Լատվիայում բացվել է հայկական պատմական քարտեզների ցուցահանդես

Հոկտեմբերի 24-ին Լատվիայի ազգային գրադարանում տեղի է ունեցել Հայաստանի պատմական քարտեզների ցուցահանդեսի բացման պաշտոնական արարողությունը, որը նախաձեռնել և կազմակերպել են Լատվիայում ՀՀ դեսպանությունը և Լատվիայի ազգային գրադարանը: Ցուցահանդեսի կազմակերպմանն աջակցել է նաև ՀՀ-ում Լատվիայի պատվո հյուպատոսությունը:

Միջոցառման բացմանը ներկա են եղել Լատվիայում հավատարմագրված դեսպաններ, Լատվիայի սահմանադրական դատարանի նախագահը, պատգամավորներ, գործադիր իշխանության ներկայացուցիչներ, մտավորականներ, հոգևորականներ, լրագրողներ և հայ համայնքի ներկայացուցիչներ:

Ըստ պաշտոնական հաղորդագրության՝ ցուցահանդեսի բացման արարողությանը ելույթով հանդես է եկել Լատվիայի ազգային գրադարանի տնօրեն Անդրիս Վիլկսը, որը մեծ կարևորություն է տվել Ռիգայում նման միջոցառման անցկացմանը, քանի որ լատվիական հասարակությունը բացառիկ հնարավորություն է ստանում օտար քարտեզագրական աղբյուրների միջոցով ծանոթանալու հայ ժողովրդի պատմությանը: Ազգային գրադարանի տնօրենը նաև շեշտել է, որ մեծապես կարևորում է Լատվիայի ազգային գրադարանի համագործակցության խորացումը Մատենադարանի և Հայաստանի ազգային գրադարանի հետ:

Ելույթ է ունեցել նաև Լատվիայում ՀՀ դեսպան Տիգրան Մկրտչյանը՝ նշելով որ «այս 51 քարտեզները ցույց են տալիս, թե ինչպես է Հայաստանն ընկալվել օտարերկրացիների կողմից 26 դար շարունակ: Դրանք արտացոլում են մեր պատմության փառահեղ, ինչպես նաև ողբերգական էջերը»: Նա տեղեկացրել է նաև, որ այդ ցուցահանդեսը, որտեղ Հայաստանը ներկայացված է հին հունական, հռոմեական, պարթևական, արաբական, օսմանյան, եվրոպական քարտեզագիրների կողմից, դրական արձագանք է ստացել մի շարք այլ մայրաքաղաքներում:

Ցուցահանդեսին դասախոսությամբ հանդես էեկել քարտեզները կազմող և հրատարակող Ռուբեն Գալիչյանը, ով ներկայացրել է պարսից Դարեհ Մեծն արքայի Բեհիսթունյան սեպագիր արձանագրությունները, ուր Հայաստանը, որպես հարևան երկիր նշվում է բազմիցս, ապա՝ մ.թ.ա վեցերորդ դարի, Բրիտանական թանգարանում պահվող հնագույն Աշխարհացույցը, որի կենտրոնում առկա են երեք երկիր՝ Ասորեստանը, Բաբելոնը և Հայաստանը, պատմագիտության հիմնադիր Հերոդոտոսի, աշխարհագրության հիմնադիր Ստրաբոնի և այլ հնագույն աշխարհագրագետների քարտեզներ, որոնց բոլորում առկա է Հայաստանը: Հերթականությամբ ցուցադրվել են միջնադարյան, իսլամական և քրիստոնեական քարտեզներ:

Օսմանյան Թուրքիայում 1894-1896թթ. կոտորածների և 1915թ. Հայոց ցեղասպանությանը վերաբերող քարտեզների կողքին Հայաստանի Առաջին հանրապետության, նաև խորհրդայնացման քարտեզներն են եղել, որոնց շարքն ավարտվում է ՀՀ և Արցախի ներկա քարտեզներով:

Միջոցառմանը համերգային ծրագրով հանդես է եկել Գերմանիայից հրավիրված էթնո-ջազային «Ագվաս» տրիոն, որը հայկական ժողովրդական երաժշտությունը կատարել է ջազային մեկնաբանությամբ:

Ցուցահանդեսը բաց է լինելու մինչև նոյեմբերի 26-ը: