Մանրամասներ Գյումրիում գտնվող հանրակացարանի փլուզումից

Հերթական փլուզումը Գյումրու Գարեգին Նժդեհ փողոցում գտնվող նախկին Տեքստիլ կոմբինատի հանրակացարանային շենքում: SHANTNEWS-ի թղթակցի հաղորդմամբ՝ շենքը 4-րդ աստիճանի վթարային է ու բազմակի փլուզումների  է ենթարկվել: Չնայած խիստ վտանգավոր լինելուն՝ շենքում շարունակում են բնակվել երեք ծեր կանայք: Փլուզումն էլ  տեղի է ունեցել չբնակեցված հատվածում,  որը, սակայն, մոտ է սենյակներին:

Բնակիչները մեր թղթակցին պատմել են, որ ձայներ են լսել, դուրս են եկել ու տեսել, որ շենքի փլուզված հատվածում ինչ-որ մարդիկ շենքի երկաթյա կոնստրուկցիաներն են քանդում, մի քանի րոպե հետո ուժեղ ձայն են լսել, ու պատուհանից տեսել, որ շենքի այդ հատվածն ամբողջությամբ փլուզվել է:

Հանրակացարանում ապրող 3 կանանց շենքից դուրս գալու առաջարկ է արել Շիրակի մարզպետ Տիգրան Պետրոսյանը, որը դեպքի վայրում էր: Մարզպետի առաջարկը մերժեցին՝ ասելով, թե նոր բնակարան են ուզում, փլուզումներից էլ չեն վախենում:

Ամեն հերթական փլուզումից հետո այս կանանց նոր բնակարան տեղափոխվելու առաջարկներ եղել են, բայց նրանք միշտ հրաժարվել են: Հիմա էլ ասում են՝ շենքից դուրս չեն գալու այնքան ժամանակ, մինչև իրենց ուզած Անի թաղամսում բնակարան չառաջարկեն: Դեպքի վայրում էր նաև Գյումրիի քաղաքապետի առաջին տեղակալ Ռուբեն Սանոյանը, որը մեր թղթակցին ասել է, որ այս պահին առաջարկներ չունեն, հարցը նորից կքննարկվի:

Հիշեցնենք, որ SHANTNEWS.am-ը ավելի վաղ հայտնել էր, որ Գյումրու նախկին Տեքստիլ կոմբինատի հանրակացարանային շենքից բնակիչներին վտարելու վերաբերյալ դատական որոշում էր կայացվել:

Շենքում ապրող 3 միայնակ տարեցներին տարածքն ազատելու պահանջով կառույցի սեփականատերը հայց էր ներկայացրել Շիրակի մարզի առաջին ատյանի դատարան: Հայցը բավարարվել էր, որից հետո բնակիչներն այն բողոքարկել էին Վերաքննիչ դատարում: Վերաքննիչը մի քանի ամիս քննելուց հետո վճիռն անփոփոխ է թողել: Անօթևանության կարգավիճակը բնակարանի գնման վկայագրից օգտվելու հնարավորություն տվել էր  նրանց տարիներ առաջ:

Վկայագրերից, ինչպես նաև քաղաքապետարանի այլընտրանքային մյուս առաջարկներից բնակիչները հրաժարվել են, իսկ այդ առաջարկներն արվել են մինչ Վերաքննիչ դատարան հասնելը: Անցած տարեվերջին, ըստ բնակիչների, դիմել են սոցիալական բնակարաններ ստանալու համար ու համաձայնել են տարածքն ազատել, բայց այս անգամ էլ քաղաքապետարանն է հրաժարվել իրենց սոցիալական նոր բնակարաններ հատկացնել: Դատարանի որոշումը ուժի մեջ է մտնելու մեկասմյա ժամկետում՝ մինչև ապրիլ ամիսը, եթե չբողոքարկեցին Վճռաբեկ դատարանում, ապա բնակիչներին հարկադիր վտարում է սպասվում: Իսկ շենքի սեփականատիրոջը՝ Ենոք Սարգսյանին, շենքի քանդման վերջնաժամկետ տրվել էր մինչև փետրվարի 6-ը, ժամկետը, սակայն, երկարաձգվել է, վերջինս պարտավորվում է շենքն ապամոնտաժել 14-ամսյա ժամկետում: