Առևտրային 2 բանկ երկարացրել է անհուսալի վարկերի տույժ ու տուգանքների զիջման ժամկետները

Անհուսալի վարկերի տույժ ու տուգանքների զիջման ժամկետները կերկարաձգվեն: Այս քայլին են գնացել միայն մի քանի բանկեր: Սա անցած տարի կառավարության սկսած ծրագրի շարունակությունն է: Հիշեցնենք, որ գործադիրի որոշմամբ՝ մինչև 2018-ի մայիսի 31-ն անհուսալի դասակարգված վարկերի տույժ ու տուգանքները զիջվեցին այն վարկառուների համար, ովքեր բանկերի հետ հաշտեցման համաձայնագրեր և վարկի մարման նոր ժամանակացույց կնքեցին: Այս գործընթացը որոշակի նախապայմաններ ուներ, որոնց ոչ բոլոր վարկառուները համապատասխանեցին: Հիմա ժամկետների երկարաձգումը նրանց համար է, ովքեր 2018-ին չհասցրեցին այսպես կոչված բանկային համաներումից օգտվել:

Բանկերում պարտադիր պայման է, որ վարկառուն պետք է ներկայանա: Անհուսալի վարկերի տույժ ու տուգանքների զիջման ժամկետները երկարացրել են 2 առևտրային բանկեր՝ «ԱՅ–ԴԻ» բանկը և «Յունիբանկը». առաջինը՝ մինչև հուլիսի վերջ, երկրորդը՝ մինչև ապրիլի 1-ը: Այս երկարացումը նաև դրա համար է, որ հանրապետությունից բացակայող վարկառուները վերադառնան: Նրանց ներկայությունը պարտադիր, բայց միակ պայմանը չէ: Վարկառուն պետք է հասցնի մինչ այն պահը, երբ բանկը կսկսի տույժերը գանձել: Շատերն են այդ ժամկետից ուշացել, ինչի հետևանքով տույժերի նկատմամբ զիջում չի կիրառվել, իսկ մայր գումարը մնացել է:

«Մեր բանկում 1200 հաճախորդի դիմում է բավարարվել, և ընդհանուր զիջված գումարի չափը կազմում է 850 մլն դրամ: Մեծ ցուցանիշ է, ինչպես նաև բանկն ընդառաջ է գնում, որ հաճախորդներին ևս մեկ շանս տրամադրենք իրենց վարկային պատմությունը բարելավելու և վարկային բեռը թեթևացնելու համար: Հաշտության պայմանագրերը պարտադիր կնքվում են դատական կարգով, և տվյալ պարագայում անհրաժեշտ է հաճախորդի ներկայությունը կամ լիազորված անձի ներկայությունը»,– Shantnews–ին ասել է «ԱՅ-ԴԻ» բանկի Գյումրիի մասնաճյուղի կառավարիչ Կարեն Քերոբյանը:

Շիրակի մարզի Շիրակավան գյուղում վարկառուները գյուղի մի քանի բնակիչ են: Նրանք մեկնել են արտագնա աշխատանքի ու չեն վերադարձել: Վարկային պարտավորություններն էլ մնացել են երաշխավորների ուսերին: Վարկառուների բացակայության պատճառով էլ նրանք վարկային զիջումներից չեն օգտվել:

«Մեր գյուղում տույժերի ու տուգանքների զիջման արտոնությունից օգտվել է 6 վարկառու: Ընդհանուր հաշվով 8 վարկի նկատմամբ է կիրառվել այդ համաներումը, և եթե հաշվի առնենք, որ այդ վարկառուներն ունեցել են երաշխավորներ՝ առնվազն 3 հոգի, ապա կարելի է ասել, որ գյուղում 24–25 մարդ է օգտվել վարկային համաներումից: Մյուս վարկառուները ո՛չ գալիս են, ո՛չ էլ լիազորագրեր ուղարկում, հետևաբար՝ երաշխավորները զիջումներից չեն օգտվում»,–Shantnews–ին ասել է Շիրակավանի վարչական ղեկավար Սլավիկ Վարոսյանը:

Ավելացված ժամկետներում, եթե վարկառուները վերադառնան ու ժամանակացույց կնքեն, նրանք վերավարկավորման հնարավորություն կունենան, այսինքն՝ այսպես կոչված, սև ցուցակներից դուրս կգան: Սա հնարավոր է միայն այն դեպքում, երբ հին վարկերը մարվեն առանց ուշացումների: Բանկերը տույժեր ու տուգանքներ հաշվարկում են ուշացման յուրաքանչյուր օրվա համար: Հանրագումարում ստացվում է մեծ գումար: Տույժերի ու տուգանքների զիջման ժամկետները երկարացվել են, բայց նույնն է այն ժամկետը, որն ընդունվել է զիջումների համար,  խոսքը վերաբերում է մինչև 2018-ի մայիսի 31-ը կուտակված անհուսալի վարկերին: