Պարո՛ն քաղաքապետ, ամեն ինչ չէ, որ ձեզ ճիշտ է ներկայացվում. ավագանու նիստում բարձրացվեց մանկապարտեզների նորոգման հարցը

ԲՀԿ խմբակցության անդամ Լյուդմիլա Սարգսյանը Երևանի ավագանու այսօրվա՝ փետրվարի 12-ի նիստում բարձրացրել է մանկապարտեզների վերանորոգման հարցը և նշել, որ վերանորոգման ծրագրում անհամաչափություն կա:

«Ըստ նախնական տպավորության, հիմնականում Կենտրոն համայնքի և մերձակա համայնքների մանկապարտեզներն են ներառված քաղաքապետարանի վերանորոգման ծրագրում: Օրինակ, Արաբկիր վարչական շրջանի 13 պարտեզներից ներառված է 4-ը, Դավիթաշենում՝ 50-ից 3-ը, Էրեբունիում՝ 12-ից 3-ը, Ավանում՝ 7-ից ոչ մեկը, Աջափնյակում՝ 16-ից 0-ն, Նուբարաշենում՝ 2-ից 0-ն, Շենգավիթում՝ 22-ից 0-ն: Ընդ որում, Շենգավիթի թիվ 144 մանկապարտեզում մենք եղել ենք և նամակով դիմել էինք ձեզ, որ պարտեզը ծրագրի մեջ ներառվի»,- ասաց Լյուդմիլա Սարգսյանը:

Քաղաքապետ Հայկ Մարությանն արձագանքեց` նշելով, որ ճիշտ հարց է բարձրացվում, և որ իր քաղաքականության մեջ չկա նման բան, ինքը վարում է ապակենտրոն քաղաքականություն. բոլոր վարչական շրջանները պետք է հավասար զարգանան:

«Հայկ Սարգսյանի հետ բյուջեի բոլոր կետերով դեռ պետք է անցնենք, փոփոխություններ կան անելու: Որպես տարբերակ կարող եմ ասել, որ ՄԱԿ-ը նույնպես պարտեզների վերանորոգման ծրագիր է անում, իսկ քաղաքապետարանը իրականացնում է այնտեղ, որտեղ չի իրականացնում ՄԱԿ-ը, գուցե հենց այս տրամաբանությունն է գործում: Կարող եմ ասել, որ խնդրին ծանոթ եմ, և Շենգավիթում կա պարտեզ, որտեղ հաճախում են նաև աուտիզմով հիվանդ երեխաները, և այդ պարտեզը ՄԱԿ-ի ծրագրով նորոգվում է»,- պատասխանեց քաղաքապետը:

Երևանի քաղաքապետի տեղակալ Տիգրան Վիրաբյանը նշեց, որ անբարեկարգ մանկապարտեզներ կան և´ կենտրոնում, և´ ծայրամասերում: Այս հարցի շուրջ տրվել է լուծում` ըստ առաջնահերթությունների: Այս կարծիքի հետ Լյուդմիլա Սարգսյանը չհամաձայնեց` նշելով, որ կենտրոնում գրեթե չկան անբարեկարգ մանկապարտեզներ, քանի որ այդ պարտեզները դեռ նախկին իշխանությունների օրոք էլ ինչ-ինչ ճանապարհներով նորոգվում էին, իսկ ծայրամասերը միշտ ուշադրության կենտրոնից դուրս են մնում: Լյուդմիլա Սարգսյանն արձագանքեց նաև քաղաքապետին:

«Պարո՛ն քաղաքապետ, գոնե թիրախային մի քանի պարտեզ ընտրեք և ստուգեք, ու կտեսնեք, որ երբեմն ամեն ինչ ճիշտ չէ, որ ձեզ ճիշտ է ներկայացվում: Եթե ասում եք պետք է փոփոխություն լինի, ուրեմն` իմաստ չուներ նախապես ներկայացնել ծրագիրը: Կա´մ լավ ուսումնասիրեիք, նոր ներկայացնեիք, կա´մ էլ գոնե հիմա փորձեք ինչ-որ կերպ ընտրել մանկապարտեզներ, ստուգել ընդհանուր վիճակը»,- արձագանքեց Լյուդմիլա Սարգսյանը:

Փոխքաղաքապետ Սերգեյ Հարությունյանն էլ թվեր մեջբերեց.

«Կենտրոն վարչական շրջանում 2018-ին վերանորոգվել է 5 մանկապարտեզ, որի համար արժեքը կազմել է 45 մլն դրամ, իսկ Ավանում 1 մանկապարտեզի նորոգման արժեքը կազմել է 26 մլն դրամ»: «Նոր Նորքում թիվ 117 մանկապարտեզը ջեռուցվել է, և արժեքը կազմել է 21 մլն 600 հազար դրամ, իսկ Սարի թաղում ևս մեկ պարտեզի նորոգման աշխատանքների արժեքը կազմել է 35 մլն 700 հազար»,- ասաց Հարությունյանը և ավելացրեց, որ Կենտրոնում հիմնականում կոսմետիկ վերանորոգում է իրականացվել: