Վրաստանի կուրսը ՆԱՏՕ և ԵՄ ուղղված չէ որևէ մեկի դեմ և ագրեսիվ նպատակներ չի հետապնդում. Զուրաբիշվիլի

Վրաստանի նախագահ Սալոմե Զուրաբիշվիլին նախագահի պաշտոնում առաջին անգամ խորհրդարանում հանդես է եկել երկրի իրավիճակի ամենակարևոր հարցերի վերաբերյալ տարեկան զեկույցով: Ելույթին ներկա են գտնվել Վրաստանի վարչապետ Մամուկա Բախտաձեն, կառավարության անդամները, հոգևորականներ և դիվանագիտական կորպուսի ներկայացուցիչներ:

Նրա ելույթի առանցքային թեմաներից մեկն առնչվել է վրաց-ռուսական լարված հարաբերություններին:

«Վրաստանը չի ընտելանում և չի ընտելանա տարածքների բռնազավթմանը, առևանգումներին, որոնք բռնության և շանտաժի քաղաքականության մասն են:

Չենք ընտելանում նաև այն բանին, որ բանակցությունների ձևաչափն այսօր ընթանում է միայն տեխնիկական մակարդակով: Մեր գործընկերների հետ զրուցել ենք քաղաքական բարձր ձևաչափի նորացման անհրաժեշտության մասին: Նրանք պետք է հասկացնեն Ռուսաստանին, որ 21-րդ դարում նման խաղը ոչ ոքի շահերից չի բխում, և ագրեսիվ քաղաքականությունն անցյալի մնացորդների ճանապարհն է»,- նշել է Սալոմե Զուրաբիշվիլին:

Վրաստանի նախագահը նշել է, որ Վրաստանի կուրսը դեպի ՆԱՏՕ և Եվրամիություն ուղղված չէ որևէ մեկի դեմ և ագրեսիվ նպատակներ չի հետապնդում: Նրա խոսքերով՝ դաշնակիցներ ընտրելու հարցն ինքնիշխան երկրի սուվերեն իրավունքն է՝ ամրապնդելու սեփական անվտանգությունն ու պաշտպանությունը:

«Անկախ Ռուսաստանի սպառնալիքներից, ագրեսիայից, ճնշումից, բռնազավթումից` Վրաստանը չի շեղվել պետականաշինության, ժողովրդավարության ու տնտեսության ամրապնդման ուղուց: Սա խաղաղ քաղաքականության հաղթանակ է բռնության և սպառնալիքի քաղաքականության նկատմամբ»,- ասել է Վրաստանի նախագահը:

Նախագահ Զուրաբիշվիլին խորհրդարանում ելույթ ունենալիս անդրադարձել է նաև Ֆրանսիա և Գերմանիա կատարած այցերին:

«Ֆրանսիան Ամերիկայի հետ դարձել է մեր կարևորագույն գործընկերներից մեկը պաշտպանունակության հզորացման հարցում»,- հայտարարել է Զուրաբիշվիլին՝ հավելելով, որ այցը նրան հնարավորություն է տվել Վրաստանի անունից շնորհակալություն հայտնել Ֆրանսիային:

«1921 թվականից հետո այն ապաստան տվեց Վրաստանի քաղաքական միգրանտներին, նպաստեց գանձարանի վերադարձին, իսկ 2008 թվականին մեր երկրին օգնություն ցուցաբերեց հրադադարի գործընթացում»,- հայտարարել է Վրաստանի նախագահը:

Նշենք, որ ընդդիմադիր «Ազգային շարժում» կուսակցությունն ու դրանից առանձնացած «Եվրոպական Վրաստան» կուսակցությունը բոյկոտել են նախագահի ելույթը և չեն մասնակցել նիստին: