Մեր հեղափոխությունը գունավոր չէր, և որևէ օտար ուժ ներգրավված չէր. Նիկոլ Փաշինյանի հարցազրույցը գերմանական Die Zeit պարբերականին

Գերմանական Die Zeit պարբերականը ծավալուն հարցազրույց է հրապարակել ՀՀ վարչապետ Նիկոլ Փաշինյանի հետ, որում անդրադարձ է կատարել Թավշյա հեղափոխության պատճառներին, ընթացքին:

Հեղինակը նախաբանում պատմում է, որ երբ 2018թ. Հայաստանում սկսվեց «Թավշյա հեղափոխությունը ընդդեմ կոռուպցիայի և ավտորիտար կառավարության, ամբողջ աշխարհի հայացքն ուղղվեց դեպի Հարավային Կովկասի այս փոքրիկ երկիրը: Միլիոնավոր հայեր են ապրում սփյուռքում, որոնք աջակցում էին բողոքի շարժմանն ու նրա առաջնորդ Նիկոլ Փաշինյանին`  նրանք անմիջապես օդանավ էին նստում: Հայտնի ամերիկահայ System of a Down-ի անդամները Երևանում էին, աջակցում էին նաև Շառլ Ազնավուրին ու Քիմ Քարդաշյանը:

Ըստ պարբերականի ձևակերպման՝ մայիսի 8-ին բողոքի ճնշումների ալիքի ներքո Փաշինյանը ճանաչվեց վարչապետ, դեկտեմբերին նրա ձևավորած դաշինքը խորհրդարանական ընտրություններում հաղթանակ տարավ շուրջ 70 տոկոս ձայներով: Բարեփոխումները, որ սպասում էին նրանից, հետևյալն են. պայքար օլիգարխիայի դեմ, լավ հարաբերություններ ինչպես ԱՄՆ-ի հետ, այնպես էլ  հարևան Իրանի հետ, Ռուսաստանի, ինչպես նաև ԵՄ հետ: Միաժամանակ, գոյություն ունի Արցախյան հակամարտությունը:

«Կարևորագույն հիմքն այս հաղթանակի այն էր, որ նախկին իշխանությունը լեգիտիմ չէր: Ընտրությունները նախորդ տարիներին կեղծվում էին, ժողովուրդը չէր կարողանում իր իրավունքներին տեր կանգնել: Ինչ վերաբերում է մեր հեղափոխության մեթոդներին, այն համահունչ էր մեր համոզմունքներին. Մենք ուզում էինք Հայաստանը դարձնել բռնություններից զերծ երկիր»,- ասել է Փաշինյանը, ի պատասխան այն հարցի, թե ինչպես կարողացավ հաջողության հասնել:

Այնուհետ լրագրողը հետաքրքրվել է, թե ինչպես ստացվեց, որ 2010-ից սկիզբ առած պայքարը գործող իշխանության դեմ հաջողություն չունեցավ: «Հաջողության հասնելու համար առաջնո՞րդ էր պետք»,- հետաքրքրվել է նա, որին ի պատասխան՝ Փաշինյանն ասել է հետևյալը.

«Առաջնորդի դերի իմ կարևորագույն նշանակությունն այն էր, որ ես բացատրեցի. ես առաջնորդ չեմ. Դրանից էլ ապակենտրոնացավ մեր հեղափոխության ընթացքը, շարժումը աճեց: Դրանով կառավարության ու ոստիկանության համար շարժումը  կառավարելու և կանխելու հարցում առավել դժվար իրավիճակ ստեղծվեց: Մենք մեր առջև դրել էինք մի կարևոր կանոն. ակցիաները պետք է խաղաղ լինեն: Մենք ուզում էինք աշխարհին ցույց տալ, ինչպես են հայերը մոտենում իրավիճակին: Մեր հեղափոխության առաջնորդները ՀՀ քաղաքացիներն էին»:

Ապա լրագրողը հետաքրքրվել է, թե ինչպես եղավ, որ Հայաստանում հաջողվեց հեղափոխությունը, այն դեպքում երբ Եվրոպայում տեղի են ունենում գունավոր հեղափոխություններ, որոնք ոչ միշտ են հաջողության հասնում: Փաշինյանը պատասխանել է.

 «Մեր հեղափոխությունը գունավոր չէր, և որևէ օտար ուժ ներգրավված չէր: Դա արտաքին գործընթաց չէր, քաղաքական խաղ չէր: Մեր հեղափոխության մեջ ներգրավված էին միայն ՀՀ քաղաքացիները, ովքեր լավ ապագա էին ցանկանում»: