Սփյուռքահայ և օտարազգի երիտասարդները կամավորական աշխատանք են կատարում Գյումրիում

Ինչու են տարբեր երկրների երիտասարդները նախընտրում կամավորական գործունեությունը  Հայաստանում: Նախ, որ իրենց երկրներում  հիմնական աշխատանքի անցնելուց առաջ կամավորական փորձը ամենակարևոր պայմաններից մեկն է համարվում և հետո` Հայաստանից ամենաշատն է փորձի փոխանակման պահանջ ներկայացվում կրթական, առողջապահական ու մշակութային ոլորտներում։

Վերջին տարիներին նաև ավելի շատ կամավորներ են նախընտրում աշխատել Գյումրիում: «Դեպի Հայք» և ԿԱԶԱ հիմնադրամների ծրագրերով այժմ կամավորները դասավանդում են դպրոցներում, ոչ ֆորմալ կրթական ծրագրեր իրականացնում երիտասարդության համար:

Նանորը մասնագիտությամբ մանկավարժ-հոգեբան  է։ Գյումրի է եկել Լիբանանի Անճար հայկական գյուղից։ Մինչ կամավորական առաքելությունը եղել էր Հայաստանում, բայց ծանոթանալ այլ բնակավայրերի հետ առիթ չի ունեցել: Դեպի Հայք կրթական  ծրագիրը ստեղծեց այդ առիթը: Ու 23-ամյա հայ մանկավարժն ընտրեց Գյումրին։ Արդեն մեկ ամիս է՝ աշխատում է գյումրեցի երեխաների հետ։

Ձմռան մեկ ամիսն  ապրեց գյումրեցիների պես, տեսավ թե տնակներում ինչպես են վառարանով տաքանում, սոցիալապես անապահով ընտանիքների երեխաներն ինչ խնդիրներ ունեն: Այդ երեխաների հետ է հիմա նրա աշխատանքը: Օտար լեզու է դասավանդում, ցանկալի արդյունքի հասնելու համար հետաքրքիր ու դիտարժան մեթոդներ է կիրառում :

Անգլերենի և արաբերենի իմացությունը փոխանցում է երեխաներին, իսկ նրանցից սովորում մայր լեզուն: Լիբանանի հայկական գյուղում   2000 հայ է ապրում, լեզվի և մշակույթի պահպանման հարցում օգնում են հայկական եկեղեցիներին կից գործող վարժարանները։

«Իմ գյուղի մեջ կար 3 վարժարան, մեկը վերջերս փակվեցավ և ընդհանուր Լիբանանին մեջ եթե չեմ սխալվի, մոտ 15 հայկական վարժարաններ կան: Ամեն շրջանին մեջ, ուր որ հայկական եկեղեցի կրնաք գտնել, կողքին անպայման դպրոց կա, որովհետև դպրոցն ու եկեղեցին շատ կարևոր հարաբերություն ունին Լիբանանին մեջ»,- ասում է լիբանանահայ կամավորական Նանոր Ստամբուլյանը:

Նանորը նկատել է,որ Հայաստանում էլ ներքին տեղաշարժը մեծ է, երիտասարդները մարզերից գնում են մայրաքաղաք, աշխատանք գտնում այդտեղ ու չեն վերադառնում: Ասում է՝ նույնը նաև Լիբանանում է: Թեև վերջին մեկ տարվա ընթացքում Սիրիական պատերազմի հետևանքով  շատ սիրիահայ ընտանիքներ իրենց հայկական գյուղ  են տեղափոխվել մշտական բնակության:

Ազգությամբ լեհ Կատաժինան ԿԱԶԱ  շվեյցարական հիմնադրամի ծրագրով է հյուր Գյումրիում, կամավորական գործունեությունը դարձյալ կրթական է: Հայերեն որոշ արտահայտություններ մեկ ամսում հասցրել է  Գյումրիում սովորել։ Կամավորական աշխատանքն այստեղ  ծավալելու ցանկություն է առաջացել իր  ընկերուհու՝ Հայաստանի մասին պատմությունները լսելով։

«Ընկերուհիս կամավորական էր, նա պատմեց Հայաստանում իրականացվող կամավորական ծրագրերի մասին: Ես էլ սկսեցի հետաքրքրվել   Հայաստանով և որոշեցի, որ ես էլ կարող եմ գալ Հայաստան ու ընդամենը երեք շաբաթ անց ես այստեղ էի»,- հիշում է Կատաժինան:

Կատաժինան 24 տարեկան է, մասնագիտությամբ՝ արվեստաբան: Հիմնական աշխատանքը Գյումրիում երիտասարդների հետ է: Ստեղծել է  ինտերակտիվ ակումբներ ու հատուկ խաղային մեթոդներով երիտասարդների մոտ զարգացնում է երևակայությունը, շփման կարողություններն ու արվեստի մեջ գեղեցիկը տեսնելու ունակությունը:

«Գյումրիում իրականացնում եմ իմ անձնական նախագծերը, ստեղծել եմ արվեստասերների և լուսանկարչությամբ հետաքրքրվողների համար  ակումբներ: Երիտասարդների հետ շրջում ենք քաղաքի տարբեր վայրերում, լուսանկարում գեղեցիկ պատկերներ, ապա վերադառնում ենք   ակումբ ու միասին քննարկում այն թեմաները, որոնք մեր լուսանկարներում են», – գյումրվա կոլորիտային լուսանկարները ցուցադրելով՝ պատմում է լեհուհին:

Կատաժինան   հիացած է Գյումրիի ճարտարապետությամբ, հին շենքերի գեղեցկությամբ ու հատկապես  հին թաղամասերի գրավչությամբ: Ամեն օր Գյումրիի փողոցներով շրջելիս մի նոր բան է իր համար բացահայտում ու ամիջապես  հավերժացնում իր տեսախցիկի միջոցով:

«Ինձ գրավեց Գյումրին, ինձ ոգեշնչեց ձեր հին ու շատ գեղեցիկ քաղաքը: Հիացրեց շենքերի յուրատիպ ճարտարապետությունը, տարբեր թեմաներով լուսանկարներ եմ անում, որոնք ինձ հետ կտանեմ Լեհաստան ու ընկերներիս կպատմեմ Գյումրիի մասին: Ինձ նաև շատ դուր եկավ  քաղաքի լանդշաֆտը, նկարելու շատ բան կա, Գյումրին ինձ համար բացահայտում էր»,- իր հիացմունքն է հայտնել կամավորական Կատաժինա Մագելդան:

Նրա խոսքերով՝ դեռ շատ բան ունի իր համար բացահայտելու քաղաքի պատմության ու մշակույթի մասին: Հին ու նոր Գյումրիի կենցաղն ու  մարդկանց պատկերող լուսանկարներով Կատաժինան Լեհաստանում պատրաստվում է ալբոմ հրատարակել, որը կդառնա արվեստաբանության մեջ իր առաջին ծավալուն աշխատանքը: