Գյումրիի նախկին Տեքստիլ կոմբինատի հանրակացարանի բնակիչներին վտարում է սպառնում

Գյումրիի նախկին Տեքստիլ կոմբինատի հանրակացարանային մասնաշենքից բնակիչներին վտարելու վերաբերյալ դատական երկրորդ որոշումն է կայացվել: Շենքում մնացած 3 միայնակ տարեցներին տարածքն ազատելու պահանջով կառույցի սեփականատերը հայց էր ներկայացրել Շիրակի մարզի առաջին ատյանի դատարան:

Հայցը բավարարվել էր, որից հետո բնակիչներն այն բողոքարկել էին Վերաքննիչ դատարում: Վերաքննիչը մի քանի ամիս քննելուց հետո վճիռն անփոփոխ է թողել, ինչը նշանակում է, որ քաղաքապետարանի համար նորից օրակարգային է դառնում բնակիչների բնակարանային հարցի լուծումը:

Նախկին Տեքստիլ կոմբինատի համար կառուցված առաջին հանրակացարաններից մեկն է եղել կիսախարխուլ այս շենքը: Հետո դրա կողքին ևս մեկ մասնաշենք է կառուցվել, որ բավարարեր տարբեր բնակավայրերից Լենինական աշխատանքի տեղափոխվածներին: Գայանե Տարոյանը մեկ առ մեկ հիշում է բոլոր նրանց, ովքեր ապրել են այս շենքում տարբեր տարիներին: Տեքստիլի երկարակյաց աշխատակիցներից է այս շենքի հնաբնակը: 50 տարի ինքն ու աշխատանքային ընկերուհին հարևանությամբ են ապրում: Շենքի փլուզված հատվածին կից սենյակներում են: Միայնակ ծերերին փլատակներից ընդամենը 1 պատ է բաժանում:

Շիրակի մարզի առաջին ատյանի դատարանը վճռել է, իսկ Վերաքննիչ դատարանը նույնն է թողել բնակիչներին վտարելու որոշումը: Վտարման վճիռներում նշանակություն է ունեցել նաև շենքի վթարայնությունը: Դատարանը չի կարող քանդման ենթակա շենքից բնակիչներին չվտարելու որոշում կայացնել:

Շենքի բնակիչների փաստաբանն է նշում՝ վտարման որոշումը, սակայն, նոր բնակարանով ապահովելու պարտավորություն չի սահմանում:

«Վճիռ է կայացվել այդ շենքից բնակիչներին վտարելու մասին, իսկ բնակարան հատկացնելու մասին ոչ մի խոսք չեղավ, թեև բնակիչներն անօթևան են երկրաշարժի հետևանքով: Այսինքն` վտարում են առանց բնակարան հատկացնելու, որը օրենքի խիստ խախտում է, թեկուզ մարդը լրիվ ապօրինի այն զբաղեցրած լինի»,- SHANTNEWS.am-ին ասել է շենքի բնակիչների փաստաբան Ռոբերտ Մուրադյանը:

Անօթևանության կարգավիճակը բնակարանի գնման վկայագրից օգտվելու հնարավորություն է տվել նրանց տարիներ առաջ: Վկայագրերից, ինչպես նաև քաղաքապետարանի այլընտրանքային մյուս առաջարկներից բնակիչները հրաժարվել են,  իսկ այդ առաջարկներն արվել են մինչ Վերաքննիչ դատարան հասնելը:

«Ժամանակին բնակարանի գնման վկայագրերից են հրաժարվել, հետո «Արդա» բարեգործական հիմնադրամի կառուցած սոցիալական բնակարաններից: Անցած տարի շենքում տեղի ունեցած հերթական փլուզումից հետո նրանց առաջարկվել են հանրակացարանային այլ սենյակներ, որոնցից նույնպես կտրականապես հրաժարվել են: Հիմա, եթե գործը հասնի վտարմանը, Գյումրիի քաղաքապետարանը քննարկելու է, թե համայնքային ենթակայության ինչ բնակֆոնդ կա, որը կարող ենք հատկացնել այդ բնակիչներին»,- SHANTNEWS.am-ի հետ զրույցում ասել է Գյումրիի քաղաքապետի տեղակալ Վաղարշակ Մխիթարյանը:

Անցած տարեվերջին, ըստ բնակիչների, դիմել են սոցիալական բնակարաններ ստանալու համար ու համաձայն եղել են տարածքն ազատել, բայց այս անգամ էլ քաղաքապետարանն է հրաժարվել իրենց սոցիալական նոր բնակարաններ հատկացնել:

Ներկայումս Վերաքննիչ դատարանի որոշումը քաղաքապետարանին նորից պարտավորեցնում է նոր տարածք գտնել բնակիչների համար: Որոշումը ուժի մեջ է մտնելու մեկասմյա ժամկետում ու եթե չբողոքարկեցին Վճռաբեկ դատարանում,  ապա բնակիչներին հարկադիր վտարում է սպասվում: Բնակիչները դեռ չեն որոշել` բողոքարկելո՞ւ են որոշումը, թե՞ ոչ, իսկ շենքի քանդման վերջնաժամկետը լրացել է փետրվարի 6-ին:

Սեփականատերը քանդման նոր թույլտվություն արդեն ստացել է: Հիմա էլ պարտավորվում է շենքն ապամոնտաժել 14-ամսյա ժամկետում: