Մենք վարչապետի հետ մեր պայմանավորվածությունը չենք խախտել. «Ղեկը աջ» նախաձեռնության անդամները դեմ են Փաշինյանի որոշմանը

«Ղեկը աջ» նախաձեռնության անդամները այսօր կառավարության շենքի առջև բողոքի ցույց էին անում` պարզաբանում ստանալու ակնկալիքով: Կառավարության նախորդ նիստում վարչապետի կողմից 800-1000 մեքենաները ներկրելու հարցը օրակարգից հանելու պատճառով ստեղծվել է անորոշ իրավիճակ: Նրանք վստահեցնում են, որ վարչապետի հետ Բագրատաշենի անցակետում ունեցած հանդիպման ժամանակ խոսք է գնացել 800-1000 մեքենան անցկացնելու մասին, սակայն նիստում վարչապետը հայտարարեց ավելի քան 400-ի մասին:

Հիշեցնենք, վերջին նիստում Հակոբ Արշակյանը օրենքի նախագիծը ներկայացրեց, որում ասվում էր, որ պայմանավորվածությունների արդյունքում այն վարորդները, ովքեր մինչև դեկտեմբերի 30-ը գնել են աջ ղեկով մեքենաներ, իրավունք կստանան ներկրել դրանք, խոսքը 800-1000 մեքենաների մասին է: Սակայն վարչապետը հայտարարեց, որ իր պայմանավորվածությունը վարորդների հետ այդպիսին չի եղել: Իրենք համաձայնության են եկել, որ միայն մաքսակետի տարածքում գտնվող 400 մեքենաները կարող են ներկրել: Հարցը օրակարգից հանվեց պարզաբանելու նպատակով:

Այս պատճառով է, որ վարորդներն այսօր հավաքվել էին և հետևյալ բողոքն էին ներկայացնում.

«Պայմանավորվածություն ձեռք բերվեց, որ հարցը պետք է լուծվի, վարչապետը դրանից հետո քաղաքական որոշում կայացրեց, որից հետո մեզ շնորհավորեցին, որ 800-1000 մեքենա են թույլ տրվի ներս մտնի, որից հետո մատնանշած պետական կառույցների հետ հարցը քննարկեց, օրենսդրական տեսք ունենար, կարողանայինք բերել մեքենաները, Մենք ունենք  տեսաձայնագրությունը, կարող ենք ներկայացնել, երբ որ վարչապետը հարցրել է՝ քանի մեքենայի մասին է խոսքը, ասել 800-1000 մեքենա, վարչապետն ասել է՝ ինչ երաշխիք կա, որ ավելի չի լինի, մենք ասացինք` վին կոդերը կտրամադրենք: Բայց մեզ ասացին, որ վին կոդերով հարցը լուծում չի ստանա, դրեցին մի կողմ ու այլ նախագիծ ներկայացրին»,- պատմեց վարորդներից մեկը:

Նախաձեռնության մեկ այլ անդամ էլ նշեց, որ իրենց պայմանավորվածությունն ամբողջությամբ պահպանել են, գուցե Հակոբ Արշակյանը չի կարողացել ճիշտ ներկայացնել իրավիճակը:

«Կա´մ Արշակյանը չկարողացավ ներկայացնել Փաշինյանին: Երբ քննարկումներ ունեցել ենք, եղել ենք նախարարությունում, քննարկումների ժամանակ ՊԵԿ-ի ներկայացուցչի հետ քննարկվել է այդ հարցը: Մենք ասել ենք` մեքենաները 800-1000 են, մեզ հարցնում են՝ ինչու կանգնած չեն սահմանին, եթե ներկրենք սահման, կաթվածահար կլինի, սահման  բերում ենք ծայրահեղ դեպքում, կարող ենք այսօր էլ բերել, բայց սահմանը կաթվածահար կլինի»:

Նրանք պահանջում էին, որ հարցը պարզաբանվի, որպեսզի առաջիկա նիստին անակնկալի չգան, բացի դրանից, իրենց մեքենաները, որ գտնվում են սահմանին, ամեն օր վնասներ են կրում՝ ֆինանսական նոր ծախսերի առաջ կանգնեցնելով: Վարորդներից մեկը ասաց.

«Ամենալավ վերահսկվող տարածքներում մեքենաները թալանվում են, մենք հարցնում են՝ ով է թալանում, ծառայողներն ասում են՝ ի պահ հանձնված չեն ձեր մեքենաները, այսինքն՝ եթե հանձնված չի, թալանում են, տեսնում են, ասում են՝ թող թալանվի՞»: