասպարյանը «Կանաչ արահետ» հասարակական կազմակերպության նախագահ Նունե Սարուխանյանի աջակցությամբ ու պատվերներով է սկսել իր բիզնեսը, միջազգային կազմակերպության ֆինանսավորմամբ հակակարկտային համակարգեր արտադրել ու մոնտաժել Շիրակի մարզի Հայկավան համայնքում: Մոտ 1 ու կես հա-ի վրա դրանք արդեն տեղադրված են: Գումար է անհրաժեշտ նոր սարքավորումներ գնելու համար, որ արտադրական հզորություններն ընդլայնի:

5 մլն դրամի վարկը եթե հաստատեն, անհատ ձեռներեցը խոստանում է, որ կկարողանա տարեկան մինչև 10 հա-ի համար կարկտապաշտպան ցանցեր արտադրել: Դրանք հիմնականում կպաշտպանեն այգիները: Ասում է՝ ձեռնտու չեն հացահատիկային մշակաբույսերի դաշտերի համար: 1 հա-ի համար մինչև 22 մլն դրամ ծախս է պահանջվում:

Մարզում փոքր ու միջին ձեռնարկատերերը վարկավորման հարցում նաև գրավի խնդիր ունեն: Այդ հարցը լուծելու համար ՓՄՁ մարզային կենտրոնը գրավի երաշխավորություն է ապահովում՝ վարկի գումարի մինչև 70 տոկոսի չափով: Ծրագիրը գործում է, բայց բանկերն առաջնահերթ վարկավորում են գույքային երաշխավորությամբ, քան պետական կառույցի երաշխիքով վարկերը: Սա էլ այն պատճառներից մեկն է, որն ազդում է ՓՄՁ մասնաճյուղերի աշխատանքի արդյունավետության վրա: Բացի դրանից՝ Շիրակի մարզը, որպես բիզնես տարածք, շարունակում է մնալ ռիսկային: