Էդմոն Մարուքյանը Դունյա Միյատովիչի զեկույցում տեսնում է ոչ թե մեղադրանք, այլ մտահոգություն

ԵԽԽՎ-ում Հայաստանի պատվիրակության ներկայացուցիչներին այսօր լրագրողները հիշեցրին՝ ԶԼՄ ազատության հարցերով ԵԱՀԿ ներկայացուցիչ Դունյա Միյատովիչի զեկույցում Մարտի 1-ի գործերին անդրադարձ կար, ահազանգ էր հնչեցվում, մտահոգություններ էին արտահայտվում վրեժխնդրության քաղաքականության հետ: Հայաստանյան պատվիրակության ղեկավար Ռուբեն Ռուբինյանը նշեց, որ «ահազանգ» տերմինի հետ համաձայն չէ, քանի որ դա նշանակում է՝ խնդիր, խախտում են տեսնում, մինչդեռ, ըստ էության, չկա որևէ զեկույց, որում նշվի, որ Հայաստանում խախտվել է արդարությունը կամ արդարադատությունը: Ռուբինյանն ընդգծեց՝ կա կոչ՝ ապահովելու, որ բոլոր գործերը, ներառյալ մարտի 1-ի, անցնեն պատշաճ, արդար քննության միջով, որը դրական կոչ է, քանի որ իրենք դա անելու են և անում են:

Նա հորդորեց առաջնորդվել փաստերով, իսկ դրանք հետևյալն են.

1. ողջունվել է մարտի 1-ը բացահայտելու հանձնառությունը,

2. ոչ մի տեղ նշված չէ որևէ ահազանգ, որ Հայաստանում տեղի է ունենում որևէ անարդարություն,

3. պետք է հաշվի առնել, թե զեկուցողներն ընդհանրապես ինչպե՞ս են կարծիք կազմում. նրանք շփվում են բոլոր կողմերի հետ, լսում մտքերը և մտահոգությունները, համադրում են փաստերի հետ, կազմում զեկույցները:

«Կարծում եմ՝ ոչ ոքի համար գաղտնիք չէ, որ նախկին իշխանությունների ներկայացուցիչներն ամիսներ շարունակ ոչ այնքան տրամաբանական մեղադրանքներ են հնչեցրել նոր իշխանության հասցեին՝ տեղի է ունենում «վենդետա», «դիկտատուրա» է, խայտառակ վիճակ է, իրենք, ենթադրում եմ, այդ մտահոգությունները պետք է հնչեցրած լինեն նաև զեկուցողների հետ հանդիպումներում: Այս զեկույցում միայն կոչ են արել ապահովել այն, ինչ մենք ապահովել ու ապահովելու ենք»,- ասաց Ռուբինյանը:

Պատվիրակության անդամ, «Լուսավոր Հայաստան» խմբակցության ղեկավար Էդմոն Մարուքյանն էլ արձագանքեց, որ ինքը մեղադրանք չի տեսել, խոսքը մտահոգությունների մասին է եղել, նշվել է, որ մտահոգություններ կան, պետք է չափանիշները պահպանվեն: Դրանք, ըստ Մարուքյանի, այնպիսի չափանիշներ են, որ, անկախ այդ կոչերից, պետք է պահպանվեն:

«Զեկուցողները Դունյա Միյատովիչ լինեն, թե չլինեն, մենք, որպես ընդդիմադիր խմբակցության ղեկավար եմ ասում, եթե տեսնենք, որ հաշվեհարդար կամ քաղաքական հետապնդում կա Հայաստանում, ձայն կբարձրացնենք: Մեր դիտարկումները դեռ նման եզրահանգման չեն բերել, եթե միջազգային փորձագետներն արձագանքում են կամ մտահոգություն հայտնում, գուցե հանդիպումներ ունեն, առանձին տեղեկությունների են տիրապետում կամ չեն տիրապետում, ուղղակի ևս մեկ անգամ կոչ են անում իշխանություններին, որ լինեն ուշադիր, հետևեն գործընթացներին: Չափանիշների պահպանումը կարևոր է, ես վրեժխնդրության մասին ձևակերպում չեմ տեսել»,- ասաց նա: