Կառավարության ծրագրում տնտեսական հեղափոխության գործիքներ չենք տեսնում. Նաիրա Զոհրաբյան

ԱԺ «Բարգավաճ Հայաստան» խմբակցության անդամ Նաիրա Զոհրաբյանը SHANTNEWS.am-ի հետ զրույցում անդրադարձավ կառավարության ծրագրին:

Նա նշեց, որ կոնկրետ իր մոտ ծրագիրը բազմաթիվ հարցեր է առաջացնում: Պատգամավորն ասաց, որ չի ցանկանում կրկնել սոցցանցերում ծրագրի հասցեին հնչող «կենացների, բարեմաղթանքների ժողովածու» արտահայտությունը, շեշտեց՝ իրենց խնդիրը վատաբանելը չէ, լուծումներ գտնելն է: Նա ասաց, որ այս ծրագրում չի տեսնում այն գործիքները, մեխանիզմները և ներդրումային միջավայրի համար անհրաժեշտ այն գործիքները, որոնք կարող են ապահովել տնտեսական հեղափոխություն, որը պետք է հաջորդեր այն քաղաքական հեղափոխությանը, որի փուլն ավարտվեց դեկտեմբերի 9-ի արտահերթ խորհրդարանական ընտրություններով:

Զոհրաբյանն ասաց, որ իրենք սպասելու են վարչապետի կողմից այս ծրագրի ներկայացմանը, նշեց՝ գուցե այն ընդամենը հռչակագրային ձևով է ներկայացված, մինչդեռ ԱԺ քննարկման ժամանակ իրենց հուզող հարցերի պատասխանները կստանան: Նա ասաց, որ ծրագրում նշված է «աշխատատեղերի բացում», «գործազրկության, աղքատության կրճատում», մինչդեռ դրան զուգահեռ տեսնում ենք այլ իրականություն, երբ օպտիմալացում է տեղի ունենում, որը նշանակում է աշխատատեղերի կրճատում, գործազրկության նոր ալիք, որոշակի հակասություն այն հայտարարությունների հետ, այն ֆիքսված դրույթների, որ կան կառավարության ծրագրում:

«Մենք սպասելու ենք վարչապետի ներկայացմանը, ունենք կարևոր հարցեր բոլոր ոլորտներում՝ թե ներքին քաղաքական, թե սոցիալ-տնտեսական, քանի որ այս ծրագրի գաղափարախոսությունը տնտեսական հեղափոխությունն է, իսկ թե ինչպես, ինչ գործիքներով, կլսենք կառավարության ղեկավարին: Դա այս փաստաթղթում չենք տեսնում, գուցե լրացուցիչ պարզաբանման կարիք ունի: Մենք ոչ միայն հարցեր ենք տալու, այլև առաջարկներ ենք ներկայացնելու, քանի որ այդ գործիքները մենք տեսնում ենք»,- ասաց նա:

Պատգամավորի բնութագրմամբ՝ կառավարության ծրագիրը «խիստ զգուշավոր» է, այնտեղ ռիսկերի հաշվարկ չկա, թեպետ ակնհայտ է, որ ունենալու ենք և արդեն իսկ ունենք ռիսկեր, ապա հարց ուղղեց՝ արդյո՞ք այդ գործոնը հաշվարկված է: Նրա խոսքերով՝ նաև Արցախի հարցում կան մտահոգիչ ձևակերպումներ՝ «ագրեսիվ հռետորաբանության նվազեցում, դադարեցում». Զոհրաբյանին հետաքրքրում էր՝ ո՞ւմ է սա ուղղված:

«Որքան տեղյակ եմ, այս հակամարտության մեջ մենք մի կողմ ունենք՝ Ադրբեջանը, որ չի թուլացնում այդ հռետորաբանությունը, և ամեն օր, ամեն ժամ սպառնում է»,- ասաց նա:

Զոհրաբյանի համար մտահոգիչ է նաև մշակույթի նախարարության ներառումը ԿԳ նախարարության կազմում: Նրա գնահատմամբ՝ մեր ունեցած մրցունակ բրենդներից մեկը մշակույթն է:

«Եթե մենք ունեցել ենք մշակույթի վատ նախարարներ, որոնց հիմնական գործառույթը եղել է այս կամ այն մտավորականի պանիխիդայի մենյուն կազմելը, դա պետք է պատճառ չդառնար, որ մենք այսօր մշակույթի նախարարությունը տարրալուծեինք գիտության և կրթության նախարարության մեջ: Սուպերնախարարությունները, գերլիազորություններով նախարարությունները երբեք արդյունավետ չեն կարողացել լուծել իրենց առջև դրված խնդիրները»,- նշեց պատգամավորը:

Նրա կարծիքով՝ ճիշտ չէ, որ համաշխարհային մշակույթի մեջ ամենամեծ ավանդն ունեցած ազգն ունենա ընդամենը մշակույթի բաժին: